Read lumasaaba Ezekeli 8 Bible Online

Ezekeli 8 - lumasaaba bible

Ezekeli 8

¹Khu shifukhu shishikhola kharaano, mu mweesi kukuukhola khaseesaba mu mwiiko kweefwe kukuukhola khaseesaba nga khuli mu bubowe, abe ise nekhaale muntsu yase ni baraangirisi be baabowe khukhwaama mu Yuda. Lubaluba, kamaani k'Omukasya, Wele, kaantsikhakho.

²Ise ni nenyusa tsiimoni indi indola, naabona shishambonekhela nga shili nga umuundu. Ne khukhwaamila mu shikuute khukhwiila aasi, abe abonekha nga kumulilo. Khukhwaamila mu shikuute khukhwiila ingaaki, abe atsasa busa nga buroonzi umumiliwu naabi, isi bawashilekho kamafura baamiliisa.

³Kila atsanuula abe shishifwaana nga kumukhono kw'omuundu, wamaamba ise litsuune. Kila mu khubonekhelwa ukhwo, Umwooyo waasuta ise angaaki naba akari e likulu ni shiibala, waambila nafuna khubonekhelwa khwa Wele mu Yerusalemu. Waambila khukhwoolela ilala mu shilibwa she mukari shishiili ingaaki we Lisaayilo Liikhulu, nga ibweene iyo iliwo shibuumbe abe shishiili she imbikho isi Wele.

⁴Khaangu akho ise naabona shiriifwa shishookesanisa shiri Wele uwa Isiraeli abe ali abweene awo. Shino shaaba nga khuubonekhelwa khweesi ise nafuna makiboole nga indi khu ndulo khwe luluutsi Kebari.

⁵Kila Wele waanomela ise ari, “Mwaana w'omuundu, yiinyusa tsiimoni tsoowo uloleelele ingaaki.” Nashiryo nase nenyusa tsimoni tsyase naalola ingaaki. Indi indola, naabona ingaaki we shiilibwa shishingilila aambi ni shisheeso, a mulyaango abweene abe iliwo shibuumbe shishiili she imbikho isi Wele.

⁶Wele waanomela luundi ari, “Mwaana w'omuundu, iwe waaboone sheesi balikho bakhola? Iwe waaboone bibiindu bye mbikho byeesi ba Isiraeli balikho bakhola ano, nga bakana baandimisile ise ilala khukhwaama mu shifwo shiikhosefu? Ne kane iwe ubone bibiindu bye mbikho khuuminyisakho bino.”

⁷Kila ambila antsolesa khu shilibwa shishiingila mu lwaanyi. Indi indola indi, ise naabona nga mu litikiiyi mulimo lilowo.

⁸Kila aloma ari, “Mwaana uw'omuundu, kubula mu litikiiyi ilyo.” Indi ingubula mu litikiiyi, naabona nga mulimo lulwiitsi.

⁹Waanomela ari, “Yingilamo, ubone bibiindu bye mbikho byeesi babaandu bano balikho bakhola mu bweene umwo.”

¹⁰Nashiryo ise nengilamo naabona. Abe khukhwibotookhelesa khu matikiiyi khwoosi, baakhupakho bifwaani bye biisolo bibikhuruurira aasi, ni tsisolo tsye mbikho, ni bifwaani bibiindi abe byeesi ba Isiraeli besaaya.

¹¹Abe baraangirisi kamakhumi musaafu be ba Isiraeli bali ibweene iyo, nga mulimo ni Yazabiya, umwaana uwa Shafani. Abe buli mutweela khu nibo wawaambile muukhono mweewe shisheeso she khukhwookhelamo mu bubaani, nga lisuusi lilikho lituukha khukhwaama khu bubaani.

¹²Lwanyuma Wele waandeeba ise ari, “Mwaana w'Omuundu, iwe waaboone bibiindu byeesi baraangirisi be ba Isiraeli bakhola mu shimoonyo busa? Boosi balikho besaayila mu shiseenge shishitsuulemo bifwaani. Khulwekhuuba nibo baloma bari, ‘Umukasya s'akhubona ifwe byeesi khukhola ta; niye waayantsukha shibala sheefwe.’ ”

¹³Kila Umukasya waanomela ise ari, “Uli khuutsya khubona bibiindu bye imbikho byeesi nibo bakhola bibifuurisakho ni neebyo.”

¹⁴Nashiryo Umukasya waambila ise wantsolisa khu shilibwa shishiili luwaande lwe ingaaki, shishiingila mu Lisaayilo Liikhulu. Wantsokesa baakhasi nga balikho balila ni kumutaambo, khulwe khuufwa khwa wele isi balaanga bari Tamuza.[1]

¹⁵Kila waandeeba ise shireebo ari, “Umwaana w'Omuundu, iwe waaboone bibiindu bino? Kane ubone bye mbikho bibiminyisakho awo.”

¹⁶Nashiryo waambila ise mu lwaanyi lwe Lisaayilo Liikhulu mukari. Bona ndi ndola, ise naabona aambi ni kumulyaango kukwingila mu shifwo shishiminyisa bukhosefu, ne nga akari e shisheeso ni mwitikiiyi mweesi beema, abe iliwo basaani aambi kamakhumi kabili na baraano. Abe baapile Lisaayilo Liikhulu kimikoongo kyaabwe, nga baloleelele ibwamanyaanga, baakhupile kameesikamo aasi, balikho besaaya inyaanga abe ilikho irura.

¹⁷Kila Umukasya anomela ise ari, “Mwaana w'Omuundu, iwe waaboone shishiindu isho? Nibo bambaasa bari shili shiindu shifwiiti naabi, khuubona nga linaambo lye ba Isiraeli lyoosi likhola bibiindu bye mbikho, byeesi balikho bakhola nga ibyo, kila belooselakho betsusa shiibala shaabwe ni bisayuumba, ni khuukila ise neloosela khuukhalala? Lola nga nibo ni baakhomyasa ise mu saambo ifuurirayo ilala buubi bubweene.

¹⁸Ni nashiryo, nase inabokesanisa liirima lyase. Ise inababirisa buubi, nga s'imbawaambilakho shiisa ta. Abe bakhaandilila ise kumutaambo mu likono lye angaaki nga baloomba, ise singane imbarekeerese ta.”