Read lumasaaba Ezekeli 41 Bible Online

Ezekeli 41 - lumasaaba bible

Ezekeli 41

¹Kila lwaanyuma ambila mu shiseenge she akari, shiifwo Shishifuurisa Buukhosefu. Waapima kumukhoosi kukwingilamo: abe kwoolisa tsifuuti 10 khukhwiikha aasi mwiiloba.

²Bubaalayi abe kuli tsifuuti 18, ni kumusisiri kwe litikiiyi khu buli luwaande abe kali tsifuuti 6. Waapima shiseenge shisheene, waanyoola nga shili tsifuuti 68 buuleeyi, khu fuuti 34 buubalaayi.

³Lwanyuma wengila mu shiseenge she mukari mubweene. Waapima kumukhoosi, waanyoola nga kuli tsifuuti 3 khukhwiikha aasi mwiiloba, khu fuuti 10 buubalaayi. Kumusisiri kwe kamatikiiyi khu buli luwaande abe kwoola tsifuuti 12.

⁴Ni aapima shiseenge shisheene, waanyoola nga buli luwaande luli tsifuuti 34. Shiseenge shino abe shili nga waamalile khuubira khu shiseenge she akari. Kila anomela ise ari, “Ishino nisho shiifwo shishiminyisayo buukhosefu.”

⁵Lwanyuma waapima litikiiyi lye Lisaayilo Liikhulu, waanyoola nga lili tsifuuti 10. Khu litikiiyi lino, ni khukhwibotokhelela Lisaayilo Likhulu, abe iliwo buseenge bufwiiti, nga buubalaayi bwabwo buli tsifuuti 7.

⁶Buseenge buno abe bwe tsinuungo tsitaru, nga buli inuungo ilikho buseenge kamakhumi kataru. Abe khu buli inuungo iye tsiintsu, litikiiyi lye Lisaayilo Liikhulu abe lili ni kumusisiri kumunyelele khuuminyisa aasi we litikiiyi. Nashiryo, baanyalisa khukhwombakha buseenge ubwo, nga sibwiimikha khu litikiiyi lye Lisaayilo Liikhulu ta.

⁷Ni nashiryo, abe waboone kamatikiiyi ke Lisaayilo Liikhulu khukhwaamila ibulafu, abe kabonekha nga kakaali ni busiro shitweela khukhwaamila aasi khukhwoolisa mu ngaaki. Abe iliyo biniinilo bibiili bibalaayi, nga baabyoombakha khu luwaande lwe bulafu we biseenge ibyo, nga byaayitiila ibulafu we litikiiyi lye Lisaayilo Liikhulu. Ni nashiryo, abe umuundu anyala khuuniinilakho khukhwaama khu nuungo indweela khuutsya khu kiindi.

⁸Abe Lisaayilo Liikhulu lyaayiikhala khu libaale liliili buuleeyi khukhwaama aasi tsifuuti 10, nga lino nilyo lilyaba kumusiingi kwe biseenge bye khubiikhamo bibiindu nabyo.

⁹Kusisiri kwe kamatikiiyi k'ebulafu ke biseenge ibyo abe kuli tsifuuti 8. Abe akari e biseenge ibyo mbaawo shishiindu shoosi ta.

¹⁰Abe bibyoombakhe bibiindi bibiili aambi bili tsifuuti kamakhumi kataru na tsine (34).

¹¹Kumulyaango mutweela abe kwingila mu biseenge bye khubiikhamo bibiindu, nga kuli khu luwaande lwe ngaaki lwe Lisaayilo Likhulu. Ni kumulyaango kukuundi abe kwingila mu biseenge bibiili luwaande lwe mwaalo. Abe kubaale kwe kumusiingi kutuumakho kwaarura ibulafu we biseenge ibyo tsifuuti 8.

¹²Isi abe shiifwo shishiili busa nga mbaamo shishiindu ta, khu luwaande lwe bukwanyaanga we Lisaayilo Liikhulu, abe iliyo shishoombakhe shishoolisa buuleeyi tsifuuti shitoondo shitweela ni kamakhumi karaano (150), ni buubalaayi tsifuuti shitoondo shitweela ni likhumi na tsisesaba (116). Abe kumusisiri kwe kamatikiiyi kuli tsifuuti 9 buusiro.

