Read lumasaaba Hoseya 8 Bible Online

Hoseya 8 - lumasaaba bible

Hoseya 8

¹Fuura ikhoombi iye khuureewula. Ari bona umusiku alikho ewuta nga kunywiinywi waasu khu baandu b'Omukasya. Lwekhuuba babaandu bano baafuniaaka indakaano isi aakhola ni nabo, baayikaana khuuloondelela kamakaambila keewe.

²Ari Isiraeli akuukuulila angaaki ari, “O Wele weefwe, ifwe khwaakhumanya iwe!”

³Babaandu ba Isiraeli baayikaana isho shiili shiilayi. Ari baasiku baabwe batsya khuubatimisa.

⁴Nibo baayiroborera bayiinga nga siibamboolelakho ise ta, beroborera baaraangilisi nga ise siimanyakho ta. Baaraambisa izaabu ni feetsa yaabwe, bekholelamwo bifwaani, bibyabarereera khuukwa.

⁵Iwe Samariya, ise nekaanile shifwaani she moosi shino sheesi iwe wakholile. Lirima lyase lilikho litindiima khulwoowo. Iwe ukheloosele uryo khukhwoolesa liina, nga s'unyalisa khukhwipyeeluusa ta?

⁶Imoosi yino isi iwe wisaaya, O Isiraeli, yakholebwa n'umuundu khukhwaama mu Isiraeli muno; niyo shiilikho Wele na khakyeekhe ta. Shifwaani she moosi she mu Samariya shino bakhaashikhupake shiikyele bipatu busa.

⁷Ni muba nga mwamiitsa imbewo, mulikyesa ikhuungu mu shifwo she ŋaano. Tsisaambu tse ŋaano tsirama nga tsaayiimikha khu ngaaki, ne nga mbaakho iŋaano ta. Ne abe iŋaano nyene yaakhabakho, banaambo bakheetse bakilye yoosi.

⁸Linaambo lya Isiraeli baalimalilawo ilala. Babaandu baalyo baatsya bamenya akari mu manaambo bafwaana nga inyuungu isi baatuuma ibuumbi.

⁹Bafwaana busa nga isikilya iye mwirome ikyeendaana yonyene busa, baatsya boola i Asiriya. Babaandu ba Isiraeli baayikulisa babeene isi bakanwa baakali.

¹⁰Ne abe yakhaba nga baayikulisa babeene isi babaandu be kamanaambo baryo, ari indi khuutsya khuubabuusanisa atweela. Lwanyuma babonabone naabi nga bali mu bunyala bw'omuyiinga uwe kamaani ni bwe baakhulu be mu lubili lweewe.

¹¹“Abe yakhaba nga ba Isiraeli bombekha bibyeeso biikali khweesi baawaanilakho tsisaayilo lwe bibyoonako, ne bibyeeso bino byaayikyela bye khuukholelakho bibyoonako.

¹²Ise nabaronela kamakaambila kaase kakaakhali matweela ta, ne beebirisa busa nga kamakaambila ako kakaakhabawaambakho.

¹³Babaandu ba Isiraeli bakana naabi khuuwaanayo tsisaayilo tsindayi naabi; bawaanayo tsinyama nga tsisaayilo, babeene baalyakho nakhulyakho. Ne isi Umukasya, tsisaayilo tsino sitsilikho ni sheesi tsimanyisa ta. Ni nashiryo kane Umukasya ashebulile bibyoonako bino byoosi, lwanyuma abawe shitaambiso, abasiindikhe bakoboleyo i Misiri.

¹⁴Lwekhuuba ba Isiraeli baayibilila umubuumbi waabwe, beyombekhela tsimbili tse kamaani, ni mu Yuda baayombekha biriimba bibiilikho kamatikiiyi. Nashiryo, kane isiindikhe kumulilo khu biriimba byaabwe ibyo, kwooshe kamatikiiyi kaabwe ako.”