Read lumasaaba Ezekeli 44 Bible Online

Ezekeli 44 - lumasaaba bible

Ezekeli 44

¹Lwanyuma umusaani tsana wantsisayo mu lwaanyi lwe ibulafu lwe Lisaayilo Likhulu, waambila khu shilibwa she ibukwanyaanga. Abe shilibwa shino shili shishikale.

²Kila Umukasya anomela ari: “Shiilibwa shino shili ni khuurama nga shishikale, bakhashiikulatsakawo ta. Mbaawo umuundu yeesi ufukiilisibwa khushiraambisa ta, khulwekhuuba ise Umukasya Wele uwa Isiraeli, naamalile khaale khushibiriramo. Shili ni khuurama nga shishikale.

³Umuyiinga wa Isiraeli yeenyene, niye unyala weetsayo khuuliila biilyo biikhosefu ibweeni wase. Ali ni khukhwingila naluundi arure nga araambisa kumukhoosi.”

⁴Lwanyuma umusaani tsana waambirisira mu shilibwa she ngaaki, khwaatsya iburaangisi we Lisaayilo. Ise ni nalola, naabona nga Lisaayilo ly'Omukasya lyetsuulemo buwaanga bw'Omukasya bwe kamaani. Ise nakwa aasi nefumalikha.

⁵Kila Umukasya anomela ari: “Umwaana uw'omuundu, yimenielesa bibiindu byoosi byeesi utsya khuwulila, naluundi utsya khubona. Ise ndi khutsya khukhuboolela iwe kamakaambila, ni biilakilo bibiwaamba khu Lisaayilo. Yimenielesa buulayi umaanye babaandu babafukiilisibwa khukhwingila mu Lisaayilo, ni naabo babaakhafukiilisibwa ta.

⁶“Boolela banabumiinyi ba Isiraeli abo uri, ise Umukasya Wele, singane niilosele khukhwikhalilikha bibiindu bye bunyaalu byeesi babeele nga bakhola ta.

⁷Nibo bakhola bye mbikho khu Lisaayilo lyase, ni baba nga balekha babeetswa babaakhengila imbalu ta, khukhwingila mu Lisaayilo. Babaandu abo sibaloondelela byeesi ise inoma ta.

⁸Sibakhola bibiindu bye mu Lisaayilo nga kimisilo kye Lisaayilo ni kikana ta, akhali indi nibo baarakho banaambo khuukhola bibiindu ibyo.

⁹“Ise, Umukasya Wele, indikho ikhalawo indi mbaawo umuundu umwiitswa ukhengila imbalu, ni naabo babaakhaloondelela byeesi ise inoma, khukhwingila mu Lisaayilo lyase ta. Abe ikhaba umwiitswa umenya ni nanywe mu Isiraeli s'afukiilisibwa ta.”

¹⁰Umukasya waanomela ari: “Ise ndi khuutsya khuuwa ba Levi shitaambiso, khulwekhuuba nibo betubaasa khu baandu babaandi be mu Isiraeli, baryo baandura khuusi ise, baatsya besaaya bifwaani.

¹¹Banyala baaba bakaanisi mu Lisaayilo nga bekalawo ni khukhwikulawo biilibwa, ni buraambi bubuundi. Banyala bakhoonya bisolo byeesi babaandi bareera khuwaanayo nga tsisaayilo tsintsoshe, ni khubawo khukhwakaanisa babaandu.

¹²Ne khulwekhuuba nibo baraangirira babaandu ba Isiraeli mu khwisaaya bifwaani, nashiryo baakila babaandu baakhola bye bubwoonaki, ise Umukasya Wele, nitsuba indi bali ni khufuna shitaambiso.

¹³Sibali ni khukhwiitsa aambi ni nase, khukhuuntsakaanisa ise nga basaayi ta. Namwe sibeetsakho aambi ni biindu byaase biikhosefu ta. Bali ni khuurama ni khuswaala khwaabwe khulwe bunyaalu bweesi babeene baakhola.”

¹⁴Ise ndi khubawa nibo liikatala lye khuukhola buuraambi bwa busheele busa mu Lisaayilo.

¹⁵Umukasya Wele alikho aloma ari: “Ne basaayi abo be mu lisaaye lya Levi, nga bali be muunda iya Sadooki, bali ni khukhwiloosela khukhwakaanisa mu Lisaayilo. Khulwekhuuba nga babaandu boosi ni bandekha ise baatsya, nibo baaramawo. Ni nashiryo ari nibo babaali ni khukhuuntsakaanisa ise.

