Read lumasaaba Yoweeli 2 Bible Online

Yoweeli 2 - lumasaaba bible

Yoweeli 2

¹Fuura ikhoombi, fuura ikhoombi iwulilikhe mu Sayuuni, lukiingi lwa Wele lukhosefu. Lekha buli mutweela yeesi anikine lwe khuurya, lwekhuuba shifukhu sh'Omukasya shakhwoolilekho.

²Nisho shili shifukhu she shishiilima busa ni kumutaambo kumukali. Shifukhu she kamafuumbi kamamali, ni shishilima namukoto. Nio lwanyuma khaangukho, nga n'ubona antsye akhwentsuukha nga busha kumutikhinyi khu njiinji, liiye lye kamaani naluundi lirafu liwulukhe. Mbaawo shishiindu abe shishafwaanakho shiryo, namwe shishiilibawo khuufwaanakho shiryo ta.

³Kumulilo kwoosha biilime iburaangisi waabwe, naluundi kwaatindiima nga kwaabaloondelekho. Iburaangisi waabwe iliyo shiibala shishibonekha buulayi nga Kumukuunda kwa Edeni. Ne inyuma waabwe mbaayo shishiindu shoosi shishiramayo ta, khuurusakho kumubiimbi kwonyene. Mbaawo shishiindu na shitweela shishinyala shaatitukha ta.

⁴Babonekha nga tsiŋwaaŋwa; beetsa basuna busa nga tsiŋwaaŋwa tse busoolo.

⁵Babone beetsa basuna busa khu ngaaki khwe tsinjiinji. Nga waabarekeeresile, balyebukha busa nga kumulilo ni kwoosha bunyaasi bubwoomu, bali busa nga liiye lye kamaani liliikhuumba khuutsya mu busoolo.

⁶Ni baba nga beetsa, babaandu be kamanaambo boosi belulukha busa, buli muundu waashuukhakho mu moni mweewe.

⁷Beetsa bebwakala busa nga n'ubona basoolani; baaniinaka khu matikiiyi ke shiriimba nga baselikhale. Boosi bakhuumbila atweela busa nga batsya iburaangisi nga mbaawo uwiborosamwo ta.

⁸Boosi bakhuumba baatsya iburaangisi nga mbaawo uborosamwo waatsya mu luruungo lw'owasheewe ta. Baafuniaakaka tsimako tsitsikhiinga nga mbaawo ukoraanisamwo ta.

⁹Boosi bebwakala shiriimba, baatimaka khukhwibotokhelela kamatikiiyi kaasho. Lwanyuma batsya benjilaka mu tsintsu, baaniinakila mu madirisa nga babeefwi ni bakhola.

¹⁰Nga ni beloosela khuutsya iburaangisi, shibala shoosi ni likulu binikina busa. Inyaanga ni kumweesi byaakama khuuwa buwaanga bwabyo, ni tsinienieesi natso tsakama khukhwaburukha.

¹¹Umukasya arusa likaambila lyeewe isi liiye lyeewe ni khukuula khuukali. Liiye lyeewe lili lye kamaani naabi silibalikha ta. Ni naabo babaawuliilisa shiilakilo sheewe bali be kamaani naabi. Shifukhu sh'Omukasya shili she shiriisa shiikali! Naanu niye unyala waashikhaliilikha?

¹²Isho nisho shishakila Umukasya waaloma ari, Yakhaba ari, nimushuukhe mukobole isiindi ni kimyoyo kyeenywe kyoosi, nga mubuya intsala, ni khukhwaantsuwa ni kumutaambo.

¹³Ari lekha kimyoyo kyeenywe kikifunikhile kyokesanise kumutaambo, ne akhuba khukhwonuulakho bikwaaro byeenywe ta. Ni mushuukhe mukobole isi Umukasya Wele weenywe, lwekhuuba niye ali uwe shiisa ni bubweela buukali; niye ali umwikhalilikhi s'akhalalaka khaangu ta, naluundi ali ni khuukana khuukali. Naluundi niye ali mwirekefu khukhwiyakhila bibyoonako, ne akhuba khuuwa shitaambiso ta.

¹⁴Naanu umanya? Winyoola Umukasya Wele anyala waashuusakho bibyambaaso byeewe, waabawa inywe tsikhabi tsingali. Nio nanywe munyalise khuuwaanayo biwaanwa bye bilime bibuluungule ni biwaanwa bye viini isi Umukasya Wele weenywe.

¹⁵Fuura ifurumbeti khu lukiingi Sayuuni! Ni mulaangilile khuubuya intsala khuukhosefu, mulaange babaandu atweela mu lubuusano lukhosefu.

¹⁶Buusanisa babaandu boosi atweela; uŋoonaŋoone lubuusano lukhosefu; reera atweela baasakhalu boosi, ubuusanise ni babaana atweela, urekho ni bafwiiti babaanuuna. Kuukuula umuseetsa n'umweeha weewe, barure khukhwaama mu biseenge byaabwe.

