Read lumasaaba Hoseya 7 Bible Online

Hoseya 7 - lumasaaba bible

Hoseya 7

¹“Nga buli lweesi inganila khuuwonesela babaandu baase ba Isiraeli, bubwoonaki bwa Efurayimu bwirurukhilila busa. Ni buraambi buubi bwa Samariya bwiyokesanisa busa. Lwekhuuba boosi bakhola bye bubeeyi, luundi bali babeefwi babaafuniaaka tsiintsu, ni baanuuli nabo banuula bibiili ibulafu.

²Ne sibashimanyakho bari ise ishebulila buraambi bwaabwe buubi ubwo ta. Ari bubwoonaki bwaabwe bwaabeboweleele, bwerurukhiliile busa mu moni tsase.”

³Umukasya aloma ari, “Babaandu bawombesa umuyiinga nga bakhola tsimbomelo tsonyene, ni baakhulu be mu lubili lw'omuyiinga basangaala nga baaboone bye bubeeyi byaabwe.

⁴Boosi bali bayeyani, buli mbuka batindiima ni kumulyuulyu, bafwaana busa nga isikiri ilikho kamaanda ke kumulilo kukwiseŋeeŋile, nga uyo uuli khuutsya khuteekhelakho ali khuukaanda buufu.

⁵Khu shifukhu she kamayiiya k'omuyiinga, baakhulu be mu lubili lweewe ni naye umweene, baanywa iviini baameela, n'umuyiinga umweene waatsanuusa kumukhono kweewe wabaaba abo babaamutyaabila.

⁶Kimyoyo kyaabwe kitindiima ni lirima busa nga isikiri ilikho kamaanda ke kumulilo kukwiseŋeeŋile. Lirima lyaabwe likona lituukha busa shiilo shoosi, uri busha kumutikhinyi lyaaburukha lyaatindiima nga kumulilo kukwilyebula.

⁷Boosi baliliba busa ni bukhafu, bafwaana nga isikiri iilikho kumulilo kukwiseŋeeŋile, boosha baawuli baabwe baabamalawo. Bakhoonyaka bayiinga baabwe, mutweela khu mutweela, ne mbaawo na mutweela khu nibo uwilootsa isiindi lwe buyeeti ta.”

⁸Babaandu ba Isiraeli betubaasaka ni babaandu banaambo, bafwaana busa nga ikeeki ye kumukaati isi barusakho nga ishiili imbisi.

⁹Banaambo babanuunamwo kamaani kaabwe baakamalamwo, ne nibo bafwaana busa nga babaakhashimanyilekho ta. Litsuune lyaabwe lyamelamwo tsiifwi, ne baalekha khuushimanyakho bari bahangaale ta.

¹⁰Babonekha ni khukhwiyiingayiinga khwoonyene, ate nga sibakana khuukobola isi Umukasya Wele waabwe, namwe baakhakakho khumuweentsa akari mu biwaangafu byaabwe ta.

¹¹Babaandu ba Isiraeli bawombesebwa khaangu naabi, luundi sibalimwo kamakyesi nga liwuusi, batima baatsya i Misiri nga babalaanga, lwanyuma baashuukha baatsya i Asiriya nga baweentsa buyeeti.

¹²Ne nga ni batsya nga bapamburukha, kane imbamwaatekho khatiimba khaase, imbakhweese imbekhise aasi nga uwaambisa binywiinywi bye mu ngaaki. Kane imbawe shitaambiso lwe bubwoonaki bweesi bakhola.

¹³Nga kumutaambo kumukali kwaabaliindiilile abo boosi babaandataya ise! Khuuhela khuukali isi bali, lwekhuuba baayimiinyaalila ise! Ise nakana naabi khuubawonesa, ne shonyene ndi bakanikha bye bubeeyi khusiise tsana.

¹⁴Nibo sibaantsilootsela ise ni kumwoyo kwa ŋali ta. Ne shonyene ndi bakona busa khu bulili bwaabwe, baalilila ukhwo. Bekhalaka ni kimibano babeene, nga bambaasa bari kane bafune biilyo bibuluungule ni viini; baashuukha baandataya ise.

¹⁵Ise samweene niye uwabaleekela luundi nesamwo kamaani mu makhono kaabwe, ne ari bona beekuta khuukhola buubi khusiise tsana.

¹⁶Nibo sibashuukha baalola isi uyo uuli angaaki luukali ta. Bali busa nga buyiingo bubweborokha. Baaraangilisi baabwe bakheeribwe ni lurima lwe baasiku baabwe, lwe biilomo birafu byeesi baanomela ise. Lwashino babaandu ba Misiri bakhaabatyaabile.