Read lumasaaba Hoseya 14 Bible Online

Hoseya 14 - lumasaaba bible

Hoseya 14

¹Iwe Isiraeli, shuukha ukobole isi Umukasya Wele woowo. Lwekhuuba bibyoonako byoowo byakhuruurire aasi.

²Ni mushuukhe mukobole ni biilomo bino muri, “N'ukhwiyakhile bubwoonaki bweefwe, naluundi mu shisa shoowo ukhwakaanile, nio nafwe khunyale khuukhuruuya iwe ni kiminwa kyeefwe nga ni shaakhila.

³Asiriya s'anyala waakhuwonesa ifwe ta, abe yakhaba tsiŋwaaŋwa tseefwe tse mu busoolo tseene. Ifwe sikhuliilayo luundi isi bifwaani byeesi ifwe fabeene khwakhola, khubilomele khuri, ‘Inywe muli bawele beefwe ta.’ Mwiiwe wenyene nimwo mweesi baafuubi banyoolela shiisa.”

⁴Umukasya aloma luundi ari, “Kane imbawonese khukhwaama mu khuborokha khweenywe, kane imbakane ni kumwoyo kwase kwoosi, lwekhuuba lirima lyase likhaabe lyaweelelewo ilala.

⁵Isi ba Isiraeli, ise ikhaabe busa nga liime liliwosawosa, Ni abweene awo, Isiraeli akhaamulikhemulikhe busa nga shimuli. Akhekhise kimili kyeewe aasi mwiloba afwaane busa nga kimisaala kimi kedali kye mu Lebanoni.

⁶Ni tsisakya tsakhwo tsikhaabalaahe tsibonekhe buulayi, tsifwaane nga tse kuusaala ku olivu, ni khuwunya khube khuulayi nga khwe kimisaala kimi kedali kye mu Lebanoni.

⁷Luundi ndi babaandu baase bakhaakobole bamenye aasi e shishiniini shase. Bakhaabalaahe buulayi bafwaane nga biilime bibulungule, baame bibyaamo biikali nga kimisabibu. Bakhaawunyake buulayi nga iviini iye mu Lebanooni.

⁸“Inywe babaandu ba Isiraeli, shiina ndi sheesi mukana khu bifwaani? Ise senyene niye uwilamwo khuuloomba khweenywe, luundi naabenaanakho naabi. Ise ndi busa nga kuusaala kukuukhawakho kamasaafu kaakwo ta, bibyaamo byeenywe byoosi byaama isi indi.”

⁹Ari khayo abo babaali ni kamakyesi bamanye bibiindu bino. Lekha abo babaali ni khuumanya barekeerese buulayi naabi. Kimikhoosi ky'Omukasya kili kyaŋali luundi kili kimikwalaafu, ni babaandu babaali bakwalaafu bakikyeendelakho. Ne mu mikhoosi kino baboonaki betuya luundi beruura aasi.