Read lumasaaba Ezekeli 36 Bible Online

Ezekeli 36 - lumasaaba bible

Ezekeli 36

¹Umukasya waanomela ari, “Umwaana uw'omuundu, kanikha isi babaandu babaamenya mu njiinji tsya Isiraeli, ubaboolele buurume buno, bubwaama isi ise Umukasya.

²Baasiku babatsekhelela inywe nga baloma bari, ‘Tsinjiinji tsya Isiraeli itsi tsiitsya khwikyela tsitsyeefwe.’

³Nashiryo, iwe khola buŋoosi nga ubaboolela byeesi ise Umukasya Wele indikho inoma. Inywe mwaba buubi nga mwaayikyela shishiindu sheesi kamanaambo kakaandi karaambisa busa, naluundi kamanaambo koosi kaabalekelesa inywe, khulwekhuuba nibo babaakila inywe mwekyela nga kumubiimbi busa. Nibo baabebwakala inywe khukhwaamila buli luwaande.

⁴Ni nashiryo, ari ise Umukasya Wele, indikho mbaboolela ilimo yino, inywe babaamenya mu njiinji, ni mu matila, ni mu mibiimbi, ni mu makubili ke biriimba bya Isiraeli, byeesi ari baantsukhila baalekha busa, muundu yeesi unyoolile wengilamo.

⁵Ni nashiryo, ari ise Umukasya Wele, indikho inganikha ni liirima liikali isi kamanaambo kakaandi ni linaambo lya Edomu lyoosi. Khulwekhuuba nibo mu mwikhoyo kwaabwe kumukali ni khukhundekelesa ise, baabukula shiibala shase nga bambaasa bari shinaba shishaabwe, naluundi bayile bibiilimo byoosi.

⁶“Ni nashiryo, iwe khola buŋoosi mu Isiraeli, nga uboolela tsinjiinji, bikoongo, tsintsitsi, ni kamatila, bibiindu byeesi ise Umukasya Wele, inomile. Bona, ise inganikha bibiindu bino khulwe liirima liikali, khulwekhuuba kamanaambo kabataambisile, naluundi kabatsekheleele inywe luukali.

⁷Ni khulwe lomo iyo, ise Umukasya Wele, niitsuba nga inoma ndi, kamanaambo kakaabebotokheleele inywe nako bali ni khuukatsekhelela.

⁸“Ne bisaala bibiili khu njiinji tsya Isiraeli kane bitsowe kamasaafu bushaakha, naluundi bibaamile inywe babaandu baase ba Isiraeli, bibyaamo. Muli aambi mukana khukhwiitsa ingo.

⁹Khulwekhuuba ise ndi khu luwaande lweenywe, naluundi ise ikhaabakoboleyo isi inywe, imbone indi ise inima kimikuunda kyeenywe naluundi imbyaalamo biilimwa.

¹⁰Ise ikhoongelekho buukali bwe babaandu mu shibala sheenywe. Mukheeleyo mumenye mu biriimba byeenywe, mwoombakhe bushaakha buli shiindu sheesi baasiku baalekha nga shili nga liikubili.

¹¹Ise ikhoongelekho buukali bwe babaandu ni bwe tsiisolo. Bino bikhaabe mu bukali mu khufuurisakho ni amataayi, naluundi inywe mukhaabe ni babaana baakali. Ise ikhaabalekhe inywe mumenye mu liloba lyeenywe nga ni mwamenyaatsaka amataayi, naluundi ikhaabawe inywe bye buyiindifu khuuminyisakho ubwo bweesi mwanyoowa khuuba ni nabwo. Nio inywe mumanye muri ise ndi niye Umukasya.

¹²Baandu baase ba Isiraeli, ise ikhaabakobose inywe ingo, mukobole khuumenya mu shibala sheenywe. Lino likhaabe liloba lyeenywe lilyeene, naluundi silikhaakile babaana beenywe bamenye intsala luundi ta.

¹³“Ise Umukasya Wele, indikho inoma indi, naamanyile indi babaandu beekhala nga baloma bari: shiibala isho shilya babaandu baasho naluundi shibalekhela intsala khukhwoolisa ni baafwa.

¹⁴Ne khukhwaamila ari, singene shilye babaandu luundi ta, namwe singene shilekhele babaandu baasho intsala, boole ni khuufwa ta. Ise Umukasya Wele, samweene niye ulomile bibiindu bino.

¹⁵Babaandu be mu shibala sheenywe singane beele mu khurekeeresa kamanaambo kakaandi nga kabatseshelela, namwe nga babalekelesa ta. Liiloba lyeenywe singane lilekhe babaandu baalyo boole ni khuufwa intsala ta. Ise Umukasya Wele, samweene niye ulomile bibiindu bino.”

¹⁶Umukasya waanganikhayo nga aloma ari:

¹⁷“Umwaana w'omuundu, nga ba Isiraeli ni baaba nga bashiimenya mu liloba lyaabwe lilyeene, babeene nibo babaalyoonakisa khulwe isaambo isi beebirisamo naluundi baamenyamo. Tsisaambo tsyaabwe tsye bunyaalu isi ise tsyaba busa nga bunyaalu bw'omukhasi uli khuutsya i masaaba.

¹⁸Ni nashiryo nase naabokesanisa liirima lye angaaki khulwe shiifuki sheesi baatsukha nga bali mu shibala isho, ni khulwe khuulyoonakisa nga besaaya bifwaani.

¹⁹Khulwe ntsibirisa yaabwe imbi, ise nabakhalila kumusaango, waakila naabasalanisa mu manaambo kakaandi busa, baatsya baatimila ibweene iyo.

