Read lumasaaba Danieli 5 Bible Online

Danieli 5 - lumasaaba bible

Danieli 5

¹Lwanyuma lwayo, Belishaza wekela niye umuyiinga, khukhwiila mu bikele bya paapawe, Nebukaduneza. Kila abawo lutweela, umuyiinga Belishaza, wakhola kamayiiya ke kamaani naabi, walaanga babaandu be angaaki naabi khuubawo, banyweela atweela ni naye iviini.

²Nga balikho banywa, kila Belishaza alakila ari batsye bareere bikopo bye izaabu, ni bye ifeetsa, byeesi paapawe Nebukaduneza, anuula khukhwaama mu Lisaayilo Likhulu i Yerusalemu. Nga akana niye umweene, ni baraangirisi be mu buyiinga bweewe, ni bakhasi beewe, ni bakhasi beewe be bulafu, babinyweelemo.

³Kila bareera bikopo ibyo atweela ni bipwaakhuli, abe byeesi baamisa mu Lisaayilo Likhulu, babaabawo boosi baabinyweelamo iviini.

⁴Baanywa iviini, baaruuya ba wele b'ezaabu, n'ifeetsa, ni ba buroonzi, ni be biibya, ni be bisaala, ni be kamabaale.

⁵Khaangukho, tsintsala tsye khu mukhono kw'omuundu tsyaawulukha kila tsirona khu litikiiyi abe lyeesi baamaala baamiliisa, mu lubili. Lino lyaba abe lililoleelelana ni kusiindi kw'etaala. Umuyiinga umweene waabona nga kumukhono ukwo ni kurona.

⁶Umuyiinga waasamilila busa, bibyambaaso byaamwibowa, waarakikha khuunikina yenyene busa, ni bikele byaanikina.

⁷Kila umuyiinga akuukuula ni likono lye angaaki ari bareere be kamakhula, ni baalosi, ni babaakhola bye kamakaanga. Nga boolile, umuyiinga wabalomela ari, “Uyo yeesi khus'iinywe ukane asome byeesi baronire ibyo, naluundi amboolele kamakhulu kaabyo, kane akwaarisibwe mu ngubo tsimbesemu tsye angaaki naabi, bamuwe kumukuufu kwe izaabu akwaare mwikosi nga kwokesana bukhulu, naluundi kane abe ukhola khataru mu bukhulu bwe buyiinga buno.”

⁸Babaandu beesi baalaanga abo boosi baakhakakho, ne yaalekha khubayo na mutweela abe unyala waabisoma, namwe waaboolela umuyiinga kamakhulu kaabyo ta.

⁹Shino shaakila umuyiinga Belishaza weloosela ni khuuba ni khuurya khuukali naabi, waasamilila busa, ni beesi balaanga abo baalekha khumanya shinaanu she khuukhola ta.

¹⁰Khulwe liyoombo abe lyeesi umuyiinga ni babaandu beewe abe balikho bakhupa, maayi w'omuyiinga weetsa wengila mu lwaanyi mweesi abe kamayiiya kali. Kila umukelema uyo aloma ari, “Umuyiinga, khali upilewo khabili! Ukhaba ni khuurya khuukali namwe waasamilila busa ta.

¹¹Mu buyiinga mwoowo muno mulimo umusaani uli n'Umwoyo uwa Wele. Nga paapa woowo ashiili umuyiinga, umusaani uyo okesanisa ari ali ni buwaanga, ni kamakhula, ni khuumanya, nga byeesi ba wele bali ni nabyo. Nisho shishakila paapa woowo Nebukaduneza, waamwikesa umuraangirisi uwe babaamuwa niye kamakhula, ni babaakhola bye kamakaanga, ni babaalakula, ni ba Babulooni.

¹²Umusaani uyo ali ni bunyala bubuukhali bwa busheele ta, ni kamakhula, ni buumanyilifu mu khuruumbula bibiili mu marooro, khuubuula kiminayi, ni khuusontsoola bye kamakaanga. Nashiryo, rumanisa balaange umusaani Danieli uyo, isi umuyiinga atwiikha lisina liliindi bari Beliteshaza. Kane akhuboolele iwe kamakhulu kakaali mu shiindu shino.”

¹³Lwanyuma baatsya baareera Danieli isi umuyiinga. Kila umuyiinga amureeba ari, “Iwe niye Danieli, mutweela khu babowe ba Yuda, beesi paapa wase areera ino khukhwaama mu Yuda?

¹⁴Ise naawuliile bari Umwoyo wa Wele ali ni nawe, naluundi bari uli ni kamakhula ni khuumanya khwe angaaki naabi.

¹⁵Baandereere ano babaandu babaamba ise kamakhula, ni babaakhola bye kamakaanga, indi basome naluundi bamboolele kamakhulu kaamwo, ne bakhaasikha khuushikhola.

