Read lumasaaba Ezekeli 4 Bible Online

Ezekeli 4 - lumasaaba bible

Ezekeli 4

¹Wele waaloma ari, “Mwaana w'omuundu, bukula litafwaali, ulire ibweeni woowo, ulikhupekho tsinyilili tsitsokesanisa shiriimba Yerusalemu.

²Lwanyuma khukhwookesanisa isaambo isi bebwakalamo shiriimba, limakho buurwi bweesi baselikhale bekhururiramo, ubuumbekho kuumako kwe liiloba, ni tsikaambi tsye baasiku, naluundi wiimise kuuloba mu bifwo biikali kweesi baasiku baniinilakho khu kutikiiyi khu ngaaki.

³Ubukule isefuluya iye shiibya ukiimise nga litikiiyi, ibe akari owo ni shiriimba. Iwe loleelela luwaande lwe shiriimba. Lekha shibe nga sheesi balikho bebwakala, nga iwe niye ulikho ushiibwakala. Akho kane khabe khaabonelo isi babaandu be linaambo lye ba Isiraeli.

⁴“Lwanyuma iwe yiyalisa aasi, nga ukonela kumukhono kwoowo kumunyeletsi, nio akile ise ikhure khus'iiwe shitaambiso she babaandu be linaambo lye ba Isiraeli. Uli ni khuukona abweene awo khuumala biifukhu biitoondo bitaru ni kamakhumi syeenda (390), nga utaambisibwa khulwe bibyoonako byaabwe.

⁵Ise naakhuweele iwe shitaambiso she shifukhu shitweela, nga shookesanisa buli kumwiiko kweesi shitaambiso shaabwe shikhaamale. Iwe ukhaaweebwe shitaambiso she babaandu be linaambo lye ba Isiraeli.

⁶Nga iwe waamalile bibiindu bino, ukheyalise luundi aasi, ifuunda ikhola khabili, ne nga ari ukonela kumukhono kumuseetsa. Akho khakhaabe khaabonelo khe shitaambiso shishikhaaweebwe babaandu be linaambo lya Isiraeli. Ukhaamale biifukhu kamakhumi kane, nga buli shifukhu shookesanisa kumwiiko kumubuufu kwe khuutaambisibwa khwaabwe.

⁷“Shuusa tsimoni tsyoowo utsoomiisile khu Yerusalemu, nga iwe ushibwakala ni kamakhono koowo. Lwanyuma ukanikhe biilomo bye buŋoosi nga bibikheetse khu baandu be mu shiriimba isho.

⁸Kane ise ikhubowe iwe ni kimikosi, ulekhe khunyalisa khushuukha khu luwaande luluundi ta, khukhwoolisa nga khukhwibwakala khwaweele.

⁹“Ari iwe bukula iŋaano, seyiri, kamakaanda, tsibalaayo, ni buulo ubire mu pwakhuli indweela, ubikaandile atweela uteekhemo kumukaati. Kane iwe ulye bibyeene ibyo khuumala biifukhu bitoondo bitaru ni kamakhumi syeenda (390), byeesi unamala nga waakoneele khu luwaande lutweela.

¹⁰Biilyo byeesi uli ni khuulya buli shifukhu, uli ni khuubipiima, nga biba shipimo shitweela buli shiifukhu. Buli shifukhu uli ni khuulya biilyo ifuunda indweela.

¹¹Ikhaba kameetsi, uli ni khuukapima, nga unywa bikoombe bibiili buli shifukhu. Uli ni khuukanywa ifuunda indweela buli shifukhu.

¹²Uli ni khuubiteekhela khu mulilo kweesi ubwaana nga uraambisa byeesi babaandu bawalukha bibyooma khaale, ubiliile abulafu isi babaandu boosi bakhubonela.”

¹³Kila Umukasya aloma ari, “Shino kane shookesanise isaambo isi ba Isiraeli bakhaalyatsakemo biilyo byaabwe bibiili bye mbikho, nga batsiile khuumenya mu manaambo keesi ise intsya khubayilamo nga imbamiinikhilisa.”

¹⁴Ne ise neelamo naloma ndi, “A a, Umukasya Wele! Ise mu buulamu bwase ishiili khukholatsakho shishiindu she mbikho nga isho ta! Khukhwaama mu bwaana, ise ishiili khulyatsakakho inyama iye shishaayo shishifwiile shonyene busa, namwe isi isolo yiirire, namwe inyama ibolile ta.”

¹⁵Kila Umukasya antsilamo nga aloma ari, “Mu shifwo she khuteekhela khu byeesi babaandu bawalukha, kane ikhufukiilise uteekhele khu masiisye ke tsikhaafu.”

¹⁶Ne Umukasya waalooselakho ari, “Mwaana uw'omuundu, ise ndi khuutsya khureerawo intsala mu Yerusalemu. Bakhaalye biilyo byeesi bapima busa, naluundi nga bamenya mu khurya khuukali naabi. Naluundi bakhaanywe kameetsi kamapima busa, nga bali mu mutaambo.

¹⁷Biilyo ni kameetsi bikhaabawekho. Bakhaabe mu mutaambo, naluundi bafune shitaambiso she khuwetsekhelela busa bawewo khulwe bibyoonako byaabwe.”