Read lumasaaba Ezekeli 38 Bible Online

Ezekeli 38 - lumasaaba bible

Ezekeli 38

¹Umukasya waanganikhayo nga aloma ari:

²“Umwaana uw'omuundu, tsya wikiitse Ogo, umuwuli umukhulu uwe kamanaambo Meseki ni Tubali, kakaali mu shibala sheesi balaanga bari Magogo. Kanikha biilomo bye buŋoosi bibimwikiitsa,

³nga umuboolela umweene. Ise Umukasya Wele, indikho imulomela niye indi, ari ise nekyelile umusiku weewe.

⁴Kane ise imwakamise mu byeesi niye akhola, imure kumulobo muusaya tsyeewe, imukhweese niye atweela ni liiye lyeewe lye kamaani ilyo, imbarusewo. Ise naamanyile indi liiye lyeewe, ni tsiŋwaaŋwa tsyalyo, ni naabo babaatsitimilakho bali baakali, na buli umusilikhale atsya nga waasutile ingabo ni luurima.

⁵Kamahe khukhwaama mu Pasiya, Esiyopiya, ni Puti boosi bali atweela ni naye. Naluundi buli mutweela ali n'ingabo ni kukofwiila khu murwe.

⁶Baasoolani boosi khukhwaama mu bibala bye i Gomeri, ni i Besi Togama babaali ingaaki we linaambo, boosi bali atweela ni naye. Iliwo ni basoolani babaandi khukhwaama mu manaambo kakaandi.

⁷Yiirekekha naluundi urame nga uli umwirekefu, ubone uri liiye lyoowo lyoosi lili liliirekefu, nga iwe niye uli umuraangirisi walyo.

⁸Lwaanyuma lwe biifukhu bibyoola muukhono, ise ikhaababuusaase inywe atweela. Ari nga abirirewo kimiiko kimikali, ise ikhaamulakile atsye ebwakale linaambo liliilimo babaandu beesi baabusaasa, baabakobosa ingo khukhwaama mu manaambo kakaandi. Baamenyile nga sibeyembeelela busoolo ta. Akhaatsye ebwakale tsinjiinji tsye mu Isiraeli, tsyeesi bawuuyamo khaale naluundi tsyekela busa nga kumubiimbi, ne nga nimwo mweesi babaandu aluno ari bamenyayo mu lukoosi.

⁹Niye atweela ni liiye lyeewe ni kamahe ke kamanaambo kakaandi kakaakhaabe nga kali ni naye, bakhebwakale babe busa nga ikhuungu, bamaamile shiibala isho shoosi busa nga kamafuumbi.”

¹⁰Umukasya Wele, alikho alomela Gogo ari: “Nga imbuka iyo yoolile, iwe ukhaabe ni bibyambaaso mu murwe kwoowo, urakikhe khuukhootsayo inengakharengekha imbi naabi.

¹¹Ukhaakhalewo khuutsya khukhwibwakala babaandu babaali mu shibala shishiikhalikho ni shishitseeta ta. Babaandu bano bamenya mu lukoosi ni mu khwiliinda khuulayi, mu biriimba bibikhalikho tsiimako ta.

¹²Iwe ukhanuule bibiindu bibiilimo, naluundi usute ni babaandu babaamenya mu biriimba bibyabaatsakakho kamakubili. Babaandu bano babaabusaasa baabakobosa khukhwaama mu manaambo kakaandi, nga ari nibo babaamanyikhaane naabi mu shibala shoosi, khulwekhuuba bali ni bibyaayo ni buyiindifu.

¹³Babaandu khukhwaama i Sheba ni Dedani ni babaakhola bye buusuubusi khukhwaama mu biriimba bye mu Sipeyini, bakhaakhureebe iwe bari, ‘Iwe weetsile ni liiye lyoowo khukhwibwakala bari nio unuule naluundi usute babaandu utsye ni nabo? Iwe weetsile khuusuta ifweesa, ni zaabu, ni bibyaayo, ni bye buyiindifu byoosi, utsye ni nabyo?’ ”

¹⁴Ni nashiryo, umwaana w'omuundu, iwe tsya isi Gogo, ukhole buŋoosi nga umuboolela uri Umukasya Wele alikho aloma ari: “Mu mbuka iyo nga ba Isiraeli balikho bamenya mu lukoosi naluundi ni mu khwiliinda khuulayi, iwe ukheenyukhe,

¹⁵khukhwaama mu shifwo shoowo mweesi iwe umenya shishiili ingaaki we shibala, wiitse nga uli ni liiye liikali. Liiye lino likhaabe nga lilimo basilikhale be kamaani khukhwaama mu manaambo koosi, nga boosi bali khu mikoongo kye tsiŋwaaŋwa.

¹⁶Iwe ukheebwakale babaandu baase ba Isiraeli, ube busa nga ikhuungu iye kamaani iwuutsa shiibala shoosi. Ise ikhaakhusiindikhe iwe khuutsya khukhwibwaakala shiibala shase, nio kamanaambo kakaandi kamanye kari ise ndi Umukasya. Ise ikhaabirire mu byeesi iwe ukhaabe ukhola, nokesanise bukhosefu bwase.

¹⁷Iwe niye isi naba indikho inganikhakho khaale akho, nga ni nakuukuula khuubirira mu bakaanisi baase baŋoosi be mu Isiraeli, ni naloma indi, ilibawo biifukhu bibiitsa mu moni, ise indeere umuundu ebwakale ba Isiraeli.”

¹⁸Umukasya Wele, alikho aloma ari: “Ne khu shifukhu khweesi Gogo akhebwakalilemo linaambo lya Isiraeli, ise ikhaakhalale naabi.

¹⁹Khulwekhuuba khulwe khuwulila buubi ni khulwe liirima lyase liikali, ise naakhalilewo indi khu shifukhu isho ilibawo khuunikinisibwa khwe shibala khwe kamaani mu Isiraeli.

²⁰Tsinyeeni tsyoosi, ni biinywiinywi byoosi, ni tsisolo tse mwirome tsoosi, na buli umuundu yeesi uliba ali khu shibala, bakhaabe ni khuurya khuukali naabi khulwase. Tsinjiinji tsikhaafunikhe tsikwe aasi, kimibaale kimileeyi kikhaakhalikhe kikwe ilumya, na buli kuutikiiyi kwa buli shiriimba kukhekhupe aasi.

²¹Umukasya Wele, alikho aloma ari, akhaakile bibiindu biibi bya buli saambo bikwe khu Gogo, abe ni khuurya khuukali, shikile basilikhale beewe basoolane bonyene khulwe khuurya.

²²Ise ikhaamuwe niye shitaambiso khuubirira mu khumureerera buulwaale buubi naabi, ni mu khutsukha shiifuki. Ise ikhaamusiindikhile niye atweela ni liihe lyeewe ni babaandu beewe, kuufula kwe kamaani kukweene, ni kamararara. Naluundi ni buunoro bwe kumulilo bukhaamulakalekho umweene atweela ni liye lyeewe, ni babaandu babaakhaabe nga bali khu luwaande lweewe.

²³Ni nashiryo mu saambo yino ise ikhokesanise kamanaambo kakaandi indi ise ndi uwe kamaani naluundi indi umukhosefu. Nio lwanyuma bamanye bari ise ndi niye Umukasya.”