Read lumasaaba Ezekeli 40 Bible Online

Ezekeli 40 - lumasaaba bible

Ezekeli 40

¹Lutweela, khu shifukhu she liikhumi mu mwiiko kumushaakha, nga kuno kwaba nikwo kumwiiko kweefwe kwe kamakhumi kabili na kiraano, khukhwaama nga ni khutsya mu bubowe, naluundi nga abe nikwo kukuukhola kumwiiko kwe likhumi na kine khukhwaama nga baasiku ni bawaamba Yerusalemu. Khu shifukhu isho, ise naawulila nga kamaani k'Omukasya kaantsikhakho, kaasuta.

²Mu khubonekhelwa ukhwo, Umukasya waasuta waambila mu shibala sha Isiraeli, waantsimisa khu lukiingi luleeyi. Naabona ibweeni wase nga yemikhileyo bibyoombakhe bibiili nga shiriimba.

³Nga n'antsolisayo, ise ndi indola naabona umusaani nga weemikhile awo. Abe amelamela nga buroonzi. Abe wawaambile luukhoba luluupima atweela ni lusaala lulupima, muukhono mweewe, nga wemikhile aambi ni shilibwa.

⁴Kila umusaani uyo anomela ari: “Umwaana uw'omuundu, yiikula tsimoni tsyoowo ubone buulayi, ureke kamaru koowo urekeerese buulayi, umalile kamakhula koowo koosi khu biindu byoosi byeesi ise intsya khukhwookesa iwe. Khulwekhuuba khukhureerire iwe ano, bari nio ise ikhwookese iwe bibiindu bino. Byeesi ubona ano byoosi, uli ni khuutsya ubiboolele ba Isiraeli.”

⁵Ise ndi indola, naabona kuutikiiyi kwe bulafu, nga kwebotokheleele shiifwo shishabamo Lisaayilo Liikhulu lyoosi. Umusaani uyo waabukula luukhoba luluupima, nga abe lwoolisa buuleeyi tsifuuti liikhumi (10), waapima kuutikiiyi. Abe kwoolisa tsifuuti liikhumi khuuniina mu ngaaki, ni kumusisiri nakwo nga kuli tsifuuti liikhumi.

⁶Kila umusaani tsana atsya mu shilibwa shishiloleeleele ibwaamanyaanga. Ni aaniina kamataala kakaabawo, nga woolile khu ngaaki, waapiima kumulyaango, nga kwoola tsifuuti liikhumi.

⁷Waapiima ni biseenge bye khu ndulo, nga buli shitweela shoola tsifuuti liikhumi. Ne biseenge bibyaaba akari e kumusisiri kwoola tsifuuti shinaane. Nga waabirirekho khu biseenge abe byeesi basilikhale bakonamo, abe iliwo kumukhoosi. Abe kumukhoosi ukwo kwoolisa buuleeyi tsifuuti liikhumi, nga kutsya mu mulyaango kukwiingila mu shiseenge shishiloleelelaane ni Lisaayilo Liikhulu.

⁸Nga waapimile shiseenge she antsye isho, waanyoola nga shoolisa tsifuuti 14.

⁹Ni aapiima kuutikiiyi kukuuloondelakho, waanyoola nga kuli tsifuuti tsiine.

¹⁰Abe khu buli luwaande lwe shiilibwa shishiili ibwaamanyaanga, iliyo biseenge bitaru, nga kamatikiiyi kakaawukhanisa biseenge ibyo nga koosi kalekhaana.

¹¹Lwanyuma umusaani tsana waapima buubalaayi bwe kumukhoosi. Abe atweela bwoosi buli tsifuuti 22, nga buubalaayi bubuuli akari e biilibwa bibiikule ibyo abe buli tsifuuti 16.

