Read lumasaaba Hoseya 5 Bible Online

Hoseya 5 - lumasaaba bible

Hoseya 5

¹Ari ni murekeerese shino, inywe basaayi. Ni muwuliilise buulayi inywe baaraangilisi ba Isiraeli. Ni murekeerese buulayi inywe be muungo mw'omuyiinga. Inywe muliyo ni kumusaango khaale, lwekhuuba mwaamala khaale khuureka babaandu kumureko, nga mubayila khukhwisaaya bifwaani i Mizipa ni Tabori.

²Inywe mwayaba liilowo lileeyi lilyeene muri nio mubasalilemo. Ne ise samweene intsya khubawa inywe shiitaambiso lweebyo byeesi mwakhola.

³Ise samweene naakhumanya iwe nga n'ufwaana, O Efurayimu. Iwe Isiraeli s'unyala waantsibisakho khuusiise na khafwiiti khari ta. Iwe wandekha ise waatsya waakhola bye bwamalaaya; Isiraeli waayinyaalutaka.

⁴Buuraambi bwaabwe sibubanyalisa khuukobola isi Wele waabwe ta. Kumwoyo kwe bwamalaaya kwaayitsula mu buulamu bwaabwe, nashiryo sibanyala khuumanya Umukasya ta.

⁵Buunywaanywa bwe babaandu ba Isiraeli bwaayirurukhilila mu moni mwaabwe. Isiraeli ni Efurayimu bakhaateengaale bakwe aasi lwe busiro bwe buubi bwaabwe. Yuda naye musaambo niyo ndweela akhaakwiile atweela ni nabo.

⁶Baryo nio lwanyuma beetse nga bali ni kamasheese kaabwe atweela ni tsikhaafu tsaabwe, nga baweentsa khuuwaanayo tsisaayilo isi Umukasya, ne shonyene ndi sibakhaamunyoole ta, lwekhuuba naye waabawuuyakho waatsya.

⁷Nibo babeene baayibirisaka buubi naabi isi Umukasya, baryo basaalaka ni babaana babaakhali babeewe ta. Nashiryo ari ni bakhaabe nga bali khu mayiiya kaabwe ke Kumweesi Kumushaakha, nibo babeene ni biilimwa byaabwe atweela bakhaahele.

⁸Ari fuura ikhoombi iwulilikhe mu Gibeya! Fuura ifurumbeti ikuukuulile mu Rama! Yinyusa luwuungu lwe buusoolo mu Besi-Aveni! Ari raangila mutsye mu busoolo, inywe ba Benyamini!

⁹Khu shifukhu shishiili khukhwiitsa she shitaambiso, Isiraeli akhekyele busa nga likubili. Shino indi khuushikuukuula lubuula ndi shikhaabewo.

¹⁰Baaraangilisi ba Yuda bekyelile busa nga baanuuli babaasyeenda kamabaale ke khu ntsakha. Ni nashiryo kane imbatsukhiilile lirima lyase ifwaane nga utsukhiilila kameetsi.

¹¹Babaandu ba Isiraeli balikho bamiinilisibwa, naluundi bawaambikhiile akari mu musaango, lwekhuuba bewaanilayo ilala khuutsya khukhwisaaya bifwaani.

¹²Nashiryo, ise Umukasya, kane ba Isiraeli bahelele ilala, nga n'ubona kimisilili ni kyoonakisa tsingubo. Ni babaandu ba Yuda kane imbakhole bafwaane busa nga kuusaala kukuubolile.

¹³Ne Isiraeli n'abona butsiina bweewe buukali, ni Yuda naye nga waaboone kamakoontsyo keewe, Isiraeli aatimaka waatsya mu Asiriya khuuloomba buuyeeti khukhwaama isi umuyiinga waabwe uwe kamaani. Ne umuyiinga uyo singene anyale khuubawonesa, namwe khuukaanga kamakoontsyo kaabwe ako ta.

¹⁴Lwekhuuba ise samweene ikhaafwaane busa nga italanyi isi ba Isiraeli, ikhaafwaane nga italanyi ishiili inyana isi babaandu ba Yuda. Ise ikhaatsye imbatyenuulakemo bipatu busa, imbalekhe awo intsye! Ise ikhaabakhweese imbayile, ilekhe khuubawo n'umuundu na mutweela unyala waabawonesa ta.

¹⁵Lwanyuma ishuukhe ingobole mu shifwo shase, khukhwoolisa nga ni bakhaafukiilise buubi bwaabwe, bakobole isiindi nga bameentsa. Nga buukosi bwaboolilekho, bakheetse nga bekoontselela, nga bameentsa isiindi.