Read lumasaaba Ezekeli 9 Bible Online

Ezekeli 9 - lumasaaba bible

Ezekeli 9

¹Lwanyuma ise naawulila nga Wele akuukuula ni likono lye angaaki, nga aloma ari, “Inywe basaani mumuuli khuutsya khuwa babaandu be mu Yerusalemu shiitaambiso, ni mwiitse ano. Buli mutweela ni eetse ni she busoolo sheewe mu mukhono kweewe.”

²Lubaluba, basaani basesaba beetsa nga baamila luwaande lwe shiilibwa she ingaaki we Lisaayilo Liikhulu, nga buli mutweela waasutile she busoolo sheewe. Yabawo umusaani mutweela uwaba ni nabo, nga wakwaarire bikwaaro biimiliwu naabi. Abe umusaani uyo waasutile shishiindu she khuuronakho buurone. Boosi beetsa kila beemikha aambi ni shisheeso sha buroonzi.

³Kila ibawo khuumwemuukha khwe buwaanga khuukali nga khwookesanisa khuri Wele uwa Isiraeli aliwo. Khuumulikha khuno khwaamila khu ba keruubi abe babaali a mulyaango we Lisaayilo Liikhulu, khwengila mukari. Umukasya walaanga umusaani abe ukwaarire bikwaaro biimiliwu naabi, nga waasutile she khuronakho buurone,

⁴waamulomela ari, “N'uutsye ukyeende mu shiriimba Yerusalemu, ure khaabonelo mu bweeni bwe babaandu babaali mu mutaambo, naluundi nga balila naabi khulwe bibyoonako byeesi babaandu bakhola mu shiriimba isho.”

⁵Nio lwanyuma ise naawulila nga Wele alomela basaani babaaramire ari, “Ni mutsye nga mumuloondakho mu shiriimba, mwiire babaandu. Mukhalekha umuundu yeesi waaba umulamu, namwe mwawaambila umuundu yeesi shiisa ta.

⁶Ni mwiire baasakhulu, basoleeli, bakhaana, ba maayi be babaana, ni babaana beene. Ne uyo yeesi ulikho khaabonelo mukhamutiilakho ta. Ni murakikhile ano mu Lisaayilo Liikhulu.” Ni nashiryo baarakikha ni baraangirisi abe babeemikhile awo mu Lisaayilo Liikhulu.

⁷Wele waalomela basaani abo ari, “Ni mukhole mu Lisaayilo Liikhulu bibiindu bibiili bye imbikho. Yiira babaandu kimilaambo kiitsule mu lwaanyi mwoosi. Rakikhilawo anaari!” Baryo baarakikha, beera babaandu mu shiriimba.

⁸Nga baarakikhile khukhwiira babaandu, ise naaramawo seenyene busa. Kila ise ingwa aasi mafuumala, naakuukuula nga inoma indi, “A Mukasya, Wele, khulwe liirima lyoowo liikali lyeesi uwaambiile babaandu be mu Yerusalemu, iwe ukana khuhesa babaandu abe babaaramawo mu Isiraeli?”

⁹Wele waantsilamo waanomela ari, “Babaandu be mu Isiraeli ni mu Yuda bali ni kumusaango khulwe khuukhola bibyoonako bye shikuuka she angaaki naabi. Shibala shaabwe shaayitsula khuutsukha shiifuki, ni bibyoonako bibiindi biikali naabi. Khulwekhuuba nibo bekhala baloma bari, ise Umukasya naabaantsukha nibo, naluundi ise s'iimbona bibiindu byeesi nibo bakhola ta.

¹⁰Nga ise khu bwase, singane imbeyakhile nibo, namwe imbawaambile shiisa ta. Kane nase imbakholekho bibiindu byeesi nibo baakhola khu bashaabwe.”

¹¹Ne bona, umusaani abe ukwaarire bikwaaro biimiliwu nga waasutile she khuuronakho buurone, waakobola. Kila aboolela Umukasya ari, “Ise naakholile nga iwe n'undakiile ise khuukhola.”