Read lumasaaba Ezekeli 46 Bible Online

Ezekeli 46 - lumasaaba bible

Ezekeli 46

¹Umukasya aloma ari: “Khuumala biifukhu biseesaba bye khuukholelakho buraambi, kumukhoosi kwe mu lwaanyi lwe mukari kuli ni khuurama nga kumwikale. Ne bali ni khukwikulawo khu Sabato ni khu mayiiya ke Kumweesi kumushaakha.

²Umuyiinga ali ni khukhwingila mu lwaanyi mukari, atsye emikhe andulo we kusiindi nga basaayi balikho boosha tsisaayilo. Ali ni khukhwiimikha aambi ni shilibwa esaaye, lwanyuma eleyo ingo weewe.

³Khu buli khu shifukhu sha Sabato, ni khu mayiiya ke kumweesi kumushaakha, babaandu boosi bali ni khukhwinamisa kimirwe kyaabwe aasi, besaaye Umukasya, nga beemikhile iburaangisi we shiilibwa.

⁴Khu shifukhu sabato, umuyiinga ali ni khuureera kamasheese kamaana kaseesaba, ni limiiku litweela, nga byoosi sibilikho buubi bwoosi ta. Bino bali ni khuubiraambisa nga tsisaayilo tsyeesi boosha tsimbuufu busa.

⁵Khu buli limiiku, ali ni khuureererakho shipimo she biilyo bibulungule, ni khu buli lisheese lilyaana ali ni khuureererakho isho shoosi sheesi akana.

⁶Khu mayiiya ke Kumweesi kumushaakha, ali ni khuuwaanayo iwuunwa inyana, kamasheese kamaana kaseesaba, ni limiiku litweela, nga bino byoosi sibilikho ni buubi bwoosi ta.

⁷Khu buli iwuunwa ni khu buli limiiku, ali ni khuureererakho shipimo she biilyo biibulungule. Ne khu buli lisheese lilyaana areererakho sheesi unweene akana.

⁸Umuyiinga ali ni khuurura khukhwaama mu shiseenge she khukhwingilamo mu mukhoosi, musaambo niyo indweela isi engiilemo.

⁹“Nga babaandu beetsile khukhwisaaya Umukasya khu mayiiya koosi, abo babengilila mu shilibwa shishiili ingaaki, bali ni khuurura nga baraambisa she imwaalo, nga baamalile khukhwisaaya. Ni babengiliile ingaaki nabo baryo. Mbaawo umuundu khururira mu shilibwa nisho shitweela sheesi etsiilemo ta.

¹⁰Umuyiinga ali ni khukhwitsila atweela ni babaandu, naluundi arurire atweela ni nabo.

¹¹Khu bifukhu bye kamayiiya, biwaanwa bye biilyo bibulungule bili ni khuuba shisiintsa she shipimo, khu buli limiiku namwe iwuunwa isi bawaanayo.

¹²“Nga umuyiinga alikho akana khuwaanayo shiwaanwa khu bweewe busa, bali ni khuumwikulilawo shiilibwa she bwaamanyaanga she mu lwaanyi lwe mukari. Ali ni khuuwaanayo isaayilo mu saambo niyo indweela yeesi awaanayo tsisaayilo khu Sabato. Lwanyuma bali ni khukhwikalawo shiilibwa isho.”

¹³Umukasya alikho aloma ari: “Buli kumutishinyi bali ni khuuwaanayo khasheese khakhaana khakhoolisa kumwiiko mutweela, nga sikhalikho buubi bwoositsana ta. Khano bali ni khuukhoosha busa khoositsana.

¹⁴Naluundi buli kumutikhinyi bali ni khuureera buufu. Biilakilo bibiwaamba khu saayilo tsino bili ni khuubatsakawo biilo ni biilo.

¹⁵Khasheese khakhashiili khakhaana, buufu, ni kamafura, bali ni khuubiwaanayo isi Umukasya, buli kumutikhinyi, biilo ni biilo.”

¹⁶Umukasya Wele alikho alakila ari: “N'iiba bari umuyiinga waweele umwaana weewe umusoleeli liiswa nga shiwaanwa busa, lili ni khuuba ly'omwaana uyo nga shitweela khu biindu bye ango awo.

¹⁷Ne umuyiinga nga waweele liiloba isi mutweela khu bakaanisi beewe, liba indi likhakelewo likoboleyo mu makhono keewe, mu mwiiko kwe khusikula bibiindu.

¹⁸Umuyiinga s'ali ni khunuula bibiindu bye babaandu beewe ta. Liiloba lyeesi ali ni khuuwa umwaana weewe lili ni khuuba khukhwaama khwiilyo liliili lilyeewe.”

¹⁹Lwanyuma umusaani tsana waambila mu mulyaango kwe biseenge bibiloleleele aambi ni shilibwa she mwaalo, shishiili mu lwaanyi lwe mukari. Biseenge bino bili bikhosefu, nga bili bye basaayi. Kila okesanisa kumukhono kweewe khu luwaande lwe bukwanyaanga,

²⁰waaloma ari, “Ano niwo isi basaayi bali ni khuuteekhelawo tsiinyama tseesi babaandu baareera nga tsisaayilo. Mbaawo sheesi bali ni khuurusakho mu lwaanyi lwe ibulafu ta.”

²¹Khwaakobolayo mu lwaanyi lwe bulafu, nga khubira khu soonda tsana tsine.

²²Khu buli isoonda ise nabona nga iliyo lulwaanyi luluundi lukeekhe, nga buuleeyi luli tsifuuti 68, ni buubalaayi buli tsifuuti 48.

²³Abe buli lulubira luli ni litikiiyi lye kamabaale, nga lyaalwibotokhelela. Abe baayombekhaka kamayika khu litikiiyi ilyo.

²⁴Lwanyuma umusaani tsana waamboolela ari: “Kano kali niko kamafuumbilo mweesi basaayi be mu Lisaayilo Liikhulu bali ni khuuteekhela tsisaayilo tsyeesi babaandu bawaanayo.”