¹⁶Nibo bonyene babaali ni khukhwingila mu Lisaayilo lyase, bakhole bibiikanibwa khu sheeso shase, naluundi bakhole ibyo byoosi bibiwaambakana ni khukhwisaaya khwe mu Lisaayilo.

¹⁷Nga batsya khukhwingila mu mukhoosi kwe mulwaanyi lwe mukari kwe Lisaayilo, bali ni khukwaara bikwaaro bibyarerera busa. Bakhakwaarakho bikwaaro byeesi baakhola khukhwaama mu bwooya bwe kamasheese, nga balikho bakhola buraambi bwoosi mu lwaanyi lwe mukari lwe Lisaayilo ta.

¹⁸Ikhaba bitaambaala bye khu murwe ni bikwaaro bye mukari bili ni khuuba bibyarerera busa, nio balekhe khukyesemulila ta. Bakhebowa shishiindu shoosi mu shikuute shishikila bakesemulila ta.

¹⁹Nga bashiili khutsya ibulafu isi babaandu bali ta, bali ni khunyoowa beyabulemo bikwaaro byeesi abe bakwaarire nga bali khukhwakaanisa mu Lisaayilo, babilekhe mu biseenge biikhosefu. Bali ni khukwaarirakho bikwaaro bibiindi khu ngaaki nio babaandu balekhe khuwaamba khu bikwaaro byaabwe ta.

²⁰“Basaayi bakhabekakho litsuune lyaabwe ta, ne sibali ni khuulekha lyaleeha naabi ta. Bali ni khulikhalakho libe liliimbi.

²¹Basaayi bakhanywakho iviini yoosi nga bali khuutsya khukhwingila mu lwaanyi lwe mukari ta.

²²Umusaayi s'afukiilisibwa khuyila umukhasi uwakhwaalikhakho baamuloba ta. Ali ni khuyila umukhaana umu Isiraeli indungubaasi, namwe namulekhwa uw'omusaayi washeewe.

²³“Basaayi bali ni khuuleekela babaandu baase, lulwaakha luluuli akari e bibiindu bibiili bikhosefu, ni n'ebyo bibikhali biikhosefu ta. Naluundi ibyo bibiili bye mbikho, ni biikhali bye imbikho ta.

²⁴Nga kumusaango kwakwiilewo, basaayi bali ni khuukhalawo khuuloondekhana ni kamakaambila. Bali ni khuuloondelela biifukhu bye kamayiiya biikhulu, naluundi bali ni khuukhola bye khu shifukhu sha Sabato.

²⁵“Umusaayi nga wawaambile khu mulaambo kw'omuundu, iyo iba imbikho, nashiryo aba wekyelile umunyaalu. Akhali nga kumulaambo kwa paapa weewe, namwe maayi weewe, namwe umwaana weewe umweene, namwe kwa wandaaye umweene umusaani, namwe kw'omukooko weewe ukhakhwaalikha ta.

²⁶Nga umusaayi waamalile khukhwipyeluusa, ali ni khuliindakho khuumala biifukhu musaafu,

²⁷nio lwanyuma atsye mu lwaanyi lwe mukari lwe Lisaayilo, awaaneyo isaayilo iye khukhwipyeluusa. Shino shimunyalisa khukhwilayo khukhwakaanisa mu lisaayilo luundi. Ise Umukasya Wele, niye ukanikhile bibiindu bino.

²⁸“Basaayi bali ni busaayi bwaabwe, nga kumukabo kweesi ise nabawa nibo khu kweesi ise nawa ba Isiraeli, bweesi nabo bali ni khusikhila babaana baabwe. Sibali ni khuuba ni bye bibiindu bibyaabwe khu bwaabwe mu Isiraeli ta; ise ndi niye bibiindu byeesi bali ni nabyo.

²⁹Biilyo bye basaayi bikhaabe byaama mu: biwaanwa bye bilimwa bibulungule, tsisaayilo tsitsinyusawo bibyoonako, ni biwaanwa bye khuliiha. Nibo bali ni khufuna isho shoosi isho shishiitsa isi ise khukhwaama mu Isiraeli.

³⁰Basaayi bali ni khuweebwa khwibyo bibifuurisa buulayi, khukhwaama khu bye likyesa liikiboole khukhwaama mu likyesa, ni khukhwaama khu buli shitweela sheesi baba bandereere ise.

³¹Basaayi sibakhiile khuulya khanywiinywi, namwe inyama iye khaasolo khakhaafwiile khonyene busa ta, namwe isho sheesi isolo ikiindi yiirire ta.”