Read lumasaaba Hoseya 6 Bible Online

Hoseya 6 - lumasaaba bible

Hoseya 6

¹Babaandu baloma bari “Ni mwiitse, lekha khwiileyo isi Umukasya. Niye uwakhutyeenuulakamwo biipatu, ari niye umweene uutsya khukhuwonesa. Niye uwakhutsiinisa ifwe, ari niye umweene uutsya khukhukaanga kamakoontsyo keefwe.

²Mu mbuka iye bifukhu bibili namwe bitaru, atsya khukhuwonesa ifwe, akhwisemo luundi kamaani, nio khunyale khuumenya mu moni tseewe luundi.

³Khakhukhakekho naabi khumanye Umukasya. Khayo khwimiinilise naabi khuumumanya. Lwekhuuba khukhwiitsa khweewe khwaamanyikhana khaale, nga n'ubona khuurura khwe nyaanga kumutikhinyi ni khwamanyikhana; kane eetse akhuwosawose nga n'ubona khaafula ni khamunyakala khaawosawosa liloba mu biseela bye shimiyu.”

⁴Umukasya ereeba ari, “Ukana ise ikhukholele shiina, iwe Isiraeli? Ni nawe Yuda, ari ukana ikhukholele shiina? Lwekhuuba Khuukana khweenywe khuli busa nga namufweeli uwe kumutikhinyi utaamuukha busa waakorawo, naluundi khuli busa nga liime liliiwawo khaangu busa.

⁵Nashiryo isho nisho shishakila naabarumanila baŋoosi khuubawa biilomo byase bibiibakhalaka, ni kumusaango kwase kutsasa isi muli nga luuheni.

⁶Ise ingana ndi khali mwokesanisile khuukana, ne akhuba khuuwaanayo tsisaayilo ta. Ingana ndi inywe muumanye ise Wele, khuufuurisakho biwaanwa bibyooshe.

⁷Ne inywe lwe khukhwinjila mu shibala sha Adamu, mwaafwaana nga niye, mwaafuniaaka indakaano yase ibweene iyo, mwaalekha khuba babeyikinwa isiindi ta.

⁸Gileyadi shili shiriimba shisheetsulamwo babaandu baboonaki, beesi kamafuki kalondoola.

⁹Inywe basaayi muli busa nga lituuli lye banuuli ni beebisa nga bakana khuunuula. Mutsya mwebuula khu ntsila yiitsya i Shekemu, mwaakhoonya babaandu babaabirirakho, naluundi mwaakhola buli saambo iye bibyoonako yoosi.

¹⁰Ilala naaboone shishiindu she mbikho mu baandu ba Isiraeli; ni mu Efurayimu, babaandu benyaalutile nga bakhola bye bwamalaaya ni bawele babaandi.

¹¹“Ni nawe Yuda, likyesa lye kumusaango lyaakhuliindiiliile, abe yakhaba nga nakana ishuukhe imbakobosele biseela bye khuuyiindila luundi.