Read lumasaaba Hoseya 10 Bible Online

Hoseya 10 - lumasaaba bible

Hoseya 10

¹Babaandu ba Isiraeli bafwaana busa nga kuusaala kumusabibu kukwabalaaha buulayi, nga kulikho kamatuunda kamakali. Ne kimisabibu kyaabwe nga ni kyeloosela khuuyiimba buukali, nabo baryo beloosela khukhwombekha bibyeeso bye bawele babaandi. Nga likyesa lye kamatuunda kaabwe nilyeloosela, nabo baryo beloosela khuumiliisa bibyeeso bye kamabaale isi besaayilakho.

²Kumwoyo kwaabwe kuli kumuwombesi naabi, nashiryo bali ni khuusasulibwa lwe buubi bwaabwe. Umukasya umweene kane afuniaakake bibyeeso byaabwe, akhupakake bifwaani byaabwe byeene.

³Lwanyuma bakhaakyelewo balome bari, “Ifwe sikhuli n'umuyiinga ta, lwekhuuba sikhurya Umukasya ta. Ne abe khwaakhaba nga khuli n'umuyiinga mweene, niye yaandikhukholeele shiina?”

⁴Babaandu bano bakanikha biilomo bye kamatsi busa, baakhola ni tsindakaano tseesi bakhanyala boolelesa ta. Isho shaakila baalekha khuba baŋali mubeene bonyene na bonyene ta, shafwaana nga kumusiru kwe buutwa ni kurura mu mukuunda kweesi bamalile khuulima.

⁵Babaandu babaamenya mu Samariya bekhala baariire busa, nga bambaasa khu shiindu shishinyala shaakholekha khu shifwaani shaabwe she kumoosi shishiili i Besi-Aveni. Babaandu baayo bakhaantsuwe khulwe shifwaani isho, atweela ni basaayi baabwe beene, lwekhuuba shiriifwa she shifwaani isho shikhaabe nga shaashirusibwilekho.

⁶Shifwaani shino shikhaasutibwe shiyilibwe nga shiwaanwa isi Umuyiinga wa Asiriya umukhulu. Efurayimu akhaaswaale, ni babaandu ba Isiraeli kamaŋaanyu kabawaambe, lwekhuuba beyikina shifwaani isho.

⁷Samariya atweela n'umuyiinga washo akhaakyelakyele ayilibwe, afwaane nga lisaafu ni likyelakyelela khu ngaaki khwe kameetsi.

⁸Biifwo bye khukhwisaayilamwo bye bubwoonaki bye Aveni, nibyo biifwo mweesi Isiraeli onekela, byoosi bikhoonakisibwe. Kamawa ni bunyaasi bikhaatsowe khu byeeso byaabwe. Awo nio lwanyuma babaandu belootsele tsinjiinji bari, “Khubiimbilile!” Ni bikoongo bari, “Ni mukhukwekho!”

⁹Umukasya aloma ari, “O Isiraeli, khukhwaamila ilala khu bifukhu bye Gibeya, iwe waayiloosela busa khukhwooneka, uryo waaramila ilala busa mu khwooneka ukhwo khwonyene. Sishikhaabe shiilayi buusoolo khuukwiila babaandu baboonaki be Gibeya?

¹⁰Ni nase samweene nga naashisiimile, ikhaabawe shiitaambiso. Ni kamanaambo kakaandi kakhaabasaangilile, lwe khuubawa shiitaambiso lwe buubi bweenywe bubuubiririre.

¹¹“Khaalekho, Isiraeli aaba nga iyeeyi iyamala khukhwiyika luundi nga iwuula iŋaano nga inyene yikanisa busa. Ne ari indi khuutsya khura likyooki mu milo mwayo. Indi khuutsya khuwaambila Yuda kamaani khuukhweesa imbako, ni Yakobo imuwaambile kamaani khuukhabala liiswa.

¹²Ari nimwibyaalile mwabeene mu bukwalaafu, mwikyesele likyesa lye khuukana khukhuukhawawo ta. Ni mukhabale liloba lilikhali liilime lye mu myoyo kyeenywe, lwekhuuba ari yino niyo imbuka iye khuweentsa Umukasya, nio manya waanyalisa khukhwiitsa, waabatsukhiililakho bukwalaafu.

¹³Ne inywe mwakhalawo mwebyaalila bubwoonaki, mwekyesela buubi bwonyene, naluundi mwaaliile bibyaamo bye bubeeyi bweenywe. Lwekhuuba mwakhalawo mweyikina kamaani keenywe, ni basoolani beenywe be kamaani.

¹⁴“Nashiryo busoolo butsya khubalukhawo akari mu baandu beenywe babeene. Kamatikiiyi keenywe ke khukhwiliinda kakhoonakisibwe, musaambo nyene isi Shalumani onakisamwo Besi-Aribeli. Baryo ba maayi ni babaana baabwe baabaminiaangulaka, baabeera.

¹⁵Ni musaambo nyene niyo ndweela, shikhaakholikhe khusiiwe, O Isiraeli, lwe bubwoonaki bwoowo buukali. Shiryo shifukhu she kumusaango nga sheetsile khwoola, umuyiinga wa Isiraeli akhaakhoonyibwe, aweelewo ilala.”