Read lumasaaba Danieli 8 Bible Online

Danieli 8 - lumasaaba bible

Danieli 8

¹Mu mwiiko kukuukhola khataru nga Belishaza ali umuyiinga, aabawo shishambonekhela ise, nga kuno kumuluundi kukuukhola khabili.

²Mu shambonekhela shino, ise nenyoola nga mu khaangu busa ise ndi mu shiriimba shilaangibwa Susa, sheesi kuutikiiyi kwibotokheleele. Shino abe shili mu shisiintsa shishiilaangibwa shiri Elamu. Ise nenyoola nga neemikhile aambi ni Luluutsi Ulayi.

³Ise ni nenyusa tsiimoni, naabona limiiku nga lyeemikhile khu ndulo khwe luluutsi ulwo. Abe lili ni tsiintsika tsibili tsindeeyi, ne nga lutweela luleeyi khuuminyisakho lulwasheewe. Abe luluuli luleeyi khuuminyisa luluundi, nilwo lwaarura lwanyumakho khu lwasheewe.

⁴Ise naabona nga likulukha lilola kwe bukwanyaanga, ni ngaaki, ni mwaalo. Nga mbaawo unyala waawonesa shishiindu shoosi khukhwaama mu maani kaalyo ta. Lyaakhola nga ni likana, naluundi lyoola khukhwiniinisa angaaki naabi.

⁵Ise ni naba nga ishiyaanga sheesi shino shimanyisa, aabawo imbusi indurume iyaama kwe bukwanyaanga, nga ilikho isuna busa, nga ni bikele byayo sibiimikha ni aasi ta. Imbusi yino abe ili ni lulwiika lutweela nga luli akari e tsimoni tsyayo, nga lwaayirurukhila busa.

⁶Kila indurume iyo itsya isi limiiku lyatsana, lyeesi ise nabona nga lyeemikhile khu ndulo khwe luluutsi. Yaatsya nga itima ni kamaani kaayo koosi.

⁷Ise naabona nga indurume iyo yibwakala limiiku. Abe indurume yaarafwiile naabi, waakila yaakuunya limiiku, yaafuniaaka ni tsiintsika tsyalyo tsoombi. Limiiku abe sililikho ni kamaani kakaanyala kaasoolana ta. Indurume yaalikhupa aasi, yaalikhaandakilila, nga mbaawo unyala waalitseeta nilyo khukhwaama khu ndurume ta.

⁸Kila indurume iyo yiniinisa naabi angaaki. Ne nga yaabonekhele khuuba nga ili iye kamaani naabi, lulwiika lwayo lwaafunikha. Kila mu shifwo she lulwiika ulwo, tsiintsika tsitsiindi tsirura nga tsyerurukhiliile busa. Ne nga buli luluubira lwaaloleelele khu lubeka lulwalwo busa.

⁹Aabawo lulwiika luluundi lulwaba lukeekhe, lulwatsowa khukhwaama mu tsiine itsyo. Uluno lwatsowa lweekha naabi khu luwaande lw'emwaalo, n'ibwaamanyaanga, luwaande lwe shiibala she ba Isiraeli.

¹⁰Lwatsowa lwaaleeya naabi, lwoola ni mwikulu mu ngaaki. Lwebwakala ni liiye lye mwikulu, lwamwaata liilala aasi, lwaalikhaandakilila.

¹¹Indurume iyo yeniinisa naabi angaaki, yaaminyaalila ikhaba n'Umuwuli uwe liiye lye Mwikulu. Yaakila yaakamisa ni khukhwisaaya abe khukhuubawo busheele, yoonakisa ni Lisaayilo Likhulu.

¹²Yeyilila liiye ni tsisaayilo tsa busheele khuuba tsitsyabyo khuubirira mu byoonako. Lulwiika ulwo lweloosela khukhwiyiinga ni khukhwiniinisa angaaki, waakila bwaŋali bwaatumibwa aasi khwiiloba. Yakhola bino luundi yabalaaha naabi.

¹³Kila ise imbulila malayika nga areeba shireebo. Kila malayika ukuundi amwiilamo nga aloma ari, “Bibiindu bino bibyabonekhela mwiibyo bibyabonekha, bikhaabewo khukhwoolisa liina? Kane shiibi she mbikho shino shiile mu shifwo she tsisaayilo tsa busheele khukhwoolisa liina? Kane bakhaandakilile liiye lye mu ngaaki ni Lisaayilo Likhulu, khukhwoolisa liina?”

