Read lumasaaba Hoseya 11 Bible Online

Hoseya 11 - lumasaaba bible

Hoseya 11

¹Isiraeli n'aba nga ashiili mukyeekhe, ise namukana naabi, naluundi khukhwaama mu Misiri nalaanga umusiinde wase.

²Ne nga nineloosela khuumulaanga ndyo, naye aryo waaba nga eloosela khukhuuntsawukhakho. Baatsya baawaanayo tsisaayilo isi Bayaali, ni khukhwoosha bubaani isi bifwaani.

³Ate nga ise samweene niye uwaleekela Isiraeli khuukyeenda, namuraangilila nga naamuwaambile kumukhono. Ne baalekha khuufukiilisa bari yaba ise niye uwabawonesa ta.

⁴Ise samweene niye uwaraangilila Isiraeli, nga imbakhweeselesa ni bubweela ni khuukana. Samweene nabarusakho buusiro bwoosi bubwababaakho, naamala nenama aasi, naabawa bye khuulya.

⁵“Ne ari nga babaandu baase ni bakhawulila ta, baryo bakheeleyo i Misiri, ba Asiriya bakhaabawule.

⁶Buusoolo bukhaakwe mu biriimba byaabwe, baasiku baabwe bakhaafuniaakake kimibya kye mu bilibwa byaabwe. Bakhaabyoonakisile ilala luundi babahese, ni tsiŋoonaŋoona tsaabwe tseene tsiwewo.

⁷Babaandu baase baakhalilawo ilala khukhuundura khusiise. Baryo bakhaalile nga belootsela wele isi baambaasa bari ali uwe kamaani, ne alekhe khuubayeeta ta.

⁸Iwe Isiraeli, ise inyala indyeena naakhururayo? Ise inyala ndyeena naakhulekha waatsyaka busa uryo? Inyala indyeena naakhuhesa waafwaana nga Adima, naakhukhola waafwaana nga Ziboyimu[1]? Kumwoyo kwase kutyeemuukha mukari musiise; ni khuukana khwase khwiloosela bwilooseli khuuba khwe kamaani.

⁹Taawe, ilala ise siinyala nokesanisa buurafu bwase buukali buryo ta. Singene noonakise Isiraeli imumalilewo ilala ta. Lwekhuuba ise ndi Wele, siindi umuundu ta. Indi Umukhosefu umenya akari musiinywe, naluundi singene niitsile mu lirima ta.

¹⁰“Babaandu baase bakhaakyeende nga banoondelela ise Umukasya. Ise samweene indibuutsa nga italanyi. Ilala indibuutsa, ni babaandu bakheetse nga banikina busa khukhwaama ibukwanyaanga.

¹¹Bakheetse banikina busa nga binywiinywi, bakheetse nga baama i Misiri. Bakhaanikine busa nga kamawuusi, bakheetse nga bakobola khukhwaama i Asiriya. Ni nase samweene ikhaabakobose ingo.” Ibyo byoosi Umukasya umweene niye ubiloma.

¹²Umukasya aloma ari, “Babaandu ba Isiraeli baantsibotokhelela ilala ni bubeeyi bwonyene, nga bewombesawombesa, ne Yuda niye waarama nga awulila Wele, warama nga ali umwiyikinwa isi uyo uuli Umukhosefu.