¹⁷Lekha basaayi, babaakaanisa Umukasya, baantsuwe nga bali akari e lulwaanyi lwe Lisaayilo Likhulu. Lwanyuma belootse nga baloma bari: “N'usaasile babaandu boowo, O Umukasya. Ukhafukiilisa babaandu be kamanaambo kakaandi baakhulekelesa ifwe nga baaloma bari, ‘Ne Wele waabwe ali waheena ta?’ ”

¹⁸Nio lwanyuma libuba liwaambe Umukasya lwe shibala sheewe, aryo asaasile babaandu beewe.

¹⁹Aryo nio Umukasya elemwo ari, “Ari bona ise ndi khuubarumanisila biilime bibuluungule ni viini atweela ni kamafura ke kuusaala ku olivu, bibiibamala nio mwikure buulayi. Inywe singene mwiileyo luundi khuuba she khuutsekhelela busa ni babaandu be kamanaambo kakaandi ta.

²⁰Ikhaatimise liiye lilyarura khukhwaama lubeka lwe ngaaki nga nitso tsiisike. Ikhaatsitimise tsitsye mu shibala shishoomu she kumubiimbi. Ne liiye lyatso lilikhaabe iburaangisi walyo likhaaweele mu nyaantsa Dedi Si, ni neelyo lilikhaabe inyuma walyo liweele mu nyaantsa Meditereniani. Itso tsitsikhaafwe tsikhaabole tsiwunye bubolo khu shibala isho shoosi. Tsikhaafune shitaambiso shino lweebyo byoosi byeesi tsyabakhola khusiinywe.

²¹Nashiryo iwe Liiswa, ukharya ta; ne niwikhoye, usangaale, lwekhuuba Umukasya waakholile bibiindu bikhulu naabi.

²²Ni nanywe tsisolo tse mwirome, mukharya ta, lwekhuuba ari bunyaasi bulikho butsowa. Ni kimisaala nakyo ari kilikho kirakho kamatuunda; kimisaala kimifigi ni kimizabibu nakyo kyaarobile.

²³Inywe babaandu be mu Sayuuni mweesi, ni mwikhoye, ni musangaale lweesho sheesi Umukasya Wele weenywe abakholeele inywe. Waabaweele ifula ibamala nga okesanisa bubwiyikinwa bweewe. Ni ifula ikiindi iloondelelakho nayo itsya khukhwiitsa, ni kiindi nayo iyilakho khuutsowesa bilime.

²⁴Biifwo byeesi muwuulilamwo biilime byeenywe, bitsya khukhwitsulamwo biilyo bibulungule, ni biifwo byeesi musuuriramwo iviini bitsya khukhwiitsulamwo iviini ni kamafura ke kuusaala ku olivu.”

²⁵Umukasya alooselakho ari, “Ari intsya khubakoboselawo ibyo byoosi byeesi tsiisike tsalya tsyoonakisa, tsiisike tsitsituumatuuma, tsitsihesa, luundi tsitsikhalaka tsyoonakisa, tseesi ise nasiindikha isi muli.

²⁶Khu mbuka iyo indi luundi mutsya khufuna biilyo bibibamala, mulye mwikure. Muryo muruuye Umukasya Wele weenywe, ubakholeele inywe bibiindu bibiyaangisa. Babaandu baase sibalilayo luundi khuubona kumutaambo kukufwaana kuri ta.

²⁷Nio inywe babaandu ba Isiraeli mukhaashimanye muri ise imba akari mu baandu baase, naluundi mushimanye muri ise ndi Umukasya Wele weenywe, mbaawo ukuundi ta. Babaandu baase sibaliilayo khuufuna kumutaambo kukuufwaana kuri luundi ta.

²⁸Lwanyuma nga naamalile khuukhola bibiindu bino byoosi, ikhaatsukhiilile Umwoyo wase khu baandu boosi. Babaana beenywe besiinde ni bekhaana bakhaakanikhe biilomo bye buŋoosi. Babaandu beenywe baasakhulu bakhaaroore kamarooro, ni bahele beenywe bakhaafune khuubonekhelwa.

²⁹Mu bifukhu ibyo, ikhaatsukhiilile Umwoyo wase khu bakaanisi baase, boosi atweela basaani ni bakhasi beene.

³⁰Ikhokesanise bibiyaangisa mwikulu ni khu shibala khweene; ikhaabewo kamafuki ni kumulilo, atweela ni khukhwituukha khwe lisuusi.

³¹Inyaanga ikheeleyo imaliye tii, ni kumweesi nakwo kushuukhe kubeseme kufwaane nga kamafuki, nga shifukhu she kamaani, she kumutaambo sh'Omukasya isho nga shishiili khukhwoola ta.

³² Ne buli muundu yeesi uwikhuunga lisiina ly'Omukasya akhaafune buyeeti bwe khuuwonesebwa. Lwekhuuba nga Umukasya umweene n'aloma, batweela babaakhaabe khu lukiingi Sayuuni mu Yerusalemu bakhaatitukhe. Bano bakhaabe batweela khuubo babaakhaawone, beesi Umukasya umweene aamala khaale khuurobola.”