Read lumasaaba Hoseya 1 Bible Online

Hoseya 1 - lumasaaba bible

Hoseya 1

¹Buurume bw'Omukasya bubweetsa isi umuŋoosi Hoseya, umusooleli wa Beeri, mu mbuka iye buwuuli bwa Uziya, Yosamu, Ahazi, ni Hezekiya, nga nibo babaatsya baloondekhana nga baayiinga ba Yuda, ni Yerobowamu umusooleli wa Yowashi, nga niye umuyiinga wa Isiraeli.

²Nga Umukasya nio arakikha khuukanikha isi babaandu ba Isiraeli nga abirira mu muŋoosi Hoseya, aalomela Hoseya ari, “Tsya uyile umukhasi uuli malaaya, usaale ni naye babaana be bwamalaaya. Shino kane shookesanise isaambo isi ba Isiraeli beebirisile nga bamalaaya, baalekha Umukasya, baatsya baaloondelela luundi besaaya ba wele babaandi.”

³Aryo Hoseya waatsya waayila Gomeri, umukhaana wa Dibuulayimu. Lwanyuma Gomeri waaba shisoombo wasaalila Hoseya umwaana umusiinde.

⁴Kila Umukasya amulomela ari, “Umwaana uyo mutwiikhe lisiina uri Yezureeli, lwekhuuba ise ndi aambi khukhwiitsa imbe shitaambiso luruungo lwe be muungo mwa Yehu, nga niiliyaasa kamafuki kakaatsutsukha lwe khuukhoonyaka babaandu i Yezureeli. Ilala indi khuutsya khuhesa buyiinga bwa Isiraeli bwoosi.

⁵Ni khu shifukhu khweene ukhwo, mu litila lya Yezureeli, ise ikhaafuniaakake kamaani ka Isiraeli ke khuusoolana koosi.”

⁶Lwanyumakho Gomeri waahesa luundi, waasaala umwaana umukhaana. Kila Umukasya ndi alomela Hoseya ari, “Umwaana uyo mutwiikhe lisiina uri, Lorukhama-Ukhali umukane ta, lwekhuuba siintsya khwiiloosela khukhwookesanisa khuukana khwase isi babaandu ba Isiraeli, namwe imbeyakhile na khakyeekhe khoosi ta.

⁷Ne ise ikhokyesanise khuukana isi babaandu ba Yuda. Ikhaabawonese khukhwaama isi baasiku baabwe, nga sinaambisa buyiingo, namwe lurima, namwe busoolo, namwe bari inaambise tsiŋwaaŋwa ni basaani babaatsikyeendelakho ta, ne ikhaaraambise buunyala nga Umukasya Wele waabwe.”

⁸Nga Gomeri waamalile khuurusa umwaana Lorukhama khu mabeele, waahesa luundi, waasaala umwaana umusiinde.

⁹Umukasya waalomela Hoseya ari, “Umwaana yuno mutwiikhe lisiina uri, Lo-Ami, shishimanyisa shiri Sibali-Babaandu-Baase ta, lwekhuuba babaandu ba Isiraeli sibali babaandu baase ta, ni nase siindi Wele waabwe ta.”

¹⁰Ne imbuka ikhoole, isi babaandu ba Isiraeli bakhaayiimbe babe baakali, bakhaafwaane busa nga kumuyekhe kukuuli khu ndulo khwe nyaantsa, nga mbaawo n'umuundu unyala waababala ta. Ni mu shifwo mweene umwo mweesi baabalomela bari, “Inywe simuli babaandu baase ta,” bakhaashuukhe babalomele bari, “Inywe muli babaana ba Wele umulamu.”

¹¹Lwanyuma nio babaandu ba Yuda ni babaandu ba Isiraeli babusane atweela. Abweene awo bakhaarobore umuraangilisi mutweela ukhaabaraangilile boosi, baryo banyale khuukyeenda bakobole ingo khukhwaama mu shibala she bubowe. Lwekhuuba shifukhu sha Yezureeli shikhaabe she kamaani naabi!