¹²Abe ibweeni wa buli shiseenge she basilikhale isho, abe iliyo litikiiyi liliimbi liri nga lyoolisa tsi sentimita kamakhumi karaano buuleeyi, nga ni kumusisiri kwe litikiiyi nakwo kwoolisa tsi sentimita kamakhumi karaano. (Buseenge abe bwoolisa tsi mita tsitaru khu buli lubeka)

¹³Weelakho waapima buubalaayi bubuuliwo khukhwaama khu kutikiiyi abe kukuuli imukoongo we shiseenge abe shishiili mu kukhoosi. Abe buuleeyi bwe bushiikha ubwo, bwoolisa tsifuuti 42.

¹⁴Abe shiseenge shishisembayo khundulo shilimo kumulyaango kukwingila khu lwaanyi. Waapiima shiseenge isho nasho waanyoola nga buubalaayi shili tsifuuti 34.

¹⁵Abe nga waareere atweela buuleeyi bubuuli akari e kumukhoosi ni khukhwaamila ibulafu we shilibwa, khuutsya khukhwoolisila ilala khu shiseenge shishiseembayo, abe bwoola tsifuuti 84.

¹⁶Abe iliyo tsiinuma khu buli luwaande lwe ibulafu wa buli shiseenge, ni mu kutikiiyi kukuuli akari we biseenge. Abe khu matikiiyi kakaaloleleele kumukhoosi, baakhupakho bifwaani bye kuusaala kusheendu.

¹⁷Lwaanyuma waambila mu lwaanyi lwe bulafu. Indi ndola naabona nga ilimo biisenge kamakhumi kataru, byeesi boombakha nga byaayitiila khu kutikiiyi kwe bulafu. Ibweeni we biseenge bino abe iliyo kumukhoosi kwe khukyeendelakho nga baayalakho kamabaale.

¹⁸Kumukhoosi abe kwaayibotokhelela lulwaanyi lwoositsana. Abe lulwaanyi lwe mukari lulikho angaaki khuuminyisa lwe bulafu.

¹⁹Abe iliwo kumukhoosi kukuundi, nga kulikho angaaki khuuminyisa ukwo abe kukuutsya mu lwaanyi lwe mukari. Kila umusaani tsana waapima buuleeyi bubuuli akari e kimikhoosi ikyo, waanyoola nga buli tsifuuti shitoondo shitweela ni kamakhumi kasesaba na shinaane (168).

²⁰Lwanyuma umusaani tsana waapima kumukhoosi kukuuli ingaaki, nga kwingila mu lwaanyi lwe bulafu.

²¹Abe biseenge bitaru khu buli luwaande lwe kumukhoosi, ni kamatikiiyi kakaali akari e biseenge ibyo, ni shiseenge shishingila khu luwaande ulwo, abe byoosi bili ni bipimo shitweela nga kumukhoosi kwe bwaamanyaanga. Atweela buuleeyi bwoosi bwe kumukhoosi abe buli tsifuuti 84, ni buubalaayi bwe tsifuuti 42.

²²Shiseenge she khukhwingililamo, kamatirisa, ni bifwaani bye kusheendu abe byeesi baakhupa khu matikiiyi, bili nga ibyo bye mu shilibwa she bwaamanyaanga. Abe iliyo biniinilo musaafu bibiitsya khu shilibwa, nga shiseenge she khukhwingililamo shili khu ndulo, nga shaloleelela lulwaanyi.

²³Abe iliwo kumukhoosi kukwaloleelela shiilibwa shishiili ingaaki, nga kuno nikwo kukwingila mu lwaanyi lwe mukari, nga shili shitweela busa ni khu luwaande lwe ibwaamanyaanga. Umusaani n'apima buubalaayi bubuuli akari e kimikhoosi kino kyoombi, wanyoola nga buli tsifuuti shitoondo shitweela ni kamakhumi kasesaba na shinaane (168).

²⁴Lwanyuma umusaani tsana waambila luubeka lwe mwaalo, indi iyo nayo ise naabonayo shiilibwa shishiindi. Waapima kamatikiiyi kaasho ke mukari ni shiseenge sheesi bengililamo. Abe byoosi bili busa nga bibiramire.

