Read lumasaaba Hoseya 13 Bible Online

Hoseya 13 - lumasaaba bible

Hoseya 13

¹Abe buli lweesi shikuuka sha Efurayimu shikanikhila, babaandu be mu bikuuka bibiramile banikina busa, lwekhuuba nisho shaba shikuuka shikhulu naabi mu linaambo lya Isiraeli. Ne babaandu ba Isiraeli ni booneka besaaya bayaali, shaakila bahela.

²Ne aluno beloosela bwilooseli busa khukhwooneka, nga bekholela bifwaani bye feetsa, ni bifwaani byeesi bakhola ni kamakyesi ke babaandu ke angaaki naabi. Lwanyuma balookhela angaaki bari, “Ni muwaaneyo tsisaayilo isi bino, mwiwunamile aasi isi bifwaani bye feetsa.”

³Ni nashiryo, bakhaakoraanewo, bafwaane busa nga lifuumbi lye kumutikhinyi, bafwaane nga liime lye kumutikhinyi nilikooraanawo nga inyaanga yaarurire, bafwaane nga likhuutsi lyeesi imbewo iwuutsa, nga n'ubona lisuusi liliirura khukhwaama mu mwaanya.

⁴Umukasya waaloma ari, “Ise ndi Umukasya Wele weenywe, uwabaraangilila khukhwaama mu shibala she Misiri. Inywe simwaakha khuubakho ni Wele ukuundi ta, akhali ise senyene, ise senyene niye umuwonesi.

⁵Ise nabamanya, nabaloolelela buulayi mu shibala shishaba shishoomu.

⁶Ise nabaliisa inywe, mwekura buulayi, ne ni mwamala khukhwikura, mweyiinga mwantsibilila ise tsana.

⁷Ni nashiryo kane niitse imbebwakale nga italanyi n'ikhola. Kane nibise khu ntsila imbakwiile nga ingwe nayo n'ikhola.

⁸Kane imbebwakale imbatyenuulakemo, ifwaane busa nga shibulukhu sheesi basutilekho bubwaana bwasho. Kane imbatukhuunye ifwaane nga italanyi ikhasi isi intsala iliile, namwe nga isolo iye mwirome ikiindi yoosi.

⁹“Inywe baandu ba Isiraeli, ise samweene intsya khubahesa! Ne ari naanu ukane abayeete?

¹⁰Ari umuyiinga weenywe ali waheena ukane abawonese? Baaraangilisi be mu biriimba byeenywe bali waheena. Bayiinga ni baaraangilisi beesi inywe mwabeene mwakana muri ise imbawe, bali waheena?

¹¹Mu lirima lyase liikali ise nabawa bayiinga. Naluundi mu burafu buukali nababarusakho.

¹²“Bumoyaani bwa Isiraeli bwoosi bwabuusibwile atweela, ni bubwoonaki bweewe bwaaruungikhibwile naabi, nga buliindiilila shitaambiso.

¹³Buutsiina bweetsile khu baandu nga bufwaana nga butsiina bubuutsila umukhasi uutsya khuusaala, ne babaandu bano bafwaana nga umwaana ukhalimwo kamakyesi, ukhakana khuurura ibulafu ta.

¹⁴Ari inywe mukana ise imbawonese inywe khukhwaama mu maani ke makoombe? Ise kane imbawonese inywe khukhwaama mu khufwa? Iwe khuufwa, ari reera biitaambiso byoowo! Ni nawe kamakoombe, reera khuuhela khwoowo! Ise singene imbekho ni shiisa shoosi nakhari ta!

¹⁵Abe iwe Isiraeli waakhaba buulayi khuufuurakho babaandaayo, ne imbewo iyaama ibwaamanyaanga, nga ifuureerera khukhwaama isi Umukasya, ikhenyukhile mu mubiimbi. Imbuka yeenywe iye bunyire ikhekyele shiimiyu, ni tsisebele tseenywe tsoosi tsikhoomelele. Naluundi bakhaakhupakulule birara byeenywe byoosi, bayayaane bye buyiindifu bibiilimwo byoosi.

¹⁶Babaandu ba Samariya bakhetyuukhe buubi bwaabwe babeene, lwekhuuba baaminyaalila Wele waabwe. Bakhaahelele mu busoolo ni lurima, babaana baabwe baakyeekhe bakhaakhupibwe aasi khu mabaale baatikhake, ni bakhasi babaali bisoombo bakhaabaakibwe busa.”