Read lumasaaba Ezekeli 35 Bible Online

Ezekeli 35 - lumasaaba bible

Ezekeli 35

¹Umukasya waanganikhayo, nga aloma ari:

²“Umwaana w'omuundu, tsya mu shibala she Edomu ukholeleyo buŋoosi bububekiitsa.

³Balomele uri, inywe babaandu be mu Edomu, bona ise Umukasya Wele nekyelile umusiku weenywe. Kane ikhole shiibala sheenywe shiikyele busa kumubiimbi naluundi she kamakubili.

⁴Biriimba byeenywe kane biikyele kamakubili busa, ni shiibala sheenywe shiikyele busa kumubiimbi. Shino kane shikile inywe mumanye muri ise ndi niye Umukasya.

⁵“Inywe mubeele baasiku be babaandu ba Isiraeli khuumala imbuka indeeyi, naluundi mwalekha babaandu babaandi beera ba Isiraeli, ikhaba nga baaba bali mu mbuka iye khutaambisibwa; mu mbuka iye khufuna shiitaambiso shaabwe shimaliilisi khulwe bibyoonako byaabwe.

⁶Ni nashiryo, ari ise Umukasya Wele umunyali uwa byoosi, indikho inoma ndi, ise naabarekekheeleyo iyo khuufwa, naluundi khuufwa khunabebotokhelela inywe. Khulwekhuuba inywe muli ni kumusaango kwe khukhwiira, nanywe kane mwiiribwe.

⁷Ise ikhaakhole shiibala sha ba Mowabu khuuba kumubiimbi, naluundi she kamakubili busa. Ise ikheere babaandu boosi babaashibiriramo.

⁸Ise ikhaasalanise kimilaambo kye baafu kimalaatane khu njiinji tsyoosi. Kimilaambo ky'aabo babaakhaafwiile mu busoolo kikhaasalanile khu njiinji, ni mu matila mwoosi.

⁹Inywe mukhekyele kumubiimbi busa khuumala biilo ni biilo, ilekhe khubawo umuundu namutweela ukheeleyo khuumenya mu biriimba byeenywe luundi ta. Nio lwanyuma lweesho, kane inywe mumanye muri ise ndi niye Umukasya.

¹⁰“Ikhaaba nga ise Umukasya, abe indi niye Wele uwa Yuda ni Isiraeli, ne inywe mwaloma muri kamanaambo kano koombi kali kakeenywe, muri muli ni khuuyila liiloba lyaabwe.

¹¹Ni nashiryo, ise Umukasya Wele, umunyali uwa byoosi, kane ise imbeliyaase khuuloondekhana ni liirima ni liibuba byeesi inywe mwabokesanisa nibo, khulwe liirima lyeesi mwaba ni nalyo. Nga ise naamalile khuubakhalila inywe kumusaango, kane isho shikile inywe muumanye ise.

¹²Nio lwanyuma inywe mumanye muri ise Umukasya, naawulila nga inywe ni mwaloma ni khukhwiyiinga muri, tsinjiinji tsye mu Isiraeli tsili busa nga kamakubili, naluundi muri kane inywe muwaambe liiloba iyo libe lilyeenywe.

¹³Ise nabawulila inywe nga mwiyiinga angaaki, nga mukanikhaka kimilomo kimikali, nga mundekelesa ise.”

¹⁴Umukasya Wele umunyali uwa byoosi alikho aloma ari, “Kane aboonakise inywe, ikile shiibala shoosi shibe ni kumwikhoyo khulwe khukhwoonakisibwa khweenywe.

¹⁵Nga inywe ni mwekhoya khulwe khukhwoonakisibwa khwe linaambo lye ba Isiraeli, nga lyeekyela busa khuuba kumubiimbi, ni nase kane imbawe inywe shiitaambiso. Lukiingi Seyiri, ni tsinjiinji tsyoosi tsye mu Edomu, tsikhekele busa kumubiimbi. Nio lwanyuma mumanye muri ise ndi niye Umukasya.”