Read lumasaaba Danieli 6 Bible Online

Danieli 6 - lumasaaba bible

Danieli 6

¹Umuyiinga Dariyusi waakhalawo khuurobora ba gafana shitoondo shitweela ni kamakhumi kabili (120), khuuba bawuli mu buyiinga bweewe bwoosi.

²Angaaki wa bano, waarobora naluundi waarawo Danieli ni babaandi babili, khuuba nga nibo babaaloleelela buuraambi bwe ba gafana abo. Nga ba gafana basontsoola bataru bano, nio nabo baatsya basontsoola umuyiinga ibyo bibiili khuukholikha mu buyiinga bweewe.

³Lwanyuma Danieli wookesanisa khuuba nga ali umuraambi uwe kamaani khuuminyisa basheewe baabili, ni ba gafana boosi. Khulwekhubeela abe Danieli ali umuraangirisi umulayi, umuyiinga waashambaasakho ari amwikese niye khuuba uraangirira buyiinga bwoosi.

⁴Ne shino shaakila ba gafana, ni basheewe ba Danieli baabili, baaweentsa ilomo isi banyala baawaambilisilakho, baamuwaabile isi umuyiinga, khu biwaamba khu buyiinga. Ne baalekha khunyoola ilomo yoosi, namwe she khuumwiŋuluŋuunyakho ta, khulwekhuuba abe ali umulayi naabi, nga s'aakholakho shishiindu shoosi shiibi ta.

⁵Kila basaani abo beekuta, nga baloma bari, “Mbaawo ilomo ikiindi isi khunyala khwaamisilakho khuuwaabila Danieli ta, akhali nga iwaambakana ni likaambila lya Wele weewe.”

⁶Kila basheewe ba Danieli ni ba gafana abo bafukiilisana, baatsya isi umuyiinga bamuboolela bari, “Uwe lukoosi, umuyiinga Dariyusi, khali upilewo khabili!

⁷Ifwe baraangirisi be mu buyiinga fweesi, nga mulimo babaloleelela buraambi bwe ba gafana, ba gafana babaali aasi e ba gafana, ni baraangirisi babaandi, khwaafukiilisaane khuri umuyiinga, iwe urewo likaambila lye kamaani naabi lyeesi fweesi khuli ni khuuloondelela, naluundi uli ni khuubonela ilala uri liraamba, nga mbaawo ulifuniaaka ta. Libe liloma liri khuumala biifukhu kamakhumi kataru bibiitsa mu moni, mbaawo umuundu uloomba shishiindu isi wele yeesi, namwe isi umuundu yeesi ta, akhali khuloomba khukhwaama isi iwe wenyene. Uyo yeesi ukhaloondelela likaambila ilyo ta, ali ni khutuumibwa mu lilowo lyeesi baabayilamo tsitalanyi.

⁸Nashiryo ari umuyiinga, iwe rawo likaambila ilyo wisekho ni kumukhono kwoowo, nio ilekhe khubawo umuundu yeesi ulishuusamo ta. Libe nga liloondekhana ni kamakaambila ke ba Medi ni ba Pasiya, nga silinyala lyashuusibwamwo ta.”

⁹Ni nashiryo umuyiinga Dariyusi waarakho kumukhono kweewe khu shiwaandiikho isho shekela likaambila.

¹⁰Danieli n'ashimanya ari umuyiinga weesile kumukhono khu shiwaandiikho isho, waatsya ingo weewe. Waaniina khu nuungo ndweela iye mu ntsu yeewe, khu luubeka luluulikho kamatilisa kakaaloleleele Yerusalemu. Nga woolile ibweene iyo, waakhola nga abe n'akholatsaka: waafukhamila aasi khu meesikamo keewe, waaloomba Wele, naluundi waamuruuya, nga akhola shino kimiluundi kitaru.

¹¹Baasiku ba Danieli ni baafukiiliisana, baatsya ingo weewe, baamunyoola nga alikho aloomba isi Wele.

¹²Kila lwanyuma boosi baatsya isi umuyiinga bawaabilayo Danieli. Baaloma bari, “Uwe lukoosi, iwe weesile kumukhono khu shiwaandiikho naluundi waarusa likaambila liliiloma liri, khuumala biifukhu kamakhumi kataru, mbaawo umuundu yeesi uloomba isi wele, namwe isi umuundu ta, akhali isi iwe wenyene. Umuundu ufuniaaka likaambila ilyo ali ni khuutuumibwa mu lilowo lyeesi baabayilamo tsitalanyi.” Umuyiinga weelamo ari, “Likaambila ilyo liliwo, naluundi buli mutweela ali ni khuuliloondelela. Lili lye ba Medi ni ba Pasiya, naluundi mbaawo umuundu unyala khuulirusawo ta.”

