Read lumasaaba Ezekeli 39 Bible Online

Ezekeli 39 - lumasaaba bible

Ezekeli 39

¹Umukasya Wele, waaloma ari: “Umwaana uw'omuundu, khola buŋoosi bubwikiitsa Gogo. Mulomele uri bona ise Umukasya naamanyile nga iwe uli umuwuli umukhulu uwa Meseki ni Tubali, ne ari intsya khumwibwakala.

²Kane ise imwaakamise niye mu byeesi alikho akhola ni isi alikho atsya, imuraangirire khu mukhoosi kumushaakha, imuyile aleeyi abweene, ingaaki we linaambo, khukhwoolisa n'oola khu njiinji tsye mu Isiraeli.

³Nio lwanyuma ise ikhupe kumukhono kweewe kumunyeletsi buyiingo bukwe aasi, naluundi ikhupe kumulayi, akile buufumo bweewe nabwo bukwe aasi.

⁴Iwe wamweene atweela ni liiye lyoowo, ni babaandu boosi beesi iwe ukhaabe ni nabo, mukhaafwiile mu njiinji tsye mu Isiraeli. Ise ikhaasiindikhe biinywiinywi bya buli shikuuka ni tsisolo tsye mwiiswa, bilye kimilaambo kyeenywe.

⁵Kimilaambo kyeenywe kikhaakwe aasi mu keewe kirame abulafu busa. Ise Umukasya Wele, niye ulomile bibiindu bino.

⁶Ise ikhaarakikhisewo kumulilo mu shibala sha Magogo atweela ni mu baandu babaamenya khu ndulo khwe inyaantsa, isi bamenya mu lukoosi. Shino shikhaakile buli mutweela amanye ari ise ndi niye Umukasya.

⁷Babaandu baase ba Isiraeli bali ni khuumanya lisina lyase liikhosefu, naluundi indekhe khubafukiilisa khukhwiilamo khuukhomyaasaka lisina lyase luundi taawe. Nio kamanaambo kakaandi kamanye kari ise ndi niye Umukasya Wele uwe ba Isiraeli uli umukhosefu.”

⁸Umukasya Wele alikho aloma ari: “Ilala, shiifukhu sheesi ise namala khaale khuulomakho shilikho shiitsa.

⁹Mu mbuka iyo, babaandu babaamenya mu biriimba mu Isiraeli bakhaatsye bangale bye busoolo bye baasiku baabwe, babiraambise nga tsiikhu. Bakhabwaane kumulilo nga baraambisa tsiingabo, buyiingo, bufumo, kamafumo, ni tsiluungu. Bino bikhaabewo mu bukali nga bimala, khuumala kimiiko musaafu.

¹⁰Nashiryo seshikhaabekoombese khureenya tsiikhu mwiiswa, namwe khuurema kimisaala mu shisaali ta. Khulwekhuuba bakhaabe balikho baraambisa bye busoolo nga tsiikhu. Nabo bakhelihaase nga banuula, naluundi nga boonakisa abo babaaboonakisa nibo.” Umukasya Wele umweene niye ukanikhile bibiindu bino.

¹¹Lwanyuma Umukasya waaloma ari: “Nga bibiindu bino byoosi byaamalile khuukholikha, ise ikhaawe Gogo shiifwo mu Isiraeli sheesi bakhaamusiikhemo. Shikhaabe mu Litila lye Babaakyeenda, nga shiifwo shino shili ibwaamanyaanga we inyaantsa Dedi Si. Khulwekhuuba Gogo ni liiye lyeewe bakhaasiikhibwe mu litila ilyo, bakhaalilaange bari ‘Liitila lye Liiye lya Gogo,’ khulwekhuuba babaakeenda sibakhaanyalise khuubiriramo luundi ta.

¹²Shikhaayilile ba Isiraeli kimyeesi musaafu khuusiikha kimilaambo ikyo kyoosi, nio shinyalise khuupyeluusa liloba ilyo luundi.

¹³Babaandu boosi babaali mu shibala isho, bakhaayeetekho mu khusiikha kimilaambo ikyo, naluundi babaandu babaakhaayeetekho abo, bakhaafune shiriifwa khu shifukhu khweesi ise ikhaafuriremo busoolo. Ise Umukasya Wele, samweene niye ulomile bibiindu bino.

¹⁴Lwanyuma lwe kimyeesi musaafu ikyo, bakhaaroboreyo babaandu babaakhaatsye nga bakyeenda mu shibala shoosi, khuuweentsa kimilaambo kikikhaabe kyaaramire khu liloba khu ngaaki, ni bakisiikhaka, nio bapyeluuse shibala isho.

