Read lumasaaba Danieli 10 Bible Online

Danieli 10 - lumasaaba bible

Danieli 10

¹Sayiraasi abe ali umuyiinga uwa Pasiya. Mu mwiiko kweewe kukuukhola khataru kwe buyiinga, Wele waaruumburira Danieli buurume. Danieli yuno abe lisina lyeewe liliindi bari Beliteshaza. Buurume bwaba nga bukanikha khu biindu bya ŋali, ne nga buli buwaangafu naabi khubutekeela. Danieli waarekeeresa naabi byeesi baamuruumburira, nio waakila waatekeela ibyo byeesi niye aabona.

²Mu mbuka iyo, abe ise naamalile tsisabiiti tsitaru tsimbuufu, nga indila khulwe kumutaambo.

³Ise sinalyakho biilyo biilayi byoosi, namwe naalyakho inyama, namwe naanywakho iviini ta. Khuumala tsisaabiiti itsyo tsyoosi, ise sinewakhakho kamafura khukhwimiliisa, namwe nakhupa litsuune lyase ta.

⁴Khu shifukhu she kamakhumi kabili na bine, she kumweesi kukuunyoowa, ise naba nga nemikhile khundulo khwe luluutsi luboofu, Tigurisi.

⁵Ise ni nenyusa tsiimoni indi indola ndi, naabona umusaani nga wakwaarire bikwaaro biimiliwu naabi, nga webowile lukhoba lwe izaabu mu shikuute.

⁶Abe kumubili kweewe kwoosi kulikho kumulikhamulikha busa, muumoni mweewe mutsasa busa nga luheni, tsimoni tsyeewe tsimulikhamulikha busa nga kumulilo. Abe kamakhono keewe ni biikele byeewe binyenanyena busa nga byeesi bawakhilekho buroonzi, ni likono lyeewe abe lili busa nga khulookha khwe lituuli lye babaandu baakali.

⁷Ise Danieli senyene niye uwabona shishiindu shino. Khulwekhuuba abo beesi ise naba ni nabo sibashibona ta, akhali indi khuurya khuukali khwabawaamba, waakila baatima baatsya beebisa.

⁸Nashiryo ise naramawo senyene, naabona bibyakholikha. Kamaani kaambwamo, ni muumoni mwase mwashuukhakho, nga umuundu abe s'anyala ni khukhuumanya ise ta.

⁹Nio lwanyuma ise naawulila likono lyeewe nga alikho akanikha. Ise ni nawulila likono lyeewe, ise naayekhelela naakwa aasi mafuumala.

¹⁰Lwanyuma kumukhono kw'omuundu kwamaamba kwantsinyusa nemikhila khu makhono ni khuumesikamo. Ise naarama nga ishinikina busa.

¹¹Kila malayika uyo anomela ise ari, “Danieli, iwe Wele akhukana naabi, naluundi waandumanire ise isi iwe. Yiinyukha khu ngaaki urekeerese biilomo byeesi ise intsya khukhuboolela iwe.” Ni aaba nga ashinganikhayo aryo, ise neenyukha neemikha khu ngaaki, ne nga ndikho inikina busa.

¹²Kila anomela ise ari, “Danieli, ukharya ta. Khulwekhuuba khukhwaamila khu shifukhu sheesi iwe wewolelesela mu moni tsyeewe, uri nio unyale khufuna khumanya, Wele wawulila khuuloomba khwoowo. Ise neetsile khukhwilamo khuuloomba khwoowo.

¹³Malayika umuwuli uwe mu buyiinga bwe ba Pasiya, akhaabisanisa ise khuumala biifukhu kamakhumi kabili na shitweela (21). Ne Mikayili, mutweela khu bamalayika baaraangilisi weetsa khukhuunjeeta ise, nashiryo ise naamulekhawo niye n'umuwuli uwe buyiinga bwe ba Pasiya.

¹⁴Ise neetsile ano khuukhumanyisa iwe bibiindu bibikhaakholikhe khu baandu boowo, mu biifukhu bibiili khukhwiitsa mumoni. Khulwekhuuba khubonekhelwa khuno khuwaamba khu biindu bibiitsya khukholikha mu biseera bye mumoni.”

¹⁵Nga malayika uyo ashikanikha aryo, ise narama nga naloleleele aasi khwiiloba, nasamiliile busa.

¹⁶Lwanyuma malayika ubonekha nga umuundu, wareera kumukhono kweewe wandiila khu minwa kyase. Kila ise imulomela indi, “Musaakhulu, bibiindu bino byakilile ise kamaani kambweelemo, siinyala naakamisa ni khuunikina ta.

¹⁷Ise ubele umukulwa busa, inyala indyeena nakanikha isi uyo uwuniinda? Ari ise siindi ni kamaani ta, ikhaba ari indi busa nga umufu.”

¹⁸Kila uyo ubonekha nga umuundu wandiilakho ise luundi kumuluundi kukuukhola khabili, waakila ise naafuna khumaani.

¹⁹Waaloma ari, “Wele akhukaana iwe naabi, nashiryo ukharya ta. Lukoosi lube ni nawe. Ba uwe kamaani naluundi umunyindaalifu.” Lwanyuma lwe khukhuunganikhayo aryo, nase naafuna kamaani, kila ise imwiilamo indi, “Musaakhulu, iwe n'umboolele ise sheesi uli ni nasho, khulwekhuuba ari iwe wantsisilemo ise kamaani.”

²⁰Kila andeeba ise ari, “Iwe waamanyile khulwashiina kila ise niitsile isi iwe? Ne ari ingana khukhwiilayo khuutsya khusoolanisa umuraangirisi uwe ba Pasiya. Nio lwanyuma nga ise naamalile khuumusoolanisa, umuraangirisi uwa Buyonaani kane eetse.

²¹Ne kane ise ikhuboolele iwe isho shisharonebwa mu shitabo she bwaŋali: mbaawo uyo unyala waasoolanila khu luwaande lwase ta, akhali Mikayili, malayika umukhulu, umuliindi we babaandu ba Isiraeli.