Read lumasaaba Ezekeli 45 Bible Online

Ezekeli 45 - lumasaaba bible

Ezekeli 45

¹Umukasya waaloma ari: “Nga bakabananisamo liiloba, bari nio buli shikuuka shiyile kumukabo kwasho, shisiintsa shitweela bali ni khuushiwaanayo isi Umukasya. Lilyeene ilyo lili ni khuuba buuleeyi tsikilomita 12.5 buuleeyi, ne tsikilomita 10 buubalaayi.

²Mu shisiintsa muno, muli ni khuubamo liiloba lililekhaana busa tsimbeka tsyoositsana, nga khubweene ukhwo nikhwo khweesi bali ni khukhwombakha Lisaayilo. Ili ni khuubayo shifwo shishiili busa nga shebotokheleele Lisaayilo, nga shoolisa tsifuuti 84.

³Bali ni khuupimakho liiloba ilyo nio mubweene umwo boombekhemo Lisaayilo, nga nisho shifwo shishifuurisa buukhosefu.

⁴Isho shikhaabe shiifwo shishiili shikhosefu mu linaambo lyoosi, nga bashilekhela basaayi bonyene. Tsiintsu tsye basaayi tsikhaabe mubweene umwo.

⁵Shisiintsa shishiramire bali ni khuushiwa ba Lefi, nga bano bali nibo babaraamba mu Lisaayilo.

⁶“Nga waamile khu shifwo shishiminyisa bukhosefu, bali ni khuulekhawo liloba liliindi khweesi bali ni khukhwombekha shiriimba. Umuundu yeesi uwe mu Isiraeli nga waakanile, anyala waamenya mu shiriimba isho.”

⁷Umukasya waaloma luundi ari, “Bali ni khuulekhakho liiloba nga lili ly'omuyiinga uuli mu buwuli imbuka iyo. Lyaamila khu Lisaayilo, khu luubeka lwe ibukwanyaanga, lyaatsya lyoolela ilala khu nyaantsa Meditereniyani. Buuleeyi bwalyo buli ni khuulekhaana ni buuleeyi bwe liiloba lyeesi baawa shikuuka shitweela she mu Isiraeli.

⁸Shisiintsa shino shikhaabe nisho kumukabo kw'omuyiinga khukhwaama mu Isiraeli, nio alekhe khumiinikhilisa babaandu ta.”

⁹Umukasya Wele alikho aloma ari: “Baawuli ba Isiraeli inywe mwaamalile imbuka ngali nga mukhola bibyoonako. Yaakamisa bisayuumba byeenywe ni khumiinikhilisa. Ni mukhole ibyo bye bwa ŋali. Mukhatimisa babaandu mwaabarusa mu liloba lyaabwe ta. Ise Umukasya Wele niye ulomile bibiindu bino.

¹⁰“Buli mutweela ali ni khuuraambisa shipimo she bwaŋali.

¹¹Biipimo bye biilyo biwuule ni bibiindi bili ni khuuba bya ŋali, nga Umukasya n'alakila.

¹²Byeesi muraambisa mu khupiima bili ni khuuloondekhana ni neebyo byeesi Umukasya alakila.

¹³“Biwaanwa muli ni khuubipiima mu saambo yino: Iŋaano: 1/60 khu bye liikesa Bali: 1/60 khu bye liikesa kamafura ka oliva: 1/100 khu byeesi kureerekho bibyaamo.

¹⁶“Babaandu be mu Isiraeli boosi bali ni khuuyila biwaanwa bino isi umuyiinga waabwe.

¹⁷Kuli kumulimo kw'omuyiinga khuuwaanayo bibyaayo byeesi bali ni khukhwoosha busa nga bili biilamu, ni bye biilimwa bibulungule, n'iviini. Bino liinaambo lili ni khuubiraambisa khu mayiiya ke kumweesi kumushaakha, khu Sabato, ni khu mayiiya kakaandi.”

¹⁸Umukasya Wele waaloma ari: “Khu shifukhu shishinyoowa she kumweesi kukuunyoowa, muli ni khuuwaanayo isaayilo iye iwuunwa ikhalikho buubi bwoosi ta, khulwe khuupyeluusa Lisaayilo.

¹⁹Umusaayi ali ni khuubukulakho khu malasile ke isaayilo iye khukhwiyakhila bibyoonako, awakhe khu bisiindi bye kumulyaango kwe Lisaayilo, ni khu soonda tsyoosi tsine tsye shisheeso, ni khu bisiindi bye kimikhoosi kye mu lwaanyi lwe mukari.

²⁰Khu shifukhu she kumusaafu she kumweesi nyene ukwo, muli ni khuukhola shishiindu nisho shitweela, nga mushikhola mu lisina lye babaandu boosi babaakhola bibyoonako nga sibashitsiililila ta. Mu saambo yino kane Lisaayilo lirame nga lili likhoosefu.

²¹“Khu shifukhu shishikhola liikhumi na bine she kumweesi kumukiboole, muli ni khuurakikha kamayiiya ke Khuubirakho. Buli muundu ali ni khuulya kimikaati kikikhalimo kamamela ta khuumala biifukhu musaafu.

²²Khu shifukhu shishinyoowa she kamayiiya ako, umuyiinga uliwo khu mbuka iyo, ali ni khuuwaanayo iwuunwa, nga isaayilo iye bibyoonako byeewe ni bye babaandu boosi.

²³Khuumala biifukhu musaafu, khu buli shiifukhu ali ni khuuwaanayo isaayilo isi Umukasya, tsiwuunwa musaafu, ni kamamiiku musaafu nako, nga bino byoosi mbaawo shishiilikho buubi bwoosi ta. Naluundi khu buli shiifukhu ali ni khuuwaanayo isaayilo iy'embusi indurume, nga yino ili isaayilo iye khurusawo bibyoonako.

²⁴Buli lweesi bawaanayo iwuunwa namwe limiiku nga isaayilo, bali ni khuureererakho shipimo she biilyo bibulungule ni kamafura ke ku olivu.

²⁵“Kamayiiya ke Kamasari kananikha khu shifukhu she likhumi na biraano mu mweesi kwe kumusaafu. Khu mayiiya ako, umuyiinga ali ni khuuwaanayo tsisaayilo nitsyo ndweela, khuumala biifukhu musaafu.”