Read lumasaaba Hoseya 12 Bible Online

Hoseya 12 - lumasaaba bible

Hoseya 12

¹“Khuumala shifukhu shibuufu, babaandu ba Isiraeli batsya baaba baloondelela imbewo iyaama ibwaamanyaanga. Bubeeyi ni bituluungu bili buli aandu oosi. Batsya baakhola ikwangwaani ni Asiriya, baamala baakaanisa kamafura ke kuusaala ku olivu mu Misiri bari nio ba Misiri babayeete.”

²Ari Umukasya alikho ni kumusaango kweesi atsya khureera khu baandu ba Yuda, akhaawe babetsukhulu ba Yakobo bano shitaambiso, nga asintsiila khu saambo tsaabwe, aryo abaliyile lwe buuraambi bwaabwe buubi bweesi bakhola.

³Akhaba ni khu mbuka isi Yakobo aabeela nga ashiili muunda ya maayi weewe, aarekana ni waandaaye, naluundi n'amala khuutsowa, waarekana naabi ni Wele.

⁴Yakobo aarekana ni malayika, aryo waamuminya kamaani, lwanyuma waamwilootsela, luundi waamwikoontselela ari amuwe tsikhabi. Nga ali i Beseli, Yakobo mweene aakaanana ni Wele, ni Wele aakanikha ni naye ibweene iyo.

⁵Lisiina lya Wele nilyo Umukasya, Umukasya Wele Umunyali wa Byoosi.

⁶Ni nashiryo, ni mushuukhe mukobole isi Wele weenywe. Ni mwiibirise ni khuukana ni bwaŋali, naluundi mumenye nga mumwiyikina niye yenyene.

⁷Ne Umukasya umweene aloma ari, “Babaandu ba Isiraeli bali baalyakhani nga babaandu ba Kanaani, bakana naabi khuulyakhana baakuli baabwe nga baraambisa tsimintsaani tse bubeeyi.

⁸Lwanyuma buli mutweela ebuyila yenyene ari, ‘Ise naayiindila, naayikholela tsinusu tsingali. Mbaawo n'umuundu na mutweela uwamaamba nga ndi khuulyakhana ta. Nashiryo siindikho ni shishoonako shoosi ta.’ ”

⁹“Ne ise ndi Umukasya Wele weenywe, uwabaraangilila khuubarusa mu shibala she Misiri isi mwaba baabowe. Ari ndi khuutsya khubakhola mwiileyo luundi khuumenya mu tsiweema, nga ni mushikhola khu bifukhu bye kamayiiya.

¹⁰Ise samweene nakanikhatsaka isi baŋoosi, naluundi nabawa kamarooro kamakali ni tsinikha tseene.

¹¹Ne bona Gileyadi shaayonekha, ni babaandu baamwo sibalimwo kumukaso ta! Bawaanayo tsiwuunwa nga tsisaayilo i Gilugaali khu byeeso byeesi baakhola ni kamabaale. Ne kamabaale keene ako kakhaabuusibwe mu bituumi nga keesi babuusa khu ndulo khwe kumukuunda kweesi bamalile khuulima.”

¹²Yakobo aatitukha waatsya mu shibala sha Aramu, ibweeneyo waaraamba luukali nio waafuna umukyelama, aakhola kumulimo kwe bubwaayi bwe kamasheese khulw'omukyelama.

¹³Lwanyuma Umukasya waraambisa umuŋoosi waatsya khuurusayo babaandu ba Isiraeli khukhwaama mu Misiri, naluundi nga araambisa umuŋoosi mweene, khuubaloolelela buulayi.

¹⁴Ne babaandu ba Isiraeli baaraanganile Umukasya naabi, nashiryo Umukasya atsya khubakhalila kumusaango kwe khuufwa, nga abaliyila lwe bubwoonaki bwaabwe.