Read lumasaaba Danieli 11 Bible Online

Danieli 11 - lumasaaba bible

Danieli 11

¹“Ise khu bwase, naamuwa niye kamaani naluundi naamuyeeta, mu mwiiko kukuunyoowa kwe buwuli bwa Dariyusi, uwaba abe umu Medi.

²Ilala, byeesi ise intsya khuukhuboolela iwe, bili bibyaronebwa mu shitabo she byaŋali.” Bona iliibawo bayiinga babaandi bataru babaakheetse bawule Pasiya. Ne ukhola khane, akhaabe uwe buyiindifu naabi khuuminyisa babaaramire boosi. Ne lwanyuma nga wekelile uwe kamaani waabalaayisile buyiinga bweewe khulwe buyiindifu ubwo, akhaakile buyiinga bwoosi bwibwakale buyiinga bwe Bayonaani.

³Nio lwanyuma etsewo umuyiinga uwe kamaani naabi. Uyuno akhaawule ni buwuli bwe shikuuka she angaaki, nga akhola buli sheesi umweene ekanisa khuukhola.

⁴Nga buyiinga bw'omweene uyo bwoleele ilala khuuba ni kamaani kamakali, bukhaawukhanemo bisiintsa bine bibuufu. Bayiinga babaakhaayile bisiintsa bino bibikhaawukhanemo, sibakhaabe be mu lisaaye lyeewe ta, namwe sibakhaawule musaambo abe isi niye awula ta. Khulwekhuuba buyiinga bweewe nga baabukabananisilemo, sibukhaatsye isi lisaaye lyeewe ta.

⁵Nio lwanyuma lwayo, umuyiinga uwa Misiri, akhaabe ni kamaani. Ne mutweela khu baraangirisi beewe baakhulu be mu mahe, akhaabe ni kamaani khuuminyisakho, abe nga awula shisiintsa shishiminyisa buukali she buyiinga ubwo.

⁶Lwanyuma lwe khuubiraawo kimiiko kimikali, umuyiinga wa Misiri, n'uwa Siriya bakhaakhole buusaale bwe khuureerawo lukoosi, nga uwa Misiri awa uwa Siriya umwaana weewe umukhaana, khuuba umukhasi weewe. Ne inengekharengekha yino s'ikhaaraambe ta, khulwekhuuba umukhaana uyo umweene, n'umwaana weewe, n'umuseetsa weewe, ni baraambi beesi aliitsya ni naabo, baliiribwa.

⁷Lwanyuma lwayo, mutweela khu balebe b'omukhasi uyo aliikela umuyiinga. Akhebwakale liiye lya Siriya, engile mu lubili lw'omuyiinga waabwe, abafuure mu busoolo.

⁸Akhaasute ba wele baabwe, ni biibuumbe byaabwe, ni bibiindu byaabwe byeesi nibo babuumba khukhwaama mu zaabu ni mu feetsa, eleyo ni nabyo i Misiri. Kimiiko kikhaabirewo kikyoola muukhono, nga s'ebwakala umuyiinga uwa Siriya luundi ta.

⁹Nga abirirewo imbuka, umuyiinga uwa Siriya aliibwakala buyiinga bwa Misiri, ne baliwula uwa Siriya mu busoolo, akoboleyo ingo weewe.

¹⁰“Lwanyuma lwayo, basoleeli b'omuyiinga uwa Siriya bakhaabusaase liiye liikali lilyeene, batsye beebwakale. Nga baabusaasile liiye lino lilikhaabe busa nga kameetsi kakaasalasaale, bakhaatsye bebwaakale ba Misiri.

¹¹Nio khulwe lirima liikali, umuyiinga uwa Misiri, akhaatsye abakaanane, boombi basoolane. Nga umuyiinga wa Misiri waamalile khuubusaasa liiye liikali liryo, akhaanyalise khuubafuura nibo mu busoolo.