²⁵Abe iliwo kamatirisa mu biseenge bye mu kukhoosi, nga abe ni bili mu biraamire. Abe buuleeyi bwoosi bwe kukhoosi ukwo bwoolisa tsifuuti 84, ni buubalaayi nga buli tsifuuti 42.

²⁶Abe iliwo biniinilo musaafu bibitsyayo, nga ni shiseenge shishingilamo shili khuundulo nga shaloleleele lulwaanyi. Abe khu matikiiyi kakaaloleleele kumukhoosi, baakhupakho bifwaani bye kuusaala kusheendu.

²⁷Ikhaba ano nawo, abe iliwo kumukhoosi kukwingila mu lwaanyi lwe mukari. Umusaani tsana wapima buuleeyi bwe kumukhoosi kukuukhola khabili kuno, wanyoola nga kwoolisa tsifuuti shitoondo shitweela ni kamakhumi kasesaba na shinaane (168).

²⁸Umusaani tsana waambirisira mu shilibwa shishiili luubeka lwe mwaalo, waambila mu lwaanyi lwe mukari. Kila apima kumukhoosi, waabona nga nakwo kulekhaana ni neekyo kikiili mu lwaanyi lwe bulafu.

²⁹Abe biseenge byamwo bye mukari, ni kusisiri kwe litikiiyi, ni buseenge bwe bulafu, abe buli shitweela nga bubuundi. Abe iliwo kamatirisa mu biseenge ibyo. Abe buuleeyi bwabyo buli tsifuuti kamakhumi shinaane na tsine (84), ni buubalaayi abe buli tsifuuti 42.

³⁰Abe iliwo biseenge bibibotokheleele kumukhoosi ukwo. Buleeyi abe buli tsifuuti 84, ni buubalaayi abe buli tsifuuti 42.

³¹Shiiseenge she khukhwingililamo abe shaaloleelela lulwaanyi lwe bulafu, nga khu biseenge khwe kumukhoosi baakhupakho bifwaani bye kuusaala kusheendu. Abe iliwo biniinilo shinaane byeesi uniina nio woola khu shilibwa isho.

³²Lwanyuma umusaani tsana waambila wantsolisa mu shilibwa she mukari, khu shilibwa she ibwaamanyaanga. Kila apima shilibwa isho. Wanyoola nga shilekhaana ni bibiramire byoosi.

³³Abe biseenge bye khu ndulo, ni kumusisiri kwe litikiiyi, ni kamatikiiyi ke mukari, kali shitweela busa ni neebyo bye mu mikhoosi kikiindi. Nga buuleeyi bwoosi buli tsifuuti 84 ni buubalaayi buli tsifuuti 42.

³⁴Shiseenge sheesi bengililamo abe shaloleelela mu lwaanyi lwe bulafu, nga khu biseenge khwe kumukhoosi baakhupakho bifwaani bye kuusaala kusheendu. Abe iliwo biniinilo shinaane byeesi uniina nio woola khu shilibwa isho.

³⁵Lwanyuma waambila khu shilibwa shishiili ingaaki, nasho waashipima. Abe nasho shilekhaana busa ni bibiindi.

³⁶Abe biseenge byamwo bye mukari, ni kusisiri kwe litikiiyi, ni buseenge bwe bulafu, abe buli shitweela nga bubuundi. Abe iliwo kamatirisa mu biseenge ibyo. Abe buuleeyi bwabyo buli tsifuuti 84, ni buubalaayi abe buli tsifuuti 42.

³⁷Shiseenge sheesi beengililamo abe shaaloleelela mu lwaanyi lwe bulafu, nga khu biseenge bye kumukhoosi baakhupakho bifwaani bye kuusaala kusheendu. Abe iliwo biniinilo shinaane byeesi uniina nio woola khu shilibwa isho.

³⁸Mu lwaanyi lwe bulafu, abe iliyo shiseenge sheesi boongelakho busa, nga shaayitiila khu luwaande lwe ngaaki lwe kumukhoosi kwe mukari. Abe kwiingila mu shiseenge sheesi bengililamo shishaloleelela luwaande lwe ngaaki. Abe abweene awo niwo isi basiingila tsinyama tsye biisolo byeesi baatsya khuwaanayo nga tsiisayilo.

