Read lumasaaba Ezekeli 47 Bible Online

Ezekeli 47 - lumasaaba bible

Ezekeli 47

¹Umusaani tsana waanangirira waantsisayo mu shilibwa she Lisaayilo. Abe iliwo kameetsi kakaali khukhwaamila aasi we khukhwingililakho mu Lisaayilo, nga katima keekha ibwaamanyaanga, nga ilwo nilwo luwaande lweesi abe Lisaayilo lyalolelela. Abe katima nga kaama aasi we mu shisiintsa she mwaalo we Lisaayilo, nga kabirira khu luubeka lwe imwaalo we shisheeso.

²Kila ambila khuurura abe isi Lisaayilo lili, nga khuraambisa shiilibwa she ngaaki, khwaatsya khwoolisa khu shilibwa shishiloleleele ibwaamanyaanga. Abe iliyo khakheetsi khakhaalikho kheekha nga khaamila khu luwaande lwe shiilibwa she mwaalo.

³Umusaani tsana waabukula luukhoba lweewe, waloondelela nga luluutsi ni lwiikha khu luwaande lwe ibwaamanyaanga, waapimakho tsimita bitoondo biraano (500). Kila anomela ise khuukhalisa luluutsi lweesi apimile. Kameetsi kaantsola ise mu senyenjele.

⁴Waapimakho luundi tsimita 500, kameetsi kaniina kantsola ise mu meesikamo. Waapimakho tsitsiindi 500, aluno kameetsi kantsola mu shikuute.

⁵Waapimakho kakaandi tsimita 500. Aluno kaaba nga kali luluutsi lwe kamaani, nga ise shiinyala naakhalisa ta. Abe kali kamaleeyi naabi nga mbaawo isaambo iye khuukhalisa ta, akhali khuusuba.

⁶Waanomela ari: “Umwaana w'omuundu, uli ni khukhwimenielesa bibiindu bino buulayi naabi.” Lwanyuma waantsisayo khu ndulo khwe luluutsi.

⁷Nga ise ni noola iyo, naabona nga iliyo kimisaala kimikali naabi khu buli luwaande lwe luluutsi.

⁸Umusaani waanomela ari: “Kameetsi kano katima kabirira mu shibala keekha ibwaamanyaanga, khukhwoolisa mu litila lye Yoludaani, ni mu nyaantsa Dedi Si. Nga koolile mu Dedi Si, kashuusa kameetsi ke kumuunyu kakaalimo, keekyela kameetsi kamalayi ke khuunywa.

⁹Buli isi kameetsi kano kabira oosi, kane ibeyo bisolo bya buli shikuuka, ni tsinyeeni tsya buli shikuuka. Kameetsi ako kaŋoona kameetsi ke mu Dedi Si, na buli isi katsya, kareera buulamu.

¹⁰Khukhwaamila khu sebele iye Engedi, ni khukhwiikhila ilala khu sebele iye Enegilamu, babaandu babawaamba tsinyeeni bakheyantse khu ndulo, nga bawaamba tsinyeeni. Ikhaabeyo bikuuka biikali naabi.

¹¹Ne kameetsi kakaali khu ndulo ni mu makhalaamba kakhaarame nga ni kali, kabe nga nimwo mweesi babaandu baamisa kumuunyu.

¹²Bisaala bya buli shikuuka bikhaatsowe khu ndulo khwe luluutsi luno, nga khulikho ni bye khuulya. Kamasaafu kaabyo sikakhaalakale ta, naluundi bikhaabekho bye khuulya buli imbuka. Bikhaabekho bibyaamo byakhwo buli kumweesi. Bisaala bino bikhaamekho bye khuulya, ni kamasaafu kaabyo bakaraambise nga kamasuuswa mu khuwonesa babaandu.”

¹³Umukasya Wele waaloma ari: “Luno luli nilwo lulwaakha lwe liiswa lyeesi bali ni khuukabananisamo isi ba Isiraeli. Shikuuka sha Yusufu shili ni khuufuna kimikabo kibili.

¹⁴Ise namala khaale khukhwitsubila bakuuka beenywe indi ikhaabawe liiswa lino. Nashiryo ari likabananisemo mu buulayi.

¹⁵“Lulwaakha lwe ngaaki lutima lwaalola ibwaamanyaanga, khukhwaamila khu Nyaantsa Meditereniyani, khukhwoolisa khu shiriimba Hesiloni, i Hamasi, lwaatsya mu shiriimba she Zedadi.

¹⁶Lutsya khukhwoola mu biriimba Berosa ni Siburayimu, ni Tikoni.

¹⁷Nashiryo lulwaakha lwe ngaaki lutima khukhwaamila khu Nyaantsa Meditereniyani, lwaatsya ibwaamanyaanga mu shiriimba she Enoni, nga lwitiila khu Damasiko ni Hamasi, bibiili ingaaki walwo.

¹⁸“Lulwaakha khu luwaande lwe ibwaamanyaanga, lutima lweekha khukhwaamila akari a Damasiko ni Havurani, nga luluutsi Yoludaani nilwo luluuli akari a Isiraeli ni Gileyadi.

¹⁹“Lulwaakha khu luwaande lwe mwaalo, lutima lwaatsya khukhwaamila i Tamari, lwoola khu sebele iye Kadesi Meriba, nio lwaalola kwe ngaakikho, nga lwitiila khu Misiri ni Meditereniyani Si.

²⁰“Lulwaakha lwe bukwanyaanga lubirira khu Nyaantsa Meditereniyani, lwaalola kwe ingaaki lwoola khu Hamasi.

²¹“Ni nashiryo, iwe uli ni khuukabananisamo liiswa lino isi bikuuka bye ba Isiraeli.

²²Lino likhaabe nilyo buusikha bwaabwe biilo ni biilo. Babeetswa ni babaana baabwe babaamenya mu bweenemwo, nabo bali ni khuufunakho liiswa ilyo. Bali ni khuuyilibwa nga ba Isiraeli babeene, nga mwoolile khukabananisamo liiswa.

²³Babeetswa bafuna kumukabo khuuloondekhana ni shikuuka sheesi balikho bamenyamo mu mbuka iyo. Ise Umukasya Wele, niye uulomile bibiindu bino.”