¹²Lwanyuma lwe kukhwiira basilikhale baakali naabi, naluundi nga waafuurire mu busoolo, umuyiinga wa Misiri akheyiinge naabi. Ne s'iili bari akhelooselatsake busheele khuuwula mu busoolo ta.

¹³“Khulwekhuuba umuyiinga wa Siriya akheeleyo ingo ndi abusaase liiye liliminyisakho ni litaayi buukali. Nga imbuka yoolile, alikobola ni liiye liikali ilyo, nga aluno lili ni bye khuusoolana bibiminyisakho bitaayi kamaani.

¹⁴Nio mu mbuka iyo babaandu baakali balishuukha khu muyiinga wa Misiri. Danieli, nio ibewo babaandu be shituluungu khukhwaama mu ba Isiraeli, babaakhaaminyaalile umuyiinga wa Misiri, mu khwoolelesa khubonekhelwa khweesi bakhaabe baafunile. Ne, bakhaakhaasikhe.

¹⁵Nio lwanyuma umuyiinga uwa Siriya atsye ebwakale shiriimba shishiilikho kuumako, ashiibotokhelele. Kamahe ke mu Misiri, ikhaba abo abe babaaminyisa buulayi, balikhaasikhana bawulibwe khulwe khutaamba kamaani.

¹⁶Sibakhaanyalise khuusoolanisa ba Siriya ta, nio akile umuyiinga uwa Siriya uyo akhole buli sheesi ekanisa. Akhawaambe shibala sheesi ise naloma khuuwa bakuuka beenywe, shoosi shibe aasi e buwuli bweewe.

¹⁷“Umuyiinga uwa Siriya akhaakhakekho khuuraambisa kamaani, atsye ni liiye lyeewe lyoosi. Nio lwanyuma mu khukhakakho khukhwoonakisa buyiinga bwa Misiri, akhaakhole buusaale ni nabo, nga awaanayo umwaana weewe umukhaana khuutsya khukhwaalikha ibweene iyo. Ne shitweela busa, shino sishikhaaraambe, namwe sishikhaamuyeete niye ta.

¹⁸Lwanyuma lw'eebyo, akhaakhalewo ebwakale kamanaambo kakaali khu ndulo khwe nyaantsa, kakaafuura buukali akawule mu busoolo, eyilile makali khu niko. Ne lwanyuma ilibawo umuraangirisi uwe kamahe khukhwaama mu linaambo liliindi busa, ulimuwula niye mu busoolo, akile bibiindu byeesi abe akhola khulwe khukhwiyiinga, bimukobolele umweene.

¹⁹Nio akile umuyiinga uyo ashuukhe khukhwiilayo mu shiriimba she waabwe. Ne balimuwula mu busoolo, iyo ibe niyo intsakamo yeewe.

²⁰“Lwanyuma lw'oyo, ilibawo umuyiinga ukuundi uliitsa. Uyuno alisiindikha umurume weewe khuutsya mu baandu, nga araambisa khumiinikhilisa khuukali mu khubuusa kumusolo, nga akana bari buyiindifu bwe buyiinga bweewe bwiloosele. Ne lwanyuma lwe imbuka ingeekhe iri, umuyiinga uyo akheeribwe. S'aakheeribwire abulafu busa namwe mu busoolo ta, akhali akheeribwe mu shimoonyo busa.”

²¹Malayika weloosela khusontsoola ari, “Umuyiinga uwa Siriya ukheelekho akhaabe umubi naabi, nga abe s'alikho ni bunyala abe bwe khukhwikela umuyiinga ta. Akheetse busa mu khaangu, naluundi nga araambisa tsimbomelo nio akile awaambe buyiinga.

²²Akheere naluundi onakise abo boosi babaamukhaandisa niye, ikhaba n'umusaayi umukhulu naye akheeribwe.

