Read lumasaaba Ezekeli 7 Bible Online

Ezekeli 7 - lumasaaba bible

Ezekeli 7

¹Umukasya waanganikhayo isi ise nga aloma ari,

²“Mwaana w'omuundu, shino nisho sheesi ise, Umukasya Wele, indikho imboleela ba Isiraeli, nga inoma indi: Iyino ili intsakamo! Intsakamo iye linaambo lye ba Isiraeli lyoosi yoolile!

³“Ari inywe intsakamo yaboolilekho. Ari kane mubone liirima lyase nga ni lili, khulwekhuuba ise ndikho imbakhalila kumusaango khuuloondekhana ni bubwoonaki bweesi inywe mwakhola. Kane ise imbawe inywe shiitaambiso, khuuloondekhana ni bubwoonaki bweenywe.

⁴Ise singane imbalekhe inywe mutsye busa, namwe imbawaambile shiisa ta. Akhali indi ise kane imbawe inywe shitaambiso ni khuuloondekhana ni bubwoonaki bweenywe, bweesi inywe mwakhola mu linaambo lyeenywe. Isho shikile inywe mumanye muri ise ndi niye Umukasya.”

⁵“Umukasya Wele, alikho aloma ari, ingunyi ineetsa nga iloondekhana busa, kane iboolekho.

⁶Intsakamo yeenywe yoolile! Intsakamo yeenywe yoolile! Bona yaaboolilekho, iyishiina ilikho yiitsa.

⁷Inywe mumumenya mu Isiraeli, intsakamo yeenywe yoolile. Imbuka ili aambi khukhwoola, shifukhu shili aambi, shifukhu she khukhwaantsuwa khulwe kumutaambo shili aambi. Imbuka ili aambi isi mukhaalekhe khunyalisila khuuba ni kamayiiya khu njiinji, mu bifwo byeenywe bye khukhwisaayilamo ta.

⁸“Ari, ise ndi aambi naabi khuubamalilakho inywe liirima lyase. Kane ise imbamalilekho liirima lyase, khulwe bubwoonaki bweesi inywe mwakhola, n'intsibirisa imbi isi mwebirisamo.

⁹Ise singane imbalekhe inywe mutsye busa, namwe imbawaambile shiisa ta. Kane ise imbawe inywe shiitaambiso khuuloondekhana ni bubwoonaki bweenywe, n'intsibirisa yeenywe imbi, isi inywe mwebirisamo. Nio nanywe mumanye muri ise ndi niye Umukasya, ubawa inywe biitaambiso.”

¹⁰Bona shifukhu she kumutaambo shili aambi khukhwoola! Bona shili aambi shilikho shiitsa! Khukhwoonakisibwa khweenywe khwoolile aambi. Ise naakhalilewo shiitaambiso sheesi intsya khubawa inywe; khukhwiyiinga khweenywe khwamalataane buli aandu.

¹¹Bisaayumba byeenywe byasaalile bubwoonaki buukali. Mbaawo namutweela khu nibo ukane aramewo ta. Ikhaba bye buyiindifu bwaabwe, ni byeesi bali ni nabyo mu bukali, ni khumanyikhana khwaabwe, byoosi bikhaawewo.

¹²Imbuka yoolile, shifukhu shili aambi khukhwoola. Ari lekha uyo ukulisa bibiindu byeewe alekhe khukhwikhoya bari alikho afuna bye buyiindifu, namwe uyo ukula akhalila ari bamulyakhaane ta. Khulwekhuuba shitaambiso sheesi Wele alikho areera, shikhaakwe khu baandu boosi.

¹³Khulwekhuuba mbaawo uyo ukulisa bibiindu, ulimenyawo imbuka ingali khukhwoolisa nakobosa ibyo byeesi afwiilwa ta. Abo babaali baboonaki singane baramewo nga bali baalamu ta.

¹⁴Bona ikhoombi ifuura, na buli mutweela waaba nga ali umwirekefu. Ne mbaawo na mutweela utsya mu busoolo ta, khulwekhuuba Wele akhaabokesanise boosi liirima mu saambo niyo indweela.