¹⁶Ne ise naawuliile bari iwe unyala waamba kamakhulu kaamwo, naluundi bari usontsoola bye kamakaanga. Ari, singa unyalisa khuusoma buurone ubwo, naluundi waamboolela ise kamakhulu kaamwo, kane ukwaarisibwe ingubo imbesemu, bakhukwaarise ni kumukuufu kw'ezaabu mwikosi, khukhwookesanisa biri uli uwe angaaki, naluundi ube ukhola khataru mu bukhulu bwe buyiinga.”

¹⁷Danieli waakobolamo umuyiinga ari, “N'ulekhe biwaanwa byoowo bibe, namwe ubiwe umuundu ukuundi. Ne shitweela busa kane ise ikhusomele iwe buurone ubwo, naluundi ikhuboolele iwe kamakhulu kaamwo.”

¹⁸Uwe lukoosi, Wele uwe angaaki ekesa paapa woowo Nebukaduneza khuuba umuyiinga uwe angaaki, naluundi wamuwa lukoosi ni shiriifwa.

¹⁹Khulwe khuuba uwe kamaani, waakila abe babaandu boosi, ni kamanaambo koosi, ni tsikholo tsyoosi, abe tsimurya naluundi tsyaamwiyembeelela naabi. Abo abe beesi aakanatsaka khukhwiira, eraatsaka; abo abe beesi aakana ari babewo baalamu, aabalekha baabawo baalamu. Iliwo abo beesi ekanisa waabawa bukhulu; iliwo abo beesi niye aakhabirisa buulayi ta.

²⁰Ne khulwekhuuba ekela uwiniinisa angaaki naabi, waaba uwe shikili, umurafu naabi, bamurusa mu buyiinga bweewe, ni mu shifwo she lukoosi abe sheesi niye alimo.

²¹Baamutimisa khukhwaama mu lituuli lye babaandu, waakila ni bibyambaaso byeewe byaaba busa nga bye isolo iye mwiiswa. Waamenyatsaka ni tsisikilya, waayatsaka bunyaasi nga ikhaafu, liime lyaamuroonyatsakakho. Bino byaba biryo khukhwoolisa n'amanya ari Wele uwe mwikulu niye uwula buyiinga bwe babaandu, naluundi anyala waawa umuundu yeesi buyiinga, isi niye umweene aba wekanisiile khuuwa.

²²“Ne iwe Belishaza, umwaana weewe, ikhaba nga waamanya bibiindu bino byoosi, ne nawe waakhaasikha khuuba uwiwombeekha isi Wele.

²³Iwe waakholile byeesi Wele akhakana ta, ni walakiile baasuta bikopo, ni bipwaakhuli byeesi baasuta khukhwaama mu Lisaayilo Likhulu, nio iwe, ni baraangirisi be mu buyiinga bwoowo, ni baakhasi boowo, ni baakhasi boowo b'ebulafu, mwaabinyweelamo iviini. Mwakhola shino nga muruuya ba wele b'ezaabu, ni b'efeetsa, ni ba buroonzi, ni be biibya, ni be bisaala, ni be kamabaale. Ba wele bano beesi inywe mwaruuya, sibali ni tsimoni, namwe ni kamaru, namwe baamanya shishiindu shoosi ta. Ne inywe mwaalekha khuruuya Wele, uwabawa inywe buulamu naluundi ubaliinda inywe.

²⁴Iyo niyo ilomo ikila Wele aruumanire kumukhono ukwo khukhwiitsa khurona biilomo ibyo.

²⁵“Bibyaronebwa biloma biri: MENE, MENE, TEKEL, ni PARISIN.[2]

²⁶Kamakhulu kaamwo kaloma kari, MENE, ‘Wele waamalile khuubala biifukhu bye buyiinga bwoowo khukhwaama nga ni bwarakikha, khukhwoolisa ni bwakamileyo.’

²⁷TEKELI, ‘Wele waamalile khuukhupima iwe busiro bwoowo, waaboone nga uli busa nga likhuutsi.’

²⁸PARISIN, ‘Wele waakabananisilemo buyiinga bwoowo akari e ba Medi ni ba Pasiya.’”

²⁹Lwanyuma lwayo, Belishaza waalakila bakwaarisa Danieli bikwaaro biibesemu, ni kumukuufu mwikosi, nga byookesanisa biri ali ni buukhulu. Lwanyuma kila bakuukuula bari Danieli ali niye ukhola khataru mu bukhulu bwe buyiinga.

³⁰Mu shilo she shifukhu sheene isho, ba Babulooni beetsa baakhoonya Belishaza, umuyiinga we Babulooni.

³¹Kila Dariyusi, uwaama i Medi, abe uwoolesa kimiiko kye bukhulu kamakhumi kasesaba na kibili (62), awaamba bukhulu, ekela umuyiinga.