Read lumasaaba Danieli 3 Bible Online

Danieli 3 - lumasaaba bible

Danieli 3

¹Umuyiinga Nebukaduneza waalakila, baabuumbayo shibuumbe nga shili sh'ezaabu, baashira mu musaalela kukulaangibwa Dura, nga shino shili shitweela khu bisiintsa bye mu Babulooni. Shibuumbe isho abe shoolisa buuleeyi bwe tsimita kamakhumi kabili na musaafu (27), ni buubalaayi bwasho nga bwoola aambi tsimita tsitaru.

²Lwanyuma umuyiinga waarumanisa ari baraangirisi be mu buyiinga bweewe boosi babusanile isi umweene ali. Muno abe mulimo baraangirisi be bisiintsa bibiikhali bitweela ta, ni babaamuwa niye kamakhula, ni baabiikhi, ni baakayi, ni baraangirisi babaandi. Bano boosi abe bali ni khuubawo khu mayiiya ke khuuwaanayo musaambo iya buraawa, shibuumbe isho sheesi Nebukaduneza aabuumba.

³Baraangirisi bano boosi nga baamalile khubuusana khulwe ilomo iyo, naluundi nga bali ibweeni we shibuumbe tsana sheesi Nebukaduneza aabuumba,

⁴abe uyo isi baarawo khukuukuula tsilomo waalomela mu likono lye angaaki ari, “Lino lili likaambila isi babaandu babaakanikha tsiinimi tsyoosi, ni kamanaambo koosi, ni be tsikholo tsyoosi!

⁵Liloma liri nga mwaawuliile likono lye khuufuura lulwiika, namwe ikhoombi, namwe khuukhupa lituungu, namwe likono lye shishiindu she kimyeenya shoosi, muli ni khukhwiyalisa aasi, mwisaaye shibuumbe sheesi Nebukaduneza areerewo.

⁶Uyo yeesi ukana alekhe khukhwiyalisa aasi khushisaaya ta, kane khaangu akho atuumibwe mu mulilo kukwiseŋeeŋile naabi kwe mwiruumbi.”

⁷Nashiryo babaandu babaakanikha tsiinimi tsyoosi, ni be kamanaambo koosi, ni tsiikholo tsyoosi, ni baamala khuwulila likono lye khufuura khwe lulwiika, n'ikhoombi, ni khuukhupa khwe lituungu, ni bye kimyeenya bibiindi, beyalisa aasi, besaaya shibuumbe sheesi umuyiinga Nebukaduneza abeele aarawo.

⁸Nashiryo yaba khu mbuka nyene iyo, niyo isi babaandu ba Babulooni banyoolela ikhabi iye khuuwaabila Bayudaaya.

⁹Bano baatsya baalomela umuyiinga Nebukaduneza bari, “Umuyiinga, khali iwe upilewo khabili!

¹⁰Uwe lukoosi, iwe warusire likaambila nga liloma liri, buli muundu ukane awulile likono nga bafuura lulwiika, namwe ikhoombi, namwe khuukhupa khwe lituungu, namwe likono lye bye kimyeenya byoosi, ali ni khukhwiyalisa aasi, esaaye shibuumbe.

¹¹Naluundi uri uyo yeesi ukane alekhe khukhola isho ta, kane bamutuume mu mulilo kukwiseŋeeŋile naabi kwe mwiruumbi.

¹²Iliwo Bayudaaya batweela beesi iwe warobora khuuba baraangirisi be bisiintsa bitweela mu Babulooni, nga nibo Shaduraka, Meshaki, ni Abedinego. Umuyiinga, basaani bano sibarekeeresa byeesi iwe uloma ta. Sibesaaya ba wele boowo ta, naluundi sibesaaya shibuumbe sheesi iwe wareerewo ta.”

¹³Nga umuyiinga waawuliile bino, khulwe lirima liikali, waalakila ari bamureerere basaani bataru bano. Kila babareera isi umuyiinga.

¹⁴Umuyiinga waabareeba ari, “Shaduraka, ni Meshaki, ni Abedinego, shili shaŋali bari inywe simwisaaya ba wele baase ta, naluundi bari simwisaaya shibuumbe sheesi ise nareerewo ta?

¹⁵Nashiryo nga muli baberekefu khukhwiyalisa aasi, mwisaaye shibuumbe sheesi ise nareerewo nga mwaawuliile likono lye khufuura khwe lulwiika, namwe ikhoombi, namwe khuukhupa khwe lituungu, namwe likono lye she kimyeenya shoosi, singane ibewo buwaangafu bwoosi ta. Ne ni mulekha khukhola isho ta, kane khaangukho babatuume mu mulilo kukwiseŋeeŋile naabi kwe mu liruumbi. Mwambaasa muri iliyo wele yeesi unyala waabawonesa inywe khukhwaama mu maani kaase?”