²³Akhaawomele kamanaambo kakaandi khuubirira mu khukhola tsindakaano tsye bubeeyi busa, tsyeesi akhaalekhe khutsiilakho ta. Ikhaba nga awula buyiinga bubuulimo babaandu bakyeekhe bari, ne akhaabalaayise naluundi eloosele khuuba ni kamaani.

²⁴Akhaakwewo khaangu busa ebwakale shisiintsa shishiiminyisa khuuba shiyiindifu she buyiinga, nga mbaawo ushimanya ta, naluundi akhole bibiindu byeesi ikhaba na mutweela khu bakuuka beewe bakhaakholakho ta. Nio lwanyuma awaambe ibyo byeesi anuulile khukhwaama mu busoolo, akabile baraambi beewe. Akhaakhole tsimbomelo tsye khukhwibwakala tsiimako tsitsikhiinga biriimba, ne shino sishikhaayile imbuka ingali taawe.

²⁵“Khulwe kamaani keewe, ni bunyindaalifu bweewe, akhesuluuse busa abusaase liiye liikali lilyeene, ebwakale umuyiinga wa Misiri. Ne umuyiinga wa Misiri naye akherengekhareengekhe ni liiye liikali lilyeene naluundi nga lye kamaani, naye amusoolanise. Ne uyo akhaaraambise tsimbomelo, akhaakile umuyiinga wa Misiri akhaasikhane.

²⁶Ikhaba abo babaali basaale beewe babeene, bakhaamulyemo luwomelo. Basilikhale beewe babafuurisa buukali bakheeribwe, ni liiye lyeewe lyoosi liwewo.

²⁷Ne bayiinga abo boombi, kamakesi kaabwe koosi kakhaabe mu khukhola bibiindu biibi. Bakhekhale atweela khu shikabilo shitweela, babikanikhekho, ne bakhaabe bamala busa imbuka. Sibakhaafune isho sheesi bakana ta, khulwekhuuba imbuka inyene ikhaabe nga ishiili khukhwoola ta.

²⁸Umuyiinga wa Siriya akhaakobooleyo ingo weewe ni bibiindu biikali byeesi amalile khuunuula mu busoolo, ne nga mu mwoyo kweewe waakhaliilewo ilala ari, ali ni khukhwoonakisa khukhwisaaya khwe babaandu ba Wele. Akhaakhole buli shishiindu sheesi akana, nio lwanyuma akoboleyo mu shibala sheewe.

²⁹“Nga imbuka yaabirirewo, ndi akhebwaakale Misiri luundi. Ne kumuluundi kuno bibiindu sibikhaabe nga ni byaba amataayi ta.

³⁰Khulwekhuuba ba Roma bakheetse ni tsimeeri bamusoolanise, bakile abe ni khuurya khuukali, akoboleyo. Khulwe lirima, akhaakobooleyo akhakekho khukhwoonakisa babaandu ba Wele. Akhaakobooleyo aloondelele kamakhula k'aabo babasoolanisa babaandu ba Wele.

³¹Basilikhale khukhwaama mu liiye lyeewe, bakhaatsye bakhole bye bunyaalu mu Lisaayilo Likhulu, ni mu lumako lwalyo, baakamise babaandu khuwaanayo tsisaayilo tsyeesi bawaanayo buli shifukhu. Bakhaalakile babaandu khukhola shishiindu she mbikho naabi: khukhwisaayila ba wele be kamanaambo kakaandi mu shifwo shiikhosefu.

³²Akhaaraambise kamakesi akile ibewo batweela khu baandu babaaba ba Wele, bakoboole khu luwaande lweewe. Ne abo babaloondelela Wele, basoolane shisaani.

³³Babaandu babaali ni kamakhula, bakhaasontsoole bashaabwe, nio nabo bamanye bibiindu bino. Ne shitweela busa, batweela bakheeribwire mu busoolo, namwe bokhebwe busa ni kumulilo, bafwe. Ne batweela bakhaanuulibwe bayilibwe mu bubowe, khuumala imbuka indeeyi.

