Read lumasaaba Ezekeli 48 Bible Online

Ezekeli 48 - lumasaaba bible

Ezekeli 48

¹Lulwaakha lwe ingaaki lutima khukhwaamila khu Meditereniyani ibwaamanyaanga khukhwoolisa khu Hesiloni, Hamasi, ni Enoni, khukhwoolisa khu buyiinga bwa Damasiko ni Hamasi. Buli shikuuka shili ni khuufunakho kumukabo khu liloba lilitima khukhwaama ibwaamanyaanga, khulola kwe Meditereniyani Si, mu saambo yino, khukhwaamila ingaaki khukhwiikha imwaalo: Dani Asheri Nafutali Manase Efurayimu Rewubeni Yuda

⁸Shisiintsa shishiilakho bali ni khuushilekha buraawa khulwekhuuba shilikho buraambi bweesi shili ni khuweebwa. Shili ni khuuba tsikilomita 12.5 buubalaayi, khukhwaama imwaalo khukhwoolisa ingaaki, khukhwaama i bwaamanyaanga khukhwoola i bukwanyaanga. Lisaayilo likhaabe mu bweene muno.

⁹Shiifwo shishiili akari e liloba ilyo, shili shishase. Shikhaabe nga shoolisa tsikilomita 12.5 buuleeyi, khu kilomita 10 buubalaayi.

¹⁰Basaayi bali ni khuuba ni kumukabo mu shisiintsa shino. Khuuniina lubeka lwe ngaaki kutsya khuba tsikilomita 12.5; lubeka lwe bukwanyaanga kutsya khuba tsikilomita 12.5; lwe bwaamanyaanga kutsya khuba tsikilomita 12.5; ni khu lubeka lwe mwaalo kutsya khuba kimikaanda kibili ni bikana biraano (25,000). Shiifwo she khukhwisaayilamwo Umukasya shili ni khuuba akari e shiifwo shino.

¹¹Basooleli ba Zadoki nibo babaakhaabe basaayi baarobore babaatsukhibwakho kamafura, lwekhuuba nibo baalindatsaka buulayi biilakilo byase. Nibo sibaaborokhakho nakhakyeekhe ta, abe yakhaba nga babaandu ba Levi atweela ni Isiraeli boosi ni baaborokha baatsya mu ntsila tsitsiindi busa.

¹²Ni nashiryo bali ni khuuba ni kumukabo kwa buraawa nga kukoboolela khu kwe ba Levi. Kumukabo kwe basaayi kukhaabe nga nikwo kukuminyisa khuuba kumukhosefu naabi.

¹³Ba Levi bali ni khuuba ni kumukabo nga kuli imwaalo we kumukabo kwe basaayi.

¹⁴Kumukabo kukuweebwa Umukasya, kuba nikwo kukufuurisa buulayi mu shibala shoosi. Mbaawo lilikulisibwakho, namwe lyaapatilisibwamo, namwe lyaaweebwa umuundu ukuundi ta. Lili liikhosefu, naluundi lili ly'Omukasya.

¹⁵Shisiintsa shishiramire seshili shikhosefu ta, naluundi shili ni khuuraambisibwa ni babaandu boosi. Banyala khuumenyamo baraambisa liiloba ilyo. Shiriimba shili ni khuuba akari e liiloba ilyo.

¹⁶Shiriimba shili ni khuuba ni tsimaande tsitsilekhaana, nga buli luubeka lwoolisa tsikilomita tsibili buuleeyi.

¹⁷Ili ni khuubayo liiswa liliili busa nga lyebotokheleele shiriimba, nga lyoolisa tsimita 125.

¹⁸Liiswa liliili ibwaamanyaanga ni ibukwanyaanga we shiriimba, lili lyeesi babaandu banyala khuulimilamo.

¹⁹Babaandu babaamenya mu shiriimba nibo babaali ni khuulima kimikuunda ikyo, nga mbaawo khuuromboosa shikuuka ta.

²⁰Nashiryo akari e shisiintsa sha buraawa shino, ali shisiintsa shishase, ni khuurawo shiriimba, ni byeesi shikoomba. Lili ni khuuba nga lilekhaana busa khu buli luwaande.

²¹Lwe ibwaamanyaanga ni ibukwanyaanga we liiloba lino liliilikho Lisaayilo, liloba ilyo liba lye basaayi, ni ba Levi, ni shiriimba. Liliramire liba ly'omuyiinga. Litsya khukhwoola khu Meditereniyani Si, nga ingaaki iliyo kumukabo kwa Yuda, ne ibikyele iliyo kumukabo kwa Benyamini.

²³Imwaalo we shisiintsa sha buraawa shino, buli shikuuka shishiramire shili ni khufunakho kumukuunda, khukhwaamila ibwaamanyaanga, khuulola kwe Meditereniyani Si, mu saambo yino: Benyamini Simeyoni Isakaari Zebuluni Gadi

²⁸Imwaalo we shisiintsa sheesi bakhaawe shikuuka sha Gadi, lulwaakha lwamila i Tamari, lwaatsya lwoola i Kadesi, khu sebele iye mu mubiimbi, lweloosela kwe bukwanyaanga khu Misiri, ni khu Meditereniyani Si.

²⁹Umukasya Wele waaloma ari: “Liiloba lili ni khuukabananisibwamo isi bikuuka bya Isiraeli mu saambo iyo.”

³⁰Ili ni khuubayo biilibwa liikhumi na bibili bibiingila mu Yerusalemu. Shiriimba shili ni khuuba ni kamatikiiyi kane, nga buli lititikiiyi lilikho bilibwa bitaru, nga buuleeyi bwa buli litikiiyi bwoolisa tsimita bikana bibili ni bitoondo bibili, ni kamakhumi karaano (2,250). Ili ni khuubayo biilibwa bitaru khu buli luwaande, nga buli shilibwa shitwikhibwa lisina lye shikuuka sha Isiraeli. Biilibwa bye ngaaki bili ni khuutwiikhibwa bikuuka bino: sha Rewubeni, sha Yuda, ni sha Levi. Bye ibwaamanyaanga bili ni khuutwiikhibwa bikuuka bino: Yusufu, Benyamini, ni Dani. Bye mwaalo bili ni khuutwiikhibwa bikuuka bino: Simeyoni, Isakaari, ni Zebuluni. Bye ibukwanyaanga bili ni khuutwiikhibwa bikuuka bino: Gadi, Asheri, ni Nafutali.

³⁵Ni nashiryo, buuleeyi bwoosi bwe kutikiiyi buli ni khuuba tsikilomita 10. Lisina lishaakha lye shiriimba kane ari libe bari, “Umukasya ali awo.”