Read lumasaaba Danieli 9 Bible Online

Danieli 9 - lumasaaba bible

Danieli 9

¹Aabawo umusaani isi abe balaanga bari Dariyusi, nga ali umwaana uwa Ahasweero, nga bali be linaambo lye ba Medi. Dariyusi yuno wekela umuyiinga uwe ba Babulooni.

²Mu mwiiko kweewe kukuunyoowa kwe buyiinga, ise Danieli nemenieelesa mu bitabo bikhosefu, shishiindu shishiwaamba khu miiko kamakhumi musaafu (70) kyeesi Yerusalemu ili ni khuurama busa nga kamakubili. Ishino shaba nga shiloondekhana ni tsiilomo tsyeesi Wele aaloma, nga abirira mu muŋoosi Yeremiya.

³Kila ise inoomba ni kamaani isi Umukasya. Naalomba nga imwikoontselela, nga imbuya intsala, nga nakwaarire bikwaaro bye bukoongwe, naluundi niikhala mwikoshe, khukhwookesanisa kumutaambo.

⁴Ise naloomba isi Umukasya Wele wase, nebiyisa bibyoonako byase ni bye babaandu beesi ise isaalikhamo. Naaloma indi, “Umukasya Wele, iwe uli uwe angaaki naabi, naluundi iwe uli uwe shiriifwa. Iwe uli umwiyikinwa isi abo babaaloondelela indakaano yoowo. Naluundi abo babaaloondelela kamakaambila koowo, iwe ubokesanisa nibo khuukana khukhuukhawawo ta.

⁵“Khulwekhuuba ifwe khwaakhola bibyoonako mu moni tsyoowo, ifwe khwaakhola bibiindu biibi, khwaayibirisa buubi, naluundi khwaakhuminyaalila iwe. Ifwe khwaayantsukha kamakaambila koowo, n'indeekela yoowo.

⁶Ifwe sikhwarekeeresa byeesi babaakaanisi boowo, baŋoosi, bakhuleekela ifwe ta. Nga ni baakanikha isi bayiinga beefwe, ni baawuli beefwe, ni bakuuka beefwe, ni isi babaandu boosi, nibo baaba balikho bakanikha mu lisina lyoowo.

⁷Umukasya, buli busheele iwe uli umukhosefu, ne ifwe busheele khwireerera fwabeene kamaŋaanyu. Shino shili sha ŋali, khulwekhuuba bibyoonako byeefwe nibyo bibyakila iwe waasalanisa babaandu be mu Yuda, ni be mu Yerusalemu, ni be mu Isiraeli boosi, mu manaambo kakaandi.

⁸Umukasya, ifwe fwabeene, ni bayiinga beefwe, ni baawuli beefwe, ni bakuuka beefwe, khwayoonaka mu moni tsyoowo, ni nashiryo khuli ni khuswaala khuukali naabi.

⁹Yakhaba nga ifwe khwakhuminyaalila iwe, ne iwe Mukasya, Wele, uuli ni shiisa shikali naabi, naluundi wiyakhila bibyoonako bye babaandu.

¹⁰Iwe ni wakhuwa ifwe kamakaambila koowo nga ubirira mu bakaanisi boowo, baŋoosi, Mukasya Wele, ifwe sikhwakaloondelela, namwe khwarekeeresa byeesi iwe waloma ta.

¹¹Ba Isiraeli boosi baafuniaaka kamakaambila koowo, baakhuminyaalila iwe, baalekha khuuloondelela byeesi iwe uloma ta. Ni nashiryo biitsubo bibyaronebwa mu makaambila ka Musa, umwakaanisi woowo, byaakhukwa khus'iifwe. Khulwekhuuba ifwe khwakhola bibyoonako mu moni tsyoowo.

¹²Umukasya, iwe waakhwoolisile ifwe khu kumutaambo kuno, khuuŋaŋasa biilomo byeesi Musa aaloma bibikhuwaamba khuusifwe ni baawuli beefwe. Khulwekhuuba khu shibala shoosi, mbaawo shiifwo shishiindi shishifunile shitaambiso nga sheesi Yerusalemu ifunile ta.

¹³Shili busa nga ni sharonebwa mu shiitabo sha Musa. Khulwekhuuba, ikhaba nga kumutaambo kuno kwakhukwa khus'iifwe, ne shitweela busa sikhwashuusakho khwekoontselela Umukasya Wele weefwe ta. Sikhwashuusakho khwaarura khu byoonako byeefwe, khwarekeeresa bya ŋali byeesi niye aloma ta.

¹⁴Ni nashiryo, ilala Umukasya, wakhwoolisa khus'iifwe kumutaambo kweesi niye aasuubisa. Khulwekhuuba Umukasya Wele weefwe ali umukhosefu ni byeesi akhola byoosi bili biikhosefu. Ifwe khwaaminyaalila byeesi niye aloma.

¹⁵“Ni nashiryo, ari Mukasya, Wele weefwe, nga iwe niye uwareera babaandu boowo, nga ubaamisa mu shibala she ba Misiri, nga uraambisa kamaani, babaandu bashikhebulila kamaani koowo khukhwoolisa ni shaleelo. Ifwe khufukiilisa khuri khwayoonaka, naluundi khwayibirisa buubi.

