Read lumasaaba Hoseya 9 Bible Online

Hoseya 9 - lumasaaba bible

Hoseya 9

¹Inywe baandu ba Isiraeli, mukhekhoyakho na khafwiiti nga kamanaambo kakaandi ni kakhola ta. Lwekhuuba inywe mwaakhuba babaandu babeyikinwa isi Wele weenywe ta. Mwaakhalawo mwaatsya mwekulisa nga bamalaaya ni bakhola, mwaatsya mwesaaya bawele babaandi, buli aandu oosi isi bawuulila iŋaano.

²Iŋaano isi mutsya khukyesa ni viini isi musuura, sibikhaabamale ta. Sikhaabewo nakhari kimisabibu kye khuusuuramwo iviini inyana ta.

³Inywe simukhaaramekho mu shibala sh'Omukasya shino ta. Baalala khusiinywe bakheeleyo i Misiri, babaandi batsye mu shibala sha Asiriya, ibweeneyo balye biilyo binyaalu.

⁴Simukhawaaneyo luundi biwaanwa bye viini isi Umukasya ta. Mbaawo na ndweela khu saayilo itso ikhaamwikhoyese ta. Tsoosi tsikhaabe tsinyaalu busa, tsifwaane nga biilyo bibiwaanibwayo isi baafu. Babaandu boosi babawaanayo tsitsaayilo itso bakhaabe banyaalu. Babeene babaawaanayo biilyo bino banyala baabiliila, ne sibanyala baabiwaanayo muntsu y'Omukasya ta.

⁵Ari shiina shisheene sheesi mulikholela khu shifukhu shishareebwawo lwe kamayiiya? Shiina sheesi mukhaakhole khukhwoolelesa shiifukhu she kamayiiya k'Omukasya?

⁶Abe mwakhalititukha nga mushiili baalamu, mulinyoola nga muli i Misiri, babasiikhe i Menfisi. Bye buyiindifu byeenywe bye feetsa bikhaakoraanile mu bunyaasi, ni kamawa kakhaatsowe mu weema tseenywe.

⁷Imbuka iye shitaambiso sha Isiraeli yoolile. Shifukhu she khuubakobolamwo nisho shino. Inywe mutsya khufuna isho shishibaakhila mwabeene, ate mutsya khushimanya. Lwekhuuba bibyoonako byeenywe bili biikali naabi, naluundi bubiiyile bweenywe buli buukali naabi, muyila baŋoosi khuuba baasilu, n'umurume wa Wele khuuba umutiimi namwe umupeme we kumurwe.

⁸Ise umuŋoosi niye umuliindi wa Isiraeli khulwa Wele wase, ate nga batsya baandekela kimireko buli aandu oosi isi intsya. Intsya nga naakaanana bubiiyile abe yakhaba ni mu Lisaayilo Likhulu lya Wele.

⁹Bibiindu byeesi babaandu bakhola byaabayila nibo mu bwoonaki buukali naabi, nga ni byaba mu bifukhu bye Gibeya khaalekho. Ne Wele singene ebilile ta. Ilala kane abawe shitaambiso lwe bibyoonako byaabwe byeene.

¹⁰Umukasya aloma ari, “Khu mbuka isi naangalilakho Isiraeli, nabangala bafwaana busa nga kimisabibu kikiili mu mubiimbi. Khu mbuka isi nanyoolelakho baakuuka beenywe, nafwaana nga uboone kimifigi kimirobe kikiinyoowa mu biseela byakyo. Lwanyuma mwaashuukhakho, mwaandurakho mwaatsya i Bayaali Peyoli, mwaatsya mwewaanayo isi shifwaani she khuuswaala isho. Nanywe muryo mwabeene mwaswaala mwafwaana busa nga wele mweene isi mwatsya mwesaaya.

¹¹Shiriifwa sha Isiraeli shitsya khupamburukha shimururekho shifwaane nga khaanywiinywi, bakyelama beenywe sibakhasaalekho babaana ta, namwe sibakhaabekho bisoombo ta, namwe sikhaabewo khuhesa umwaana ta!

¹²Namwe abe baakhalisaala babaana baabatsowesa, intsya khubawaambisa kumutaambo, nga imbarusakho mutweela tweela khu baana beene. Nashiryo shikhaabe shifukhu she ngunyi naabi nga neetsile khubaantsukha.

¹³Ise samweene naalolelela babaandu ba Isiraeli, baamiliya baafwaana busa nga Tuulo, shishiili mu shifwo shishikhoyesa. Ne ari bona muyila babaana beenywe ibulafu isi babaakhoonyela.”

¹⁴O Umukasya, ikhuloomba ndi ubawekho shishiindu. Ne ari kane ubawe shiina? Ikhuloomba ndi uwe bakhasi biisoombo bibikhanyala khuuhesa babaana ta, ni kamabeele kakaakhanyala khuunuunisa ta.

¹⁵Umukasya aloma luundi ari, “Bubwoonaki bwa Isiraeli bwarakikhila i Gilugaali, ibweene iyo nase narakikha khuubabiyila. Nashiryo ari intsya khubatimisa imbawoone khuurura muntsu yase. Siindi khuutsya khubakanakho luundi ta; lwekhuuba baaraangilisi beenywe bandiilemwo ise luwomelo.

¹⁶Babaandu ba Isiraeli baafunile buulwaale, ni kimilaandila kyaabwe kyaniaalile, shishikila balekha khurakho kamatuunda koosi ta. Ne abe baakhasaala babaana, kane ikhoonyake babaana baabwe bakanwa abo.”

¹⁷Wele wase kane ekaane babaandu ba Isiraeli, lwekhuuba bakhuwuliilisa byeesi niye abalomela ta. Nashiryo kane bekyele bakyendaani akari mu manaambo.