Read lumasaaba Ezekeli 37 Bible Online

Ezekeli 37 - lumasaaba bible

Ezekeli 37

¹Ni naba nga ndi awo, naawulila nga kamaani k'Omukasya kaantsikhakho, n'Umwoyo wa Wele waambila waantsimisa mu litila liliitsuulemo kamakuumba.

²Umukasya waanangirira waantsolesa mu litila lyoosi, ise naabona nga abe iliwo kamakuumba kamakali naabi, naluundi nga abe kaayomela ilala.

³Kila andeeba ari, “Umwaana uw'omuundu, kamakuumba kano kanyala kalamukha kaaba ni buulamu luundi?” Ise naamwilamo ndi, “O Umukasya Wele, iwe wenyene niye unyala weelamo shireebo isho.”

⁴Lwanyuma waanomela ari, “Boolela kamakuumba kano biilomo bye buŋoosi, nga ukalomela uri, inywe kamakuumba kamoomu, ni murekeerese byeesi Umukasya alikho aloma.

⁵Kaboolele uri ise, Umukasya Wele, indikho inoma ndi, ndi khuutsya khubawa kumuuya kwe khuheela, nio mwiileyo mube baalamu luundi.

⁶Kane ise mbarekho inywe kimikotyo, tsinyama tsiilekho, ni shiikhoba nasho shikobolekho. Kane ise imbawe inywe kumuuya kwe khuuheela, nio mwiileyo mube baalamu luundi. Shino kane shikile inywe mumanye muri ise ndi niye Umukasya.”

⁷Ni nashiryo, nase naakaboolela biilomo bye buŋoosi nga Umukasya n'aandakila ise khuukhola. Ise ni naba nga ishiloma biilomo bye buŋoosi, naawulila liyoombo. Indi imbona, abawo khuusakaya, kamakuumba kaarakikha khukhwitubaasaka atweela, nga buli liibira liitubaasa khu lyashe.

⁸Indi ndola, naabona nga kimikotyo kyeetsilekho, tsiinyama tsyeetsakho, ni shiikhoba nasho sheetsakho. Ne kimilaambo ikyo kyaaba nga sikilimo ni kumuuya kwe khuheela ta.

⁹Lwanyuma Umukasya waanomela ari: “Umwaana w'omuundu, loma biilomo bye buŋoosi isi kumuuya kwe khuheela, ŋoola nga ulomela kumuuya kwe khuheela uri, ‘Umukasya alikho akhulakila iwe ari, yiitsa nga waama khu mbeka tsyoosi tsye shiibala, wingile mu milaambo kino, nio kinyalise khukhwikyela babaandu baalamu.’ ”

¹⁰Nashiryo nase naaloma biilomo bye buŋoosi nga Umukasya n'aandakila. Kumuuya kweetsa kwaakiingilamo, kyekela babaandu baalamu, beenyukha beemikha khu ngaaki. Abe bali baakali naabi, nga bukali bwaabwe abe bwoola liiye libuufu.

¹¹Lwanyuma waanomela ari: “Umwaana w'omuundu, kamakuumba kano kali nibo ba Isiraeli boosi. Bona, abe baloma bari, kamakuumba keefwe kaayoma, sikhuli ni kumwiyikino kwoositsana ta, naluundi khwaayola khu ntsakamo.

¹²Nashiryo kanikha biilomo bye buŋoosi, ubaboolele byeesi ise Umukasya Wele ndi khuuloma. Indikho inoma ndi, bona ise ikheekule tsiiŋani tsyeenywe, imbasyukhuluule khukhwaama mu ŋani tsyeenywe. Baandu baase, ise samweene ikhaabakobose ingo, mumenye mu shibala sha Isiraeli.

¹³Baandu baase, nga ise naamalile khukhwikula tsiiŋani tsyeenywe, naluundi naabashukhuluulile khukhwaama mu ŋani tsyeenywe, awo kane inywe mumanye muri ise ndi niye Umukasya.