¹⁵Ibulafu we shiriimba, iliyo busoolo bwe kamaani, ne mu shiriimba mukari mulimo buulwaale buubi naabi ni ntsala. Umuundu yeesi uuli ibulafu busa mu kyeewa, afwa khulwe buusoolo; ne uyo uuli mu shiriimba kane afwe khulwe buulwaale buubi n'intsala.

¹⁶Ne noola iliyo abo babaawonile ne baatitukha, kane batsye khu njiinji, babe busa nga kamawuusi ke mu matila, boosi nga baantsuwa busa khulwe bibyoonako byaabwe.

¹⁷Kamakhono ka buli mutweela kakhaanikine busa, ni kameesikamo kaabwe kakhoonyane busa.

¹⁸Bakhebiimbe bikwaaro bye bukoongwe, ne nga balikho banikina busa kimibili kyoosi. Boosi bakhaabekekho kamatsuune kaabwe, babe nga bali mu maŋaanyu kamakali.

¹⁹Bakhaatuumake izaabu yaabwe n'ifeetsa mu mikhoosi kye biriimba, nga umuundu n'atuuma bye mwibuumbi. Khulwekhuuba izaabu namwe ifeetsa s'ebinyala byaabawonesa nibo khukhwaama khu lirima ly'Omukasya ta. Sebanyala babiraambisa nibyo khuukhola byeesi bakana, namwe baabilya nibyo nga biilyo ta. Khulwekhuuba izaabu n'ifeetsa nibyo bibyakila nibo baakwa mu byoonako.

²⁰Nibo bawaamba bye khukhwisaaha nio babe baamiliyu, babiraambisa nga bibibareerera khukhwiyiinga, waakila baakhola bifwaani byeesi besaaya, ni bye bubwoonaki khukhwaama mu byeene ibyo. Isho nisho shishikila Umukasya wakhola bye buyiindifu bwaabwe bwekyela shishiindu sheesi baabiyila naabi.

²¹Umukasya alikho aloma ari, “Ise ikhaabaantsukhe inywe, babaandu be kamanaambo kakaandi kanuule byeesi muli ni nabyo. Ni baboonaki be khu shibala bakhaayile buyiindifu bweesi muli ni nabwo, batsye babukholelemo bye imbikho.

²²Ikhaba nga bakhola bye mbikho khu Lisaayilo lyase lyeesi ingana naabi, ni batsonwaaki nga basuta bibiilimo, nga bakholelamo bye bunyaalu, ise singane imbenaanekho ta.

²³“Buli shiindu ari shilimo khuutumbuukha; mu shibala shoosi mulimo khukhwirana, ni mu biriimba mwetsuule bisayuumba.

²⁴Ise ikhaareere linaambo lilifuurisa khuuba liibi naabi mu byoonako, libe nilyo liliila muntsu tsyaabwe. Basaani babaali ni kamaani kamakali bakhaawemo kamaani, nga ise naasiindikhile babaandu be kamanaambo kakaandi khuukholela bye mbikho mu bifwo mweesi inywe mwisaayilamo.

²⁵Kumutaambo kulikho kwiitsa! Kane muweentse khuufuna lukoosi, ne singane mulufune ta.

²⁶Kumutaambo kukhelaŋanemo busa, ni kamakhuuwa kamabi nako kakhelaŋanemo busa. Mukhekoontselele baŋoosi muri babarumburire byeesi babona; basaayi beenywe sibaakhabekho ni kamakaambila keesi banyala babaleekela inywe ta, ni baraangirisi be babaandu sibakhaabekho ni kamakhula keesi baawa babaandu ta.

²⁷Umuyiinga akhaakuukuule khulwe kumutaambo, ni baawuli buuri bubawaambe, babaandu bakhaabe mu khunikina busa khulwe khuurya. Ise ikhaabawe biitaambiso khulwe bibyoonako byeesi baakhola, naluundi imbakhalile nibo kimisaango musaambo isi nibo baaba bakhalila babaandi. Shino shikile nibo bamanye bari ise niye Umukasya.”