³⁴Nga babaandu ba Wele bano balikho beeribwa, bakhaaweebwe buyeeti bukyeekhe buri. Naluundi ikhaabewo abo babaakhaabetuubasekho, ne nga bakhaakhole shino nga babatsekhelela busa.

³⁵Batweela khu baraangirisi be kamakhula abo bakheeribwe. Ne shino shikhaakile babaandu babaaramire bafune khupyeluusibwa. Shino shikhaatsye mu moni, khukhwoolisa imbuka isi Wele umweene akhaakhalewo.

³⁶“Umuyiinga wa Siriya akhaakhole nga n'akana, eniinise umweene angaaki, naluundi eyiinge, eniinise angaaki e ba wele boosi. Akhaakanikhe ni bibiindu bibiyaangisa bibiwaamba khu Wele umunyali uwa byoosi. Akhaakhole shino khukhwoolisa nga Wele n'amwokesanisa liirima lyeewe. Khulwekhuuba Wele akhaakhole sheesi aamala khaale khuukhalawo.

³⁷Umuyiinga uyo s'akhenaaneyo khu ba wele beesi bakuuka beewe besaayatsaka, namwe isi ba wele beesi baakhasi baminyisa khuukana ta. S'aakhenaaneyo ikhaba isi wele yeesi ta, khulwekhuuba akheniinise umweene angaaki khuubaminyisa nibo boosi.

³⁸Mu shifwo she ba wele abo, niye akheese lukoosi mu ba wele babaatseeta tsimako tsye biriimba, khuuba tsye kamaani. Akhawaanayo izaabu, ifeetsa, ni biwaanwa bye angaaki isi ba wele, beesi ikhaba bakuuka beewe bakhesaayatsaka ta.

³⁹Akhaaweentse buyeeti khukhwaama mu baandu babesaaya wele uwe kamanaambo kakaandi busa, nio bamuyeete niye khuutseeta tsiimako tsyeewe. Abo babaamufukiilisa niye khuuba umuyiinga, akhaabaniinise angaaki abawe lukoosi luukali naabi. Akhaabekelise nibo khuuba baawuli mu bisiintsa bitweela bye buyiinga bweewe, naluundi abakabile liloba khuuba kumukheemba kwaabwe.

⁴⁰“Ne imbuka inyene n'iilyoola iy'omuyiinga uwa Siriya, uyo uwa Misiri ali mwibwakala, ne uwa Siriya alisoolana ni kamaani keewe koosi. Aliraambisa tsiŋwaaŋwa, kamakaali kaatsyo, ni tsimeeri tsingali. Akhebwaakale kamanaambo kamakali, afwaanane busa nga kameetsi ni keetsula kaasalasala.

⁴¹Akhebwaakale ikhaba shibala shikhosefu, eere biikana ni biikana bye babaandu. Ne babaandu be mu Edomu ni be mu Mowabu, ni be mu Amoni babaafuurisa buukali, boosi bakhaawone.

⁴²Akhebwaakale kamanaambo kamakali, ikhaba linaambo lya Misiri s'aakhalilekhe ta.

⁴³Akhaayile izaabu, n'ifeetsa, ni bye buyiindifu bibiindi khukhwaama mu Misiri. Ba Libiya, ni ba Esiyopiya, boosi bakhaabe aasi e buwuli bweewe.

⁴⁴Ne kamakhuuwa khukhwaama ibwaamanyaanga ni khukhwaama ingaaki, kakhaamwiyembeelese niye, kakile asoolane ni kamaani kameene, nga eera naluundi nga onakisa babaandu baakali.

⁴⁵Akhawaambe tsiweema tsyeewe tsye kamaani, atsyombakhe akari e nyaantsa ni lukiingi lweesi Lisaayilo Likhulu liimilekho. Ne shitweela busa akhaafwe, nga mbaawo umuundu na mutweela umuyeeta ta.”