¹⁴Kila malayika uyo elamo uwashe nga aloma ari, “Shino kane shibewo kumutikhinyi ni angoloobe buli shifukhu, khuumala bifukhu bikana bibili ni bitoondo bitaru (2,300)[3] Nio lwanyuma lwayo Lisaayilo Likhulu liisibweyo mu shifwo shalyo.”

¹⁵Ari nga ise Danieli naaboone kamarooro ako, naakhakakho naabi khuumanya kamakhulu kaamwo. Khaangukho, aabawo shishaantsima ise ibweeni, nga shili ni mbonekha nga iy'omuundu.

¹⁶Kila ise imbulila liikono ly'omuundu nga liitsila khu meetsi ke luluutsi Ulayi khu ngaaki, nga liloma liri, “Gabulyeli, n'usontsoole umuundu uyo amanye byeesi aboone.”

¹⁷Gabulyeli wesheenda aambi, weetsa weemikha isi abe ise indi. Nga waantsitsileyo, ise naaba ni khuurya khuukali naabi, waakila naakwa aasi mafuumala. Ne waanomela ise ari, “Musaaniwe, uli ni khuushimanya uri, bibiindu bibikhubonekheele iwe, bili bibiiwaamba khu ntsakamo iye shiibala.”

¹⁸N'aaba nga ashikanikha aryo, ise nayekheleela naaba nga ndi aasi mafumala mu lilo lye kamaani. Ne wamaamba ni kumukhono kweewe, wantsinyusa neemikha khu bikele byase.

¹⁹Kila anomela ise ari, “Waaboone, ise ndikho ikhwookesa iwe lirima lya Wele nga ni likhaabe. Bibiikhubonekheele iwe ibyo, biwaamba khu ntsakamo iye shiibala.

²⁰“Limiiku lyeesi iwe uboone nga lili ni tsiintsika tsibili, ibyo byookesanisa bayiinga babili: uwa Mediya, n'uwa Pasiya.

²¹Indurume, yookesanisa umuyiinga uwa Buyonaani. Lulwiika lulwirurukhiliire lwe akari e tsiimoni tsyayo, isho shookesanisa umuyiinga umukiboole.

²²Tsiintsika tsana tsiine tsitsirurire nga lukiboole lwaamalile khufunikha, tsyokesanisa buyiinga bwe kimiluundi kine, bubukhabewo nga baamalile khukhwawukhanisamo linaambo ilyo. Ne buno sibukhaabe ni kamaani nga buyiinga bukiboole ta.

²³“Nga intsakamo iye buyiinga ubwo bwoosi ili aambi khukhwoola, naluundi nga bwoosi bwekelile bwe bibyoonako naabi, bakhaabuwe shitaambiso. Ne ikhaanyoowe khuubawo umuyiinga uliitsa uuli uwe shikili, umwoonaki, naluundi umunywaanywa naabi.

²⁴Buyiinga bweewe bukhaabe bwe kamaani naabi, naluundi akhoonakise naabi bibiindu biikali. Akhaanyalise khuukhola buli sheesi niye akana shoosi, naluundi onakise babaandu be kamaani, atweela ni babaandu babesaaya Wele.

²⁵Khulwe khuuraambisa kamakhula ke buulyakhani, akhaanyalise khuukhola bye bubeeyi biikali naabi. Akheniinise umweene naabi angaaki. Akheere babaandu baakali nga siwanyooyile khubareewura khu shiindu shoosi ta. Akhaaminyaalile ikhaba Umuyiinga we bayiinga. Ne Wele umweene akhaafuniaake kamaani k'omweene uyo, nga s'abirirakho mu muundu yeesitsana ta.

²⁶Byeesi iwe uboone bibiwaamba khusaayilo tsye kumutishinyi ni angoloobe, ise imalile khukhusontsoola iwe, naluundi bili bya ŋali. Ne ari uli ni khuubiliinda mu shimoonyo busa, khulwekhuuba bino bikhaakholikhe mu mbuka iye aleeyi naabi khukhwaama ari.”

²⁷Ise Danieli, bibiindu bino byaamalamo kamaani, waakila naaba umutsiina khuumala biifukhu biikali busa. Lwanyuma ise ni nawumbuutsa khukhwaama mu butsiina ubwo, neelayo khu buraambi bweesi abe umuyiinga aamba ise khuukhola. Ne ibyo byeesi ise nabona byantsiyaangisa naabi, ne nga mbaawo umuundu abe ubimanya ta.