¹⁶Shaduraka, ni Meshaki, ni Abedinego beelamo umuyiinga bari, “Uwe lukoosi, sishikoombisa ifwe khukhwiwotsakho khu lomo yino ta.

¹⁷Noola shili shiryo, kane Wele weefwe umweene isi ifwe khwisaaya, akhuwonese ifwe khukhwaama mu mulilo kukwiseŋeeŋile naabi kwe mu liruumbi. Naluundi kane niye umweene akhuwonese ifwe khukhwaama khu maani koowo.

¹⁸Ne abe Wele aakhalekha khukhuwonesa ifwe ta, uwe lukoosi, iwe n'ushimanye buulayi uri, ifwe singane khwisaaye ba wele boowo, namwe khwisaaye shibuumbe sheesi iwe ureerewo ta.”

¹⁹Lwanyuma Nebukaduneza liirima lyaamuniina, waashuusakho mu moni khulwa Shaduraka, Meshaki, ni Abedinego. Waalakila baaloosela khukhwikeleesa mu mulilo kwe liruumbi, kweseŋeeŋa naabi kimiluundi musaafu khuminyisa tsindaalo.

²⁰Kila umuyiinga alakila batweela khu basilikhale be liiye lyeewe, khubowa Shaduraka, Meshaki, ni Abedinego kimikosi, babatuume mu mulilo kukwiseŋeeŋile kwe muliruumbi.

²¹Nashiryo bawaamba baataru abo, baababowa nga bali mu bikwaaro byaabwe, ni tsingofwiila tsyaabwe, baabatuuma mu mulilo kwatsana ukwo.

²²Ne khulwekhubeela abe umuyiinga waalakiile ari kumulilo kuli ni khuuba nga kweseŋeeŋile khuuminyisakho tsiindaalo, abe ukwo kukuuli khuuliliba kwaakhweesa basilikhale baatsana babaayila basaani bataru abo, kwaaboosha.

²³Kila Shaduraka, ni Meshaki, ni Abedinego, bakwa mu mulilo kwatsana ukwo, nga bali baabowe.

²⁴Khaangukho, khulwe khukhwiyaanga khuukali, umuyiinga Nebukaduneza, wenyukha weemikha khuungaki. Kila areeba baraambi beewe ari, “Babaandu babeele beenga beesi muboyile ni kimikosi khwatuuma mu mulilo? Sibabeele bataru ta?” Kila baraambi beewe bamwiilamo bari, “Umuyiinga, babeele bataru.”

²⁵Kila abeelamo ari, “Ne ise ndikho imbona basaani bane bekeendela busa nga baalekhuule, mu mulilo mukari, naluundi nga sikwabooshilekho na khari ta. Umuundu ukhola khane afwaanana nga malayika.”

²⁶Lwanyuma Nebukaduneza wesyeenda aambi ni kumulyaango kukwiingila mu muuli kumulilo kwe mwiruumbi ukwo, walaanga ari, “Shaduraka, Meshaki, ni Abedinego! Inywe muli babaakaanisi ba Wele, uwe angaaki naabi, ni murure antsye, mwiitse ano!” Kila bakyeenda baarura ibulafu.

²⁷Kila baraangirisi be bisiintsa bibiikhali bitweela ta, atweela ni naabo abe babaawa umuyiinga kamakhula, ni babiikhi, ni baakayi, ni baaraangirisi babaandi boosi baabuusana atweela, khukhwimenielesa basaani bataru abo. Kumulilo abe sikwaabakholilekho shishiindu shoosi ta. Abe litsuune lyaabwe silyashiilekho, namwe ikhaba bikwaaro byaabwe ta. Khu baandu bataru bano, abe mbaawo uwunyakho ikhaba ni lisuusi ta.

²⁸Lwanyuma umuyiinga waaloma ari, “Wele uwa Shaduraka, ni Meshaki, ni Abedinego, aruuyibwe naabi! Khulwekhuuba asiindikhile malayika weewe isi basaani bano babaamwiyikina niye, waabawonesa. Baaminyaliile kamakaambila kaase, besuungulayo buulamu bwaabwe, nga baloma bari, shifuurisa bafwe, ne nga sibanyala beenamila wele ukuundi nga bamwisaaya, akhali Wele waabwe yenyene ta.

²⁹Nashiryo, ari ise ndi khuurusa likaambila nga liloma liri, umuundu yeesi, namwe uwe linaambo lyoosi, namwe uwe ikholo yoosi, ni aba bari anyoolikhana nga akanikha buubi khu Wele wa Shaduraka, Meshaki, ni Abedinego, kane aweebwe shitaambiso. Kane bamusatsakemo bisiintsa, ni be muungo mweewe boosi nabo beeribwe. Khulwekhuuba mbaawo wele ukuundi unyala wawonesa nga Wele yuno n'aakhola ta.”

³⁰Lwanyuma lwa bino, umuyiinga waalooselakho Shaduraka, ni Meshaki, ni Abedinego buunyala ni biriifwa bye khuuba baawuli mu Babulooni.