¹⁶Mukasya, khulwe bibiindu bikhosefu byeesi iwe ukhola, khali wiyakhiile shiriimba Yerusalemu, shiriimba shishiili khu lukiingi lwoowo lukhosefu. Khulwekhuuba bibyoonako byeefwe, ni bye bakuuka beefwe, ni bye babaandu boosi, byaakila ifwe khwaayikela sheesi babaandu babaakhwibotokheleele ifwe, batsekhelela busa.

¹⁷Ni nashiryo ari, Wele weefwe, iwe n'urekeerese khuuloomba ni khuulila khw'omwakaanisi woowo. Khulwe lisiina lyoowo, Mukasya, n'ukobosewo Lisaayilo lyoowo Liikhulu, ari liliili busa nga likubili.

¹⁸Wele wase, n'ureke khukhuru khwoowo urekeerese; yiikula tsiimoni tsyoowo ubone kumutaambo kweesi ifwe khulimo, ni kumutaambo kweesi Yerusalemu shilimo. Khulikho khukhulilila iwe khulwekhuuba iwe uli ni shiisa shikali, akhuba indi ifwe khuli bakhosefu ta.

¹⁹Mukasya, iwe n'urekeerese khuulila khweefwe; Mukasya, n'ukhwiyakhile; Mukasya, n'ukhurekeerese ifwe, ubewo ni sheesi iwe ukhola. Wele weefwe, khulwe buulayi bweefwe, iwe ukhekhwekhweesa mu khukhuyeeta ifwe ta. Khulwekhuuba shiriimba shino ni babaandu bano, bali baboowo.”

²⁰Ise ni naba nga indi khuukanikha indyo, nga inoomba ndi Umukasya antsiyakhile ise ni ba Isiraeli boosi bibyoonako byeefwe, nga nikoontselela mu moni tsy'Omukasya, Wele weefwe, indi esewo bushaakha Lisaayilo lyeewe Liikhulu.

²¹Ni naaba nga ishiloomba indyo, Gaburieli tsana isi nanyoowa khubona makiboole mu byambonekhela ise, wantsitsayo isi indi mu khaangu naabi. Yaba abe ili imbuka iye khuuwaanayo isaayilo iye angoloobe.

²²Weetsa waanomela ise ari, “Danieli, ise neetsile khuukhuwa iwe khuumanya ni kamakhula.

²³Nga isi urakikhiile khukhwikoontselela Wele, niye akhuweele iwe byeesi uloombile. Ni nashiryo, ise neetsile khukhuboolela iwe shishiindu shino. Khulwekhuuba Wele akhukana iwe naabi. Ni nashiryo, rekeeresa ise ikhusontsoole ilomo iyo.

²⁴“Bibiwaamba khu baandu boowo, ni shiriimba shiikhosefu, Wele waakhalilewo ari kane imale khuubirawo kimiiko bitoondo bine ni kamakhumi sheenda (490), nga niyo mbuka iye kimiiko kamakhumi musaafu, kimiluundi musaafu, nio babe nga bali baalekhuule. Kane abeyakhile bibyoonako byaabwe, areerewo bwaŋali bwe biilo ni biilo, nio akile byeesi iwe uroorire bikholikhe nga ni bibeele, ni Lisaayilo Liikhulu liweebwe tsiikhabi bushaakha.

²⁵Nashiryo iwe uli ni khuumanya uri, khukhwaama khu mbuka isi likaambila lye khukhwombakha bushaakha Yerusalemu nga lyarusibwire, ni khukhwoolisa nga umurobore uw'Omukasya weetsile, kane ibirewo kimiiko kikyoola musaafu kimiluundi musaafu. Ise ikhombakhe Yerusalemu bushaakha, nga ilimo kimikhoosi ni tsiimako tsye kamaani, ibewo khuumala imbuka iye tsisabiiti kamakhumi kaseesaba na tsibili (62). Ne iyo ikhaabe imbuka iye bihangafu biikali naabi.

²⁶Nio lwanyuma lwe tsisabiiti kamakhumi kasesaba na tsibili itsyo, bakheere umurobore wa Wele, akhali ilomo yoositsana ta. Liiye ly'omuwuli uwe kamahe kakaakhebwaakale, likhoonakise shiriimba ni Lisaayilo Liikhulu. Intsakamo iyo ikheetse ibamaamile busa nga luluutsi lwe kameetsi lulwitsuule, nga ireera busoolo ni khukhwoonakisa bibiindu, khweesi Wele amala khaale khuurawo.

²⁷Umuwuli uyo akhaakhole indakaano iye kamaani ni babaandu baakali khuumala biifukhu musaafu. Lwanyuma lwe mbuka iyo khukhwoola khukari, akhaalakile ilekhe khubawo tsisaayilo namwe biwaanwa isi Wele ta. Umuwuli uyo akhaarewo shishiindu she mbikho mu shifwo shikhosefu she Lisaayilo Liikhulu. Shishiindu isho shikhaaramewo, khukhwoolisa nga khuuloondekhana ni byeesi Wele aarawo khaale, Wele umweene n'arusawo umuundu uyo uwashirawo.”