Read lumasaaba Ezekeli 43 Bible Online

Ezekeli 43 - lumasaaba bible

Ezekeli 43

¹Lwaanyuma umusaani tsana waambila khu shilibwa shishiloleleele ibukwanyaanga.

²Ise naabona buwaanga bwe shiriifwa sha Wele uwa Isiraeli nga bulikho bwiitsa khukhwaama ibwaamanyaanga. Liikono lya Wele abe lilikho lilookha nga liikono lye inyaantsa, ni shiibala nga shimulikha ni buwaanga buukali naabi.

³Khubonekhelwa khweesi ise nabona khuno khwaba nga ukhwo khweesi nabona nga Wele alikho etsa khukhwoonakisa Yerusalemu, ni khweesi ise nabona nga indi khu luutsi Kebari. Ise ni nabona shino, naakwa aasi mafuumala nebiimbilila mu moni.

⁴Buuwaanga bwe kamaani ubwo bwaabirira mu shilibwa she khu luwaande lwe ibwaamanyaanga bweengila mu Lisaayilo Liikhulu.

⁵Umwoyo uw'Omukasya waasuta ise waambila mu lwaanyi lwe mukari, isi naba naabona nga Lisaayilo Liikhulu lyetsuule shiriifwa sh'Omukasya.

⁶Umusaani tsana weemikha awo ni nase. Nio lwanyuma ise naawulila liikono ly'Omukasya nga linganikhayo isi ise khukhwaamila mu Lisaayilo Liikhulu mukari.

⁷Waaloma ari, “Umwaana w'omuundu, shino shili shiifwo she shitsoloŋo shase. Ise ikhaamenye ano akari mu ba Isiraeli imbe umuwuli waabwe khuumala biilo ni biilo. Babaandu ba Isiraeli, ikhaba ni bawuli baabwe, sibaliilakho luundi balekelese lisina lyase, nga besaaya ba wele babaandi, namwe basiikhe bayiinga baabwe nga barakho bye khushebulilakho ta.

⁸Bayiinga ba Isiraeli abe bombekhatsaka tsiintsu tsye khuumenyamo aambi ni Lisaayilo Liikhulu, nga akari waabwe ni nase iliwo kuutikiiyi. Khulwe isho bayiinga abo baatsya nga baamalamo ise shiriifwa, waakila khulwe liirima lyase liikali, ise nabeera.

⁹Ari babaandu bali ni khukhwaakamisa khukhwisaaya ba wele babaandi, barusewo kimilaambo kye bayiinga baabwe atweela bye khuushebulilakho bayiinga abo. Nio lwanyuma kane ise niitse imenye akari mu nibo biilo ni biilo.”

¹⁰Umukasya weeloosela waaloma ari: “Umwaana w'omuundu, boolela ba Isiraeli bibiwaamba khu Lisaayilo lyase Likhulu, naluundi bali ni khukhwimenielesa isaambo yeesi lyombakhebwamo. Baboolele uri bali ni khuswaala khuukali khu lwe bibyoonako byaabwe.

¹¹Nio lwanyuma nga baswaalile khulwe bibyoonako byaabwe, iwe basontsoole isaambo isi lyombashibwamo. Baboolele bibiliwaambakho byoosi, nga mulimo kimilyaango kye khukhwingilamo ni khuurura, isaambo yeesi lyabetsebwamo, ni kamakaambila kakaaliwaambakho. Iwe rona bibiindu bino byoosi, nio banyalise khubona buli shitweela nga ni shili buulayi, baryo baloondelele biilakilo ibyo byoosi.

¹²Lino lili nilyo likaambila lye Lisaayilo Likhulu: Shiifwo shoosi shishiilibotokheleele ni khu lukiingi khu ngaaki khwoosi khuli khuukhosefu.”

¹³Biipimo bye shisheeso nabyo bili ni khuukholebwa nga baraambisa shiipimo shishiipimile Lisaayilo Liikhulu. Khukhwibotokhelela aasi we shisheeso oosi abe iliyo kumukhuruuro kukuyila kameetsi nga kuli tsi sentimita kamakhumi karaano, buuleeyi khukhwiikha aasi, ni buubalaayi nabwo tsi sentimita kamakhumi karaano. Khuminwa khwasho abe khulikho sheesi baabowakho nga shili buuleeyi khuuniina mu ngaaki tsi sentimita kamakhumi kabili na tsiraano.

