Read lumasaaba Yoweeli 1 Bible Online

Yoweeli 1 - lumasaaba bible

Yoweeli 1

¹Buno nibwo buurume bw'Omukasya bubweetsila Yoweeli, umusooleli wa Pesuweli.

²Ni mureekerese inywe babaandu baakhulu mweesi. Muwuliilise buulayi inywe babaandu babaamenya mu shibala. Nga ni muwaangaale mu miiko kyeenywe kyoositsana, abe mwabonatsakakho shishiindu shishifwaanakho shiri nga shikholikha?

³Ni mushiboolelekho babaana beenywe, ni babaana beenywe nabo bashiboolelekho babaana baabwe. Ni naabo beetse bashiboolelekho babaana be kumuboolo kukuundi.

⁴Tsisike tsakwa mu bukali, nga tsindala tsaamalile khuukhala, tsitsiindi tseetsa tsaamaliilisa bibyarama! Nga itso tsaamalile tsiryo, tsitsiindi natso tseetsa tsaalumaka bibyarama, ni tsitsiindi tseetsa tsaamaliila!

⁵Ari ni mwinyukhe mwantsuwe, inywe bameesi mweesi! Ni mukhupe luwuungu, inywe mweesi babaanywa iviini, ni mwantsuwe lwekhuuba kimisabibu kyeesi bakhamulamwo iviini indokote kyoosi kyaaweelewo.

⁶Liiye lye linaambo lye kamaani lyebwakalile shibala shase, liiye lye kamaani naabi lilikhanyala lyaabalikha ta. Kameeno kaalyo kali busa nga ke talanyi iseetsa, naluundi kali busa nga n'ubona kameeno ke talanyi ikhasi.

⁷Liiye ilyo lyaheseele ilala kimikuunda kyase kye kimisabibu, naluundi lyoonakisile kimisaala kyase kimifigi. Lyaaliile ni kamakhobolyo koosi ke khu misaala, khukhwoolesa ni tsisakya tsakhwo tsaarama tsaakhosele busa.

⁸Ari ni mwantsuwe mufwaane busa nga umweeha, uwibowele isawu iya makoongwe, uuli khuusola lwe khuufwa khw'omuseetsa weewe.

⁹Biwaanwa bye biilime bibuluungule, ni biwaanwa bye viini, ari byayakama khuuwaanibwayo mu Lisaayilo Likhulu ly'Omukasya. Nashiryo ari basaayi bali mu khwantsuwa khwonyene. Babaakaanisi b'Omukasya balikho basola busa.

¹⁰Kimikuunda kyoosi kyaahelile, liiswa lyataŋalaale busa. Biilime bibuluungule byoosi byaaweelewo, kimisabibu kyoosi kyaaniaalile, ni kimisaala kimi olivu kyoosi nakyo kyaahelile.

¹¹Nimwiwunamile busa, inywe baalimi mweesi! Ni musole, inywe babaalima kimisabibu! Ni mwantsuwe naabi, lwekhuuba iŋaano ni kamaheemba, nga nibyo bilimwa bye mu mikuunda, byoosi byaahelile.

¹²Kimisabibu kyoosi kyoomile, ni kimisaala kimifigi kyoosi kyaaniaalile. Kamatuunda ka pomeguraneti, ni kamasheendu, atweela ni kamatuunda kakaandi kakaaliibwa, byoosi byoomile. Nashiryo kumwikhoyo kwe babaandu nakwo kwaweeleelewo ilala.

¹³Ari inywe basaayi mweesi, ni mwibowe tsisawu tsa makoongwe, murakikhe khukhwantsuwa! Ni musole luukali lweene, inywe mweesi babaakaanisa khu sheeso! Ari inywe babaakaanisi ba Wele wase, ni mwiitse, mubuye shiilo shoosi nga muli mu sawu tsa makoongwe. Lwekhuuba mbaawo imuunga na ndweela iye bilime bibuluungule, namwe akhaba iviini yoosi isi babaandu banyala bawaanayo mu Lisaayilo lya Wele Likhulu ta.

¹⁴Ari ni mukuukuule imbuka iye khuubuya ntsala, ni mukuukuule babaandu boosi beetse mu lubuusano lukhosefu. Ni mubuusanise baaraangilisi atweela ni babaandu boosi be mu shibala shino, beetse mu Lisaayilo Likhulu lya Wele Umukasya weenywe. Lwanyuma mumulilile niye nga muli mubweene umwo.

¹⁵Shifukhu sh'Omukasya shili aambi! Shifukhu isho khweesi khuhela khulyaamila isi umweene Umunyali wa byoosi. Shifukhu isho nga shiliba shihangafu naabi!

¹⁶Biilyo byaakhuweelekho nga khubona ni tsimoni tseefwe khuri. Ari sishiiliyo iserukho iye kumwikhoyo mu ntsu ya Wele weefwe luundi ta.

¹⁷Bumiitso buhelela mu liloba lilyoomu, ni bilime bye biilyo bibulunguule byoosi byaafwa. Ari bibyoombekhe bye khuubuungamwo biilyo bili busa, ni birara byayoomelawo busa.

¹⁸Ari biisolo byoosi bilikho byaniaaka busa lwe ntsala ingali! Tsikhaafu natso tsitalima busa lwekhuuba mbaawo isi tsinyoola bunyaasi ta. Ni bibyaayo bibiramile nga kamakheese nabyo bilikho bibonabona.

¹⁹Ise ndi khukhwilootsela iwe, O Umukasya! Lwekhuuba kumulilo kwookhile bunyaasi bwe mwirome bwoosi, ni kumulilo kukuutindiima kwookhile ni kimisaala kyoosi kyaweelewo.

²⁰Bona ni tsisolo tse mwirome tsoosi natso tsilikho tsikhwilootsela iwe, lwekhuuba tsintsitsi tse kameetsi tsoosi tsomeleele, ni kumulilo kwookheele ilala bunyaasi bwe mwirome bwoosi.