¹⁴Ise ikhaabare mus'iinywe Umwooyo wase, nio inywe mube ni buulamu, imbeseyo mumenye mu shibala sheenywe shisheene. Nio lwanyuma kane inywe mumanye muri ise Umukasya, niye ukanikhile bibiindu bino, naluundi niye ubikholele.”

¹⁵Umukasya waanganikhayo nga aloma ari:

¹⁶“Umwaana w'omuundu, bukula lusaala uronekho biilomo bibiiloma biri: ‘Buuyiinga bwa Yuda.’ Lwanyuma ubukule lusaala luluundi uronekho uri: ‘Buuyiinga bwa Isiraeli.’

¹⁷Bukula tsisaala itsyo tsyoombi mu makhono koowo, utsitubaase atweela, tsiikele lusaala lutweela.

¹⁸Nga babaandu baakhureebire iwe bari, ‘Sheesi ukholile isho shimanyisa shiina?’

¹⁹Baboolele uri, bona ise Umukasya Wele, intsya khuwaamba lusaala luluuli mu lisina lya Isiraeli, ni n'oolwo luluuli mu lisina lya Yuda, intsitubaase atweela. Ise inaamisamo luusaala lutweela lweesi inawaamba mu mukhono kwase.

²⁰“Ambila tsisaala itsyo muukhono, mu shifwo mweesi buli mutweela anyala khuutsibonela.

²¹Lwanyuma ubaboolele uri, bona ise Umukasya Wele, indi khuutsya khubusaasa babaandu ba Isiraeli khukhwaama mu manaambo koosi keesi baasalanilamo, imbawuumbawuumbe khukhwaama khu buli luubeka, imbakobose mu shibala shaabwe shisheene.

²²Ise ikhaabekesemo linaambo litweela mu shibala isho, babe mu njiinji tsye mu Isiraeli. Bakhaabe n'umuyiinga mutweela yenyene nga niye umuwuli waabwe, balekhe khuuba nga bashawukhanamo khuuba buyiinga bubuulimo bubili ta.

²³Sibakheelemo khukhwireerera bunyaalu luundi nga besaaya bifwaani, namwe bakhole bye bubwoonaki bwoosi ta. Ise ikhaabawonese khukhwaama mu mikhoosi kyaabwe kimibi kyoosi kyeesi abe bakholelamo bibyoonako, imbapyeluuse. Nibo bakhaabe babaandu baase, ni nase ikhaabe Wele waabwe.

²⁴Umuyiinga ukhaabe nga umwakaanisi wase Dawudi, niye ukhaabatsake umuyiinga waabwe. Bakhaabe n'umwaayi mutweela yenyene. Bakhaaloondelele kamakaambila kaase, naluundi baloondelele indeekela yase.

²⁵Bakhaamenye khu liloba lyeesi ise nawa Yakobo, nga nilyo litweela lyeesi bakuuka baabwe baamenyatsakamo. Nibo babeene nabuli lisaaye lilikhaabaloonde khu nibo, bakhaamenyatsake mubweene umwo biilo ni biilo. Umuyiinga ukhaabe nga umwakaanisi wase Dawudi, niye ukhaabaatsake umuyiinga waabwe.

²⁶Ise ikhaakhole ni nabo ikwangwaani ireerawo lukoosi. Iyo ikhaabe ikwangwaani iye biilo ni biilo. Ise ikhaabawe nibo tsiikhabi, imbawe kamaani ke khukhwiloosela mu bukali bwe babaandu, naluundi ise nombakhe Liisaayilo lyase Liikhulu akari mu nibo, libewo biilo ni biilo.

²⁷Ise ikhaamenye atweela ni nabo; imbe Wele waabwe, nibo babe babaandu baase.

²⁸Nga ise nombakhile shiifwo shase shikhosefu akari mu ba Isiraeli khuumala biilo ni biilo, isho shikhaakile babaandu be kamanaambo kakaandi bamanye bari ise Umukasya, niye uwa Isiraeli tsiikhabi.”