³⁹Mu shiseenge she khukhwingililamo shino, abe mulimo tsimeetsa tsine, nga buli luwaande lwe shiseenge iliyo tsibili. Abe biisolo byeesi batsya khuwaanayo nga tsisaayilo, oba boosha yoosi namwe isaayilo irusawo bibyoonako, namwe iye khuuliha likobi, babiirira khu meetsa tsino.

⁴⁰Ibulafu we shiseenge isho abe niyo iliyo tsimeetsa tsine tsitsifwaana nga itsyo, nga khu buli luwaande lwe shilibwa shishiingila mu shilibwa she ingaaki, iliyo tsimeetsa tsibili.

⁴¹Atweela abe iliwo tsimeetsa shinaane abe khweesi basalila bisolo byeesi abe bawaanayo nga tsisaayilo: nga tsine tsili mu shiseenge mukari; tsine mu lwaanyi.

⁴²Tsimeetsa tsine abe tsitsiili mu khaseenge kheesi boongelakho busa, abe batsiraambisa khuŋoonaŋoona biwaanwa byeesi abe boosha busa bibuufu, abe batsikhootsa khukhwaama mu mabaale. Abe buuleeyi bwe khuuniina mu ngaaki buli tsi sentimita kamakhumi karaano, ne nga khu ngaaki abe buli luwaande lwoolisa tsi sentimita kamakhumi musaafu na tsiraano. Ibyo byoosi abe byeesi baraambisa mu khukhoonya bisolo, abe babibiikha khu meetsa itsyo.

⁴³Abe iliwo kimilobo kyeesi baarakho nga kyaayibotokhelela tsimeesa tsino. Tsinyama tsyoosi abe tsyeesi batsya khuwaanayo nga tsisaayilo, abe banyoowa khutsira khu meetsa tsino.

⁴⁴Lwanyuma umusaani tsana waambila mu lwaanyi lwe mukari. Indi indola naabona biseenge bibili nga kimilyaango kiyikula ni kitsya mu lwaanyi lwe mukari. Abe kumulyaango mutweela kwaloleelela khundulo kwe kumukhoosi kukwaama ingaaki, ne kukuundi nga kwaloleelela imwaalo andulo we kumukhoosi kwe mwaalo.

⁴⁵Kila anomela ari, shiseenge shishaloleelela imwaalo, shili she basaayi babaakaanisa mu Lisaayilo Liikhulu,

⁴⁶Waaloma ari ne shiseenge shishiloleelela luwaande lwe ingaaki, shili she basaayi babaakaanisa khu sheeso shikhosefu. Basaayi boosi abe bali be lisaaye lya Sadooki. Bali nibo bonyene khukhwaama mu shikuuka sha Levi, babaafukiilisibwa khuutsya mu moni tsy'Omukasya, bamwakaanisa.

⁴⁷Lwanyuma umusaani wapima lulwaanyi lwe mukari, waanyoola nga luleekhaana busa tsimbeka tsyoosi, nga buli luubeka lwoolisa buuleeyi tsifuuti 168. Abe Lisaayilo Liikhulu lili khu luwaande lwe ibukwanyaanga, nga ibweeni walyo iliyo shisheeso shiikhosefu.

⁴⁸Kila ambila antsolisa mu shiseenge she khukhwingililamo mu Lisaayilo Likhulu. Waapima amulyaango, wanyoola nga olisa tsifuuti sheenda khukhwiikha aasi, tsifuuti 24 mu bubalaayi, ni kumusisiri kwe litikiiyi khu buli luwaande nga lyoolisa tsifuuti 5.

⁴⁹Abe iliwo biniinilo bibiniina mu shiseenge she khukhwingililamo, nga shili tsifuuti 34 mu bubalaayi, ni tsifuuti 20 khukhwiikha aasi. Abe iliwo kimisiindi kibili, nga khu buli luwaande iliyo kutweela.