¹⁴Abe luwaande lutweela luli i mita ndweela buuleeyi. Luwaande luno abe lulikho aasikho khuuminyisakho luluundi lwoosi. Lwaatsya nga lwibotokhelela.

¹⁵She khu ngaaki abe khweesi booshela tsisaayilo, abe khuli buuleeyi tsi mita tsibili. Abe kamaru ke tsisoonda tsine kalikho angaaki khuuminyisa shisheeso shishiramire shoosi.

¹⁶She khu ngaaki she khu sheeso abe shilekhaana busa tsimbeka tsyoosi, nga buli luubeka luli tsi mita tsisesaba.

¹⁷Ni she akari nasho abe shilekhaana busa tsimbeka tsyoosi, nga buli luubeka luli tsi mita musaafu. Ni lupaanga lulwebotokhelela ibulafu nga luli tsi sentimita kabili na tsiraano khuuniina mu ngaaki. (Lukhweelele abe lwoolisa tsi sentimita kamakhumi karaano buubalaayi). Biniinilo bye khuutsya khu sheeso abe bili khu luubeka lwe bwaamanyaanga.

¹⁸Umukasya, umunyali uwa byoosi waanomela ari: “Umwaana w'omuundu, rekeeresa ise ikhuboolele. Nga baamalile khukhwombakha shisheeso, bali ni khuushiwa tsikhabi nga booshelakho tsisaayilo, ni khuusalaasakho kamalasile ke bibyaayo byeesi baakaanisileyo nga biwaanwa.

¹⁹Basaayi abo babaama mu lisaaye lya Levi, be muunda iya Zadoki, bonyene nibo babaali khukhwiitsa ibweeni wase babe babaakaanisi baase. Ise Umukasya, umunyali uwa byoosi samweene niye ulakiile bibiindu bino. Iwe uli ni khuubawa nibo iwuunwa ishiili inyana khuuwaanayo nga isaayilo irusawo bibyoonako.

²⁰Uli ni khuubukulakho kamalasile ukawakhe khu maru ke shisheeso, ni khu soonda tsye shishiili akari we shisheeso, ni khukhwibotokhelesa khu ndulo khwoosi. Mu saambo yino kane ube wapyeluusile shisheeso, naluundi ube washiweele tsiikhabi.

²¹Iwe uli ni khuubukula iwuunwa isi bakhaawaaneyo nga isaayilo iye bibyoonako, ukyookhele ibulafu we Lisaayilo Liikhulu, mu shifwo sheesi iwe uroboore.

²²Khu shifukhu shishiilakho, iwe uli ni khuubukula indurume ikhalikho buubi bwoosi ta, ukiwaaneyo nga isaayilo irusawo bibyoonako. Pyeluusa shisheeso ni kamafuki kaayo, musaambo niyo ndweela yeesi wakhola ni k'ewuunwa.

²³Nga iwe waamalile khuukhola isho, bukula iwuunwa ishiili inyana ni limiiku liilishiili lilyaana, nga byoombi sibilikho buubi bwoosi ta,

²⁴ubireere isi ise ndi. Basaayi bali ni khuubisalaasakho kumuunyu, babyooshe ni kumulilo bibe isaayilo isi ise.

²⁵Muli ni khuumala bifukhu musaafu nga muwaanayo tsisaayilo tsitsirusawo bibyoonako, nga nibyo bibiili: imbusi, n'ikhaafu, ni limiiku, nga tsisaayilo, khuumala biifukhu musaafu. Buli shitweela khu bino shili ni khuuba nga seshilikho ni buuleme bwoosi taawe.

²⁶Basaayi bali ni khuumala biifukhu musaafu nga bawa shisheeso tsiikhabi, nga bashirengekharengekha khuuraambisibwa.

²⁷Nga i sabiiti ndweela yaweelekho, basaayi bali ni khuurakikha khuuraambisa shisheeso khuuwaanayo tsisaayilo tsiintsoshe, ni bibireera butweela mu baandu. Shino kane shikile ise imbekhoyele inywe. Ise Umukasya Wele samweene niye ulomile bibiindu bino.”