²⁰Ne abe buli linaambo lyeesi batsyamo, abe buli aandu isi batsya, boonakisa lisina lyase. Khulwekhuuba abe bakila babaandu babaandi baaloma bari: ‘Babaandu bano bali nibo babaandu b'Omukasya, ne shaama shiryeena indi barura mu shibala shaabwe?’

²¹Isho shaakila ise neenaanayo naabi khu lisina lyase liikhosefu, khulwekhuuba abe buli isi ba Isiraeli baatsya, bakhomyaasa lisina lyase.

²²“Ni nashiryo, boolela ba Isiraeli uri Umukasya Wele alikho aloma ari: Shiikholwa sheesi ise ndi aambi khuukhola, ingana khuushikhola akhuba khulweenywe ta, ne khulwe lisina lyase liikhosefu. Inywe mwalikhomyaasila naabi mu manaambo keesi mweetsa khuumenyamo.

²³Ise ikhokesanise buukhosefu bwe lisina lyase lye angaaki, lyeesi ba Isiraeli baamalamo shiriifwa nga bali mu manaambo kakaandi. Nga ise nabaraambisire inywe khukhwookesanisa buukhosefu bwe lisina lyase, kane kamanaambo kamanye kari ise ndi niye Umukasya. Bibiindu bino ise Umukasya Wele samweene niye ubilomile.

²⁴Khulwekhuuba ise ikhaabaruseyo inywe khukhwaama mu manaambo kakaandi, imbabusaase khukhwaama mu bibala bibiindi, imbakoboseyo mu shibala shisheenywe shisheene.

²⁵Ise ikhaabasalaasekho kameetsi kamamiliwu imbapyeluuse, mube nga simulikho bunyaalu ta, naluundi imbapyeluusekho bunyaalu bwe khukhwisaaya bifwaani.

²⁶Ise ikhaabawe inywe kumwooyo kumushaakha, imbaremo n'umwoyo umushaakha. Ise ikhaaruse mu mibili kyeenywe kimyooyo kikyakhuna nga kamabaale, imbawe kimyooyo kikirekeeresa byeesi ise inoma.

²⁷Ise ikhaabare mus'iinywe umwooyo wase, nio inywe muloondelele kamakaambila kaase n'indeekela yase.

²⁸Inywe mukhaamenye khu liloba lyeesi ise namala khaale khuuwa bakuuka beenywe. Inywe mukhaabe babaandu baase, ni nase ikhaabe Wele weenywe.

²⁹Ise ikhaabarusekho ibyo byoosi bibibareerera inywe bunyaalu bwoosi. Ise ikhaalakile ibewo likyesa lye biilimwa liikali, nio alekhe khubawo intsala luundi ta.

³⁰Ise ikhaalakile bibyaamo ni liikyesa khukhwaama mu mikuunda kyeenywe biiloosele. Nio akile intsala ilekhe khubawaambisa inywe kamaŋaanyu isi kamanaambo kakaandi ta.

³¹Lwanyuma inywe mushebulile intsibirisa yeenywe imbi, ni bubwoonaki bweenywe bweesi inywe mwakhola. Bibyoonako byeenywe ni bunyaalu bweenywe bikhaakile lirima libawaambe, mwiyikiitse mwabeene khulwe bibiindu byeesi mwakhola.

³²Ba Isiraeli, Umukasya Wele alikho aloma ari, ise ingana inywe mumanye muri ise s'iindi khuukhola bibiindu bino khulweenywe ta. Ise ingana inywe kamaŋaanyu kabawaambe naluundi muswaale khulwe ntsibirisa yeenywe.”

³³Umukasya Wele alikho aloma ari: “Khu shifukhu khweesi ise ikhaabapyeluusilekho bunyaalu bweenywe bwoosi, ise ikhaabalekhe inywe mumenye mu biriimba byeenywe, ni bisiintsa bibyeekela kamakubili mwiilemo mubyombakhe bushaakha.

³⁴Kimikuunda kyeenywe abe kikyasiimba kyaamenya busa, mukheelemo mukilime luundi; mu shifwo she khuukilekha kyaaba busa awo, nga buli babaabira boosi babona nga ni kyasiimba.

³⁵Babaabira boosi bakhaalome bari shibala abe shishasiimba busa, ari shaamiliile, shili busa nga kumukuunda kwe mu Edeni. Naluundi bari, abe kakaaba kamakubili, ni kumubiimbi busa, nga buli shiriimba shaayonakisibwa, ari babaandu babyoombakhila tsiimako ni babaandu bamenyamo.

³⁶Nio lwanyuma kamanaambo kakaabebotokheleele inywe kamanye kari ise, Umukasya, noombakhile bushaakha biifwo abe bibyeekela kamakubili, naluundi naabyaalile biilimwa mu mikuunda abe kikyeekela kumubiimbi. Ise Umukasya, samweene niye ulomile bibiindu bino, naluundi ilala kane ise imbikhole nga n'inomile.”

³⁷Umukasya Wele alikho aloma ari: “Ise ikhaafukiilise ba Isiraeli khukhwiilamo khuuloomba buuyeeti khukhwaama isi ise. Ikhaayeete linaambo lyaabwe khuusaalana libalaahe, libe busa nga lituuli lye bibyaayo liikali.

³⁸Biriimba ari bibiili busa nga kamakubili bikheelemo bitsulemo babaandu, bibe busa nga Yerusalemu abe amataayi ni yeetsulamo kamakheese keesi abe baraambisa mu khuwaanayo tsiisayilo, khu shifukhu shikhulu. Nio lwanyuma nabo bamanye bari ise ndi niye Umukasya.”