¹³Umusaani tsana waapima ibulafu we Lisaayilo Likhulu, waanyoola nga buuleeyi lili tsifuuti shitoondo shitweela ni kamakhumi kasesaba na shinaane (168). Ni khukhwaamila imukoongo we Lisaayilo Liikhulu, khuubirira mu shibaanga shishiikule busa, khuutsya khukhwoolisa khu luwaande lwe ibukwanyaanga, nga buuleeyi bwabwo buli tsifuuti shitoondo shitweela ni kamakhumi kasesaba (168).

¹⁴Buubalaayi abe bubuuli ibweeni we Lisaayilo Liikhulu, nga waatubaasilekho shiifwo shishiili busa khu buli luwaande, abe shoolisa tsifuuti shitoondo shitweela ni kamakhumi kasesaba na shinaane (168).

¹⁵Waapima buuleeyi bwe shishoombakhe khuulola luwaande lwe bwaamanyaanga, nga waatubaasilekho buseenge bwe khu ndulo, nga atweela bili tsifuuti shitoondo shitweela ni kamakhumi kasesaba na shinaane (168). Mukari mwe shiseenge she khukhwingililamo mu Lisaayilo Liikhulu, shiifwo shiikhosefu, ni shishiindi shishiminyisa buukhosefu,

¹⁶abe mwoosi bamiliisamo nga baraambisa tsimbaawo khukhwaama khu milyaango khukhwoolisa khu matilisa.

¹⁷Mukari mwe Lisaayilo Liikhulu, ni khuniinila ilala khukhwoolisa angaaki we kimilyaango, abe batiimbamo bifwaani bye

¹⁸kimisaala kimisheendu, ni bibuumbe bye tsindaaha. Abe babitiimba nga batsya baloondekhanisa buli shitweela khu shiindi, nga bayibotokhelesa shiseenge shoosi. Abe buli shibuumbe shili ni mu moni mwe kimiluundi kibili:

¹⁹mumufwaana nga mu moni mw'omuundu nga muno mwaloleelela isi shifwaani she kusheendu khu luwaande lutweela, ni mu moni mwe italanyi, nga mwaloleelela luwaande luluundi. Abe litikiiyi lyoosi lili liryo,

²⁰khukhwaamila aasi khukhwoolisa angaaki we kimilyaango.

²¹Bisiindi byeesi tsintsitsi tsiimikhamo bye mu Lisaayilo Liikhulu, abe byoosi bilekhana busa khu maande tsyoosi. Ibweeni we kumulyaango kukwiingila mu shifwo shishiminyisilayo ilala bukhosefu, abe iliyo shishiindu shishiifwaana nga

²²shisheeso she shisaala. Abe buuleeyi khuuniina mu ngaaki shili fuuti 5, ne buubalaayi abe shili fuuti 4. Abe tsisoonda tsyasho, ni sheesi shiikhalakho ni tsimaande tsyoosi abe babikhola mu bisaala. Kila umusaani tsana anomela ise ari, “Imeetsa yino ili niyo iyimikha mu moni mw'Omukasya.”

²³Abe iliyo lulwiitsi luwaande lweesi kumukhoosi kukuutsya mu shiifwo shikhosefu kwaakama, ni luluundi nalwo isi kumukhoosi kukuutsya mu shifwo shishiminyisilayo ilala bukhosefu nakwo kwaakama.

²⁴Abe kili kimilyaango kibili nga kiikula akari kyeela iyi ni neeyi.

²⁵Abe iliyo bifwaani bye kimisheendu ni bye bibuumbe bye tsindaaha khu milyaango kikingila mu shifwo shiikhosefu, atweela ni khu matikiiyi. Abe ibulafu we kumulyaango kukwingila mu shiseenge shishiitsya mukari, iliyo shibaawo shishabiimbayo.

²⁶Abe khu ndulo khwe shiseenge shino iliyo kamatirisa, nga kamatikiiyi kalikho bifwaani bye kuusaala kusheendu.