Read lumasaaba Hoseya 4 Bible Online

Hoseya 4 - lumasaaba bible

Hoseya 4

¹Nimuwuliilise ilomo y'Omukasya, inywe babaandu ba Isiraeli! Iliwo kimisaango kyeesi Wele ali khuureera isi muli, nga aloma ari, “Mbaawo bubwiyikinwa, mbaawo shiisa, mbaawo khuumanya Wele mu shibala sheenywe ta.

²Mukhola biisuubiso ne mwaamala mwaabifuniaaka, mweera, luundi mwaakhola bye buyeyani. Iliwo bituluungu biikali buli aandu mu shibala, naluundi iliwo khukhwiirana buli aandu.

³Ni lwelomo iyo, shibala shilikho shilila, ni babaandu babaashimenyamwo balikho bawawo. Abe yakhaba ni tsisolo tse mwirome, ni binywiinywi bye mu ngaaki, ni tsinyeeni mu nyaantsa, nabyo bilikho bikoraanawo.”

⁴Ikhabawo umuundu ukhalila uwashe kumusaango ta, namwe wokyeselela ukuundi lulwaala ta. Ne khuutsiinikhana khwase khuli isi inywe basaayi.

⁵Muryo kane mukyeende nga mutaalataala busa mu bwiile bwe kumuusi, ni baŋoosi beenywe kane bataalataale ni nanywe mu bwiile bwe shiilo. Ni nase indyo ikhaahese Isiraeli maayi weenywe.

⁶Babaandu baase balikho bahela lwekhulekha khuuba ni khuumanya ta. Lwekhuuba inywe basaayi mwaayikaana khukhuumanya ise, ni nase kane imbekaane inywe khuuba basaayi baase. Lwekhuuba mwaayibilila kamakaambila ka Wele weenywe, ni nase singene niinaaneyo isi babaana beenywe ta.

⁷Basaayi nga ni beeloosela khuuba baakali, baryo nga ni beeloosela khukhwoonakisa isiindi. Indyo ise ikhaashuusanise shiiriifwa shaabwe shikyele khuuswaala.

⁸Balya bekura lwe bibyoonako bye babaandu baase. Baryo basaayi bano basangaala khuubona nga babaandu boonakisa.

⁹Nga basaayi ni bakhola, ni babaandu nabo nga ni bakhola. Nashiryo ise indi khuutsya khuuwa basaayi ni babaandu beene shiitaambiso, lwe buraambi bwaabwe buubi.

¹⁰Khuulya bakhaalye, ne sibakhekure ta. Khuukhola bye bwamalaaya bakhaakhole, ne sibakhaafunemwo shishiindu shoosi ta. Bino byoosi biba biryo lwekhuuba baatimaana baarura khu Mukasya waabwe,

¹¹baamalila buulamu bwaabwe khu bwamalaaya. Iviini ikhale, ni iviini ishaakha yaamalilamwo ilala babaandu baase khuumanya.

¹²Babaandu baase batsya bereeba isi shifwaani she kuutsikhi. Umuundu waatsya khuufuna khukhwiilibwamwo khukhwaama isi imiimbo yeewe. Kumwoyo kwe khuukhola bwamalaaya kwababorosela ilala, baarama nga sibali babeyikinwa isi Wele waabwe ta.

¹³Batsya bakholela tsisaayilo khu ngaaki khwe tsinjiinji, booshela biwaanwa khu ngoongo. Batsya booshela biwaanwa musina mwe kuusaala oko, ni popula, ni terebinisi, lwekhuuba kiwa bibisiisa biilayi. Ni nashiryo babaana beenywe bakhaana batsya baakhola bwamalaaya, ni bakhaana beenywe baakhwe nabo batsya baakhola bye buyeyani.

¹⁴Nga bakhaana beenywe baatsiile baakholile bye bwamalaaya, singene imbawekho shiitaambiso ta, namwe baakhaana beenywe baakhwe, nga baatsiile mu bye buyeyani, lwekhuuba basaani babeene nibo babaatsya bakholakana ni bamalaaya beene, bawaanayo tsisaayilo ni bamalaaya babaakhola khu byeeso. Babaandu babaali baasilu, babaakhalikho ni khuumanya ta, nibo babaatsya khuuhela.

¹⁵Inywe babaandu ba Isiraeli, abe mwakhatsya mwakhola bye bwamalaaya, mukhakila babaandu ba Yuda baabakho ni kumusaango ta. Mukhatsyakho khukhwisaayila i Gilugaali, namwe i Besi-Aveni ta. Mukhatsya mwetsubilakho luundi mu lisiina lyase, nga nilyo lisiina ly'Omukasya Umulamu ta.

¹⁶Babaandu ba Isiraeli bali ni shiikili, bali busa nga ikhaafu ikhawulila ta. Ni nashiryo ise Umukasya, sinyala nabaayisa inywe nga uwaayisa kamasheese mu maayilo ta.

¹⁷Babaandu ba Isiraeli baayilibwa naabi bifwaani, ni mubalekhe babe bonyene.

¹⁸Batsya baanywa baamala khuumeela, lwanyuma baatsya beeloosela ni khuukona ni bamalaaya. Baaraangilisi baabwe bawulila buulayi nga baswaalile, khufuurisa khuuba ni shiriifwa.

¹⁹Iryo ikhuungu iye kamaani ikhaabeeye bakoraanewo, ni biiwaanwa byaabwe isi biifwaani bikhaabareerere khuuswaala khuukali.