¹⁵Bano ni bakhaabe nga balikho bakyeenda mu shibala isho, khuweentsa kimilaambo, uyo yeesi ukhaabe waaboone likuumba ly'omuundu, ali ni khuurawo khaabonelo khakhokesana kharamewo, khukhwoolisa nga babaasiikha kimilaambo, baasiikhile kamakuumba ako mu Litila lye Liiye lya Gogo.

¹⁶(Ikhaabewo shiriimba shishikhaabe aambi sheesi bakhaatwiikhe bari Litila lye Liiye lya Gogo.) Ni nashiryo mu saambo iyo, bakhaapyeluuse shibala isho.”

¹⁷Lwanyuma Umukasya Wele waanomela ari: “Umwaana w'omuundu, laanga biinywinywi byoosi ni bisolo byoosi khukhwaama buli aandu bibuusane, bilye isaayilo isi ise ndi khuubiŋoonaŋoonela. Kamayiiya kano kakaakhaabe khu njiinji tsya Isiraeli, kakhaabe kamaboofu naabi. Bikhaalye tsinyama naluundi binywe ni kamafuki.

¹⁸Bikhaalye tsinyama tsye basilikhale baanyiindalifu, naluundi binywe kamafuki ke baawuli be khu shibala. Babaandu bano boosi bakheeribwe kamafuki kaabwe kabe busa nga ke kamamiiku, kamasheese, tsimbusi, tsiwuunwa, ni tsikhaafu tsiikhomefu tsye mu Bashani.

¹⁹Nga ise naamalile khuukhola isaayilo isi indikho inengekharengekha, bikhaalye tsinyama khukhwoolisa ni biikura, naluundi binywe kamafuki khukhwoolisa ni kabimeese.

²⁰Bikheetse khu meetsa yase bilye tsiinyama tsye basilikhale abe babaakyeendela khu ŋwaaŋwa, ni basilikhale babaandi banyiindaalifu babaakhali batweela ta. Ise Umukasya Wele samweene niye ulomile bibiindu bino.”

²¹Umukasya waaloma ari: “Kane ise ifukiilise kamanaambo khuubona shiriifwa shase. Kamanaambo koosi kakhaabone shitaambiso sheesi ise ikhaabe nakaweele, naluundi bakhaabone kamaani keesi ise inaambisa mu khukhola byeesi ingana.

²²Khukhwaamila khu shifukhu isho khuutsya ibweeni, ba Isiraeli bakhaamanye bari ise ndi niye Umukasya Wele waabwe.

²³Ni kamanaambo kakaandi kakhaamanye kari ba Isiraeli baayilibwa mu bubowe khulwe bibyoonako byeesi baakhola. Khulwekhuuba nibo bandyamo ise luuwomelo, nase nabaantsukha, naalekha baasiku baabwe khubebwakala baabawula, babeerira mu busoolo.

²⁴Ise nababirisa mu saambo iyo, khuuloondekhana ni bubwoonaki bwaabwe ni tsisaambo tsyaabwe tsiimbi. Nashiryo ise nabaantsukha nabalekha bonyene.”

²⁵Umukasya Wele, alikho aloma ari: “Ne ari ise kane imaambile lisaaye lya Yakobo shiisa, nga nibo babaali ba Isiraeli, imbakobosele buyiindifu bwaabwe luundi. Ise ikhaatsiinikhile lisina lyase liikhosefu.

²⁶Nga baakoboleyo mu shibala shaabwe balikho bamenya mu lukoosi, nga mbaawo ubataambisa ta, bakheebilile isaambo isi bataambisibwamo, ni musaambo isi baandyamo ise luuwomelo.

²⁷Mu khukhalawo khukhwookesanisa kamanaambo kakaandi indi ise ndi Umukhosefu, ise ikhaakobose babaandu baase khukhwaama mu manaambo kakaandi, mu liloba lye baasiku baabwe.

²⁸Nio lwanyuma babaandu bakhaamanye bari ise ndi niye Umukasya Wele. Bakhaamanye shino, khulwekhuuba ise niye uwaakila baayilibwa mu bubowe, ne lwaanyuma ise naababuusaasa naabakobosayo mu shibala shaabwe. Ise siikhaalekhekho ikhaaba mutweela yeenyene nga ali mu manaambo kakaandi ta.

²⁹Ise ikhaatsukhe Umwooyo wase khu baandu ba Isiraeli, indekhe khukhwilatsakamo khuubaantsukha luundi ta. Ise Umukasya Wele, samweene niye ulomile bibiindu bino.”