Read lumasaaba Ezekeli 5 Bible Online

Ezekeli 5 - lumasaaba bible

Ezekeli 5

¹Umukasya waanomela ise ari, “Mwaana w'omuundu, bukula luurima lulwooki uluraambise khuubekakho liitsuune lyoowo lyoosi, ni bunwaanwa bwoowo bwoosi. Lwanyuma uraambise shipimo khulipima, ulikabananisemo bisiintsa bitaru.

²Nga khukhwibuula khwe khukhwibwakala shiriimba khwaweelekho, raambisa kumulilo khukhwoosha shisiintsa shitweela she khaataru. Shisiintsa shishiindi shishikhola khataru, shiwaambe ukyeende ni nasho wibotokhelele ibulafu we shiriimba, nga ushikhalakakamo ni luurima. Shisiintsa shishiiramire shiwaambe ushisalaase mu mbewo, ise samweene kane ishiloondekho nga ishitimisa ni luurima lwase.

³Ramisakho butsuune bukyeekhe buri, ububowe mu likemo lye bikwaaro byoowo.

⁴Lwanyuma ubukulekho bukyeekhe buri luundi, ubutuume mu mulilo, ubulekhe bushe buwewo. Khukhwaama khubweene ubwo, kumulilo kukhaasalanile mu linaambo lya Isiraeli lyoosi.”

⁵Umukasya Wele, weloosela waaloma ari, “Shino nisho shiriimba Yerusalemu. Ise nashireere akari e kamanaambo koosi, kamanaambo ke khu shibala koosi kaashibotookheleele nisho.

⁶Ne babaandu be mu Yerusalemu bali banabumiinyi isi kamakaambila kaase, naluundi baayokesanisa bye bubwoonaki bye angaaki naabi khuuminyisakho kamanaambo kakaandi. Bali banabumiinyi naabi khuuminyisakho ni kamanaambo kakaabebotookheleelewo. Babaandu be mu Yerusalemu bekaana khuuloondelela kamakaambila kaase n'indeekela yase.

⁷Nashiryo Yerusalemu, rekeeresa byeesi ise Umukasya Wele indikho inoma. Musaambo isi iwe wokesanisilemo uri uli uwe bituluungu naabi khuuminyisa kamanaambo koosi kakaakhwibotookheleele iwe, naluundi iwe waloba khuuloondelela indeekela yase ni biilakilo byase, iwe webirisire buubi naabi khuuminyisakho ni kamanaambo kakaakhwibotookheleele.

⁸Nashiryo ise Umukasya Wele, indikho inoma indi, bona, ise samweene, ikhaba ise samweene, naakhushuukhilekho. Kane ise ikhukhalile iwe kimisaango kikhufuure nga uli mu shifwo mweesi kamanaambo koosi kananyala khuukhubonela iwe.

⁹Khulwekhubeela iwe ukhola bibiindu bibiili bye mbikho mu moni tsyase, kane ise ikhuwe iwe shiitaambiso sheesi ikhawatsakakho linaambo lyoosi, namwe sheesi ikhanyala neelakho naawa luundi ta.

¹⁰Nashiryo, mu Yerusalemu, ba paapa bakhaalye babaana baabwe, ni babaana nabo bakhaalye ba paapa baabwe. Ise ikhaabakhalile inywe kumusaango kubafuure, imbawe shitaambiso she khuwaamba abo babaakhaabe bashiili baalamu imbasalanise buli aandu.

¹¹“Ni nashiryo, khukhwaama nga ise Umukasya Wele n'iindi uli umulamu, khulwekhubeela inywe mwakholile bibiindu bibiili bye mbikho, ni bye bunyaalu, ni bibikhalimo itsamu ta mu Lisaayilo lyase Likhulu, kane imboonakise muwewo nga s'imbokesanisakho shiisa ta.

¹²Babaandu baboola shisiintsa shishikhola khataru mu linaambo lyeenywe, kane bafwe khulwe buulwaale buubi naabi, naluundi kane intsala ibabemo ingali naabi. Shisiintsa shishiindi she khataru shikhaafwiile mu busoolo ibulafu we shiriimba. Ni shisiintsa shishiramire shishikhola khataru, ise ikhaashisalaase buli aandu, lwanyuma imboongekho ni lurima nga imbatimisa.

¹³“Mulibona busiro bwe lirima lyase ni khuukhalala khukhwoolisa samweene n'iindibona ndi isho shibamala. Nga bibiindu bino byoosi byabakwiile khus'iinywe, kane bikile inywe mumanye muri ise, Umukasya, nabakanikhileyo isi muli khulwekhuuba indi ni lirima khulwe khuulekha khuba babeyikinwa ta.

¹⁴Ni khuuminyisalakho ilala, ise ikhaabekyelise inywe khuuba busa nga kamakubili, ni khuuba shishiindu sheesi kamanaambo kakaabebotokheleele katsekhelela busa, naluundi nga kabatataya inywe.

¹⁵“Nga ise naamalile khuubakhalile inywe kimisaango khulwe lirima lyase ni khuukhalala khwase, naluundi nga naabaweele inywe biitaambiso, isi kamanaambo kakaandi, inywe mukhaabe busa sheesi batsekhelela naluundi babatyaabile inywe. Inywe mukhaabe busa she khureewura naluundi shishireera khuurya khuukali isi kamanaambo kakaandi. Ise Umukasya, samweene niye ukanikhile bibiindu bino.

¹⁶Ise ikhaakamise kimikhoosi kyeenywe kyeesi mufunilamo biilyo, akile inywe intsala ibalye. Intsala ikhaabalye inywe muwulile butsiina, mufwaane busa nga beesi buyiingo bulikho buwunaka.

¹⁷Ise ikhaabasiindikhile intsala ni tsisolo tsilye babaana beenywe. Ikhaabewo buulwaale buubi naabi, ni khukhwirana, ni khufwiila mu busoolo. Ise Umukasya, samweene niye ukanikhile bibiindu bino.”