¹³Kila basaani baatsana balomela umuyiinga bari, “Danieli uwatsana, uuli mutweela khu babowe khukhwaama mu Yuda, s'aloondelela likaambila ilyo ta. Buli shifukhu aloomba isi Wele weewe kimiluundi kitaru.”

¹⁴Umuyiinga n'awulila bilomo bino, byaamutaambisa naabi bibyambaaso byeewe, waheentsa kumukhoosi kwe khuuwonesa Danieli. Waarekana ni shishiindu isho khukhwoolisa angoloobe.

¹⁵Lwanyuma baasiku ba Danieli baakoboolayo isi umuyiinga baamulomela bari, “Uwe lukoosi, uli ni khuushebulila uri lino lili likaambila lye ba Medi ni ba Pasiya. Nashiryo likaambila lyeesi umuyiinga areerewo silinyala lyashuusibwamo ta.”

¹⁶Nashiryo umuyiinga waalakila, bawaamba Danieli baamutuuma mu lilowo lye tsitalanyi. Nga bashiili khumutuumamo ta, umuyiinga waamulomela ari, “Khali Wele woowo, isi iwe wisaaya busheele, akhuwonesele khukhwaama mu meeno ke tsitalanyi.”

¹⁷Lwanyuma lwayo baareera libaale liboofu baalira khu mulyaango kukwiingila mweesi baabayila tsitalanyi. Umuyiinga waarakho khaabonelo kheewe, weesakho ni khaabonelo khakhokesanisa khari umweene niye uwikaalewo, naluundi mbaawo umuundu yeesi uwikulawo ta. Ibyo byookesanisa biri, mbaawo abe shishiinyala shaawonesa Danieli ta.

¹⁸Kila lwanyuma lweebyo umuyiinga weelayo ingo weewe, waamalakho shiilo isho nga abuya ntsala. Mu shilo isho shoosi s'afukiilisakho ari bamukholeleyo bibiindu bibimusangaasa nga abe tsindaalo ta. Ni liilo lyaamulobela ilala.

¹⁹Antsye ni bwabululuukha, umuyiinga wenyukha waatsya mu khaangu naabi isi lilowo lyeesi baabayilamo tsitalanyi.

²⁰Nga woolile aambi ni lilowo ilyo mweesi baatuuma Danieli, kila alaanga ni khuurya khuukali, nga aloma ari, “Danieli, umwakaanisi wa Wele umulamu, Wele uyo isi iwe wisaaya buli busheele, waakhuwonesele iwe khukhwaama mu meeno ke tsitalanyi?”

²¹Kila Danieli elamo waaloma ari, “Umuyiinga, khali upilewo khabili!

²²Wele wase isi ise nisaaya, aakaanisile malayika weewe, wekala kiminwa kye tsitalanyi, tsyaalekha khukhuukholakho ise shishiindu shoosi ta. Khulwekhuuba ise siindikho ni kumusaango kwoosi isi niye ta. Ikhaba isi iwe, uwe lukoosi, mbaawo buubi bweesi ndi ni nabwo ta.”

²³Umuyiinga waaba ni kumwikhoyo kumukali naabi, waalakila ari baruse Danieli mu lilowo tsana. Kila bamurusa mu lilowo, baabona nga mbaawo shishiindu shoosi shishimukholikhilekho ta, khulwekhuuba niye yaba weyikinile Wele.

²⁴Kila umuyiinga alakila ari basaani abo babaakhupa Danieli liiyino, bali ni khuutuumibwa mu lilowo lye tsitalanyi. Nga abe bali ni khuubatuumamo atweela ni bakhasi baabwe, ni babaana baabwe. Baryo ni baatsya khukwa mu lilowo bari, tsitalanyi abe tsyabakwiilekho khaale, tsilikho tsibalya, ni kamakuumba kaabwe keene koosi.

²⁵Kila lwanyuma umuyiinga Dariyusi aronera babaandu boosi, be kamanaambo koosi, ni tsikholo tsyoosi, buurume bubuuloma buri: “Naabashesele mweesi, nga imbakanisa lukoosi.

²⁶Ise naarusire likaambila mu buyiinga bwase nga liloma liri, buli mutweela ali ni khukhwisaaya, ni khukhwiisamo Wele wa Danieli shiriifwa. Khulwekhuuba ali Wele umulamu, naluundi ali umuwuli uwe biilo ni biilo. Buyiinga bweewe sibulyoonakisibwa ta, ni kamaani keewe sikalyaakama ta.

²⁷Niye awonesa naluundi waamusa, akhola bye kamakaanga ni bibiyaangisa khu shibala ni mwikulu mu ngaaki. Wele uyo, ali niye uwonesele Danieli, khukhwaama mu meeno ke tsitalanyi.”

²⁸Nashiryo Danieli yuno waarama nga ali mu biifwo bye bukhulu mu biseela bye buyiinga bwa Dariyusi, ni buyiinga bwa Sayiraasi, umu Pasiya.