Read lumasaaba Yoweeli 3 Bible Online

Yoweeli 3 - lumasaaba bible

Yoweeli 3

¹Umukasya waaloma ari, “Mu bifukhu ibyo naluundi khu mbuka iyo, lweesi indikholelakho Yuda ni Yerusalemu khuuba buulayi luundi.

²Indibuusanisa kamanaambo ke shiibala shoosi atweela mu litila lya Yehoshafati. Ibweene iyo indirakikha khuukhalila kamanaambo kumusaango, kukuuwaambakana ni busikha bwase, nga nibo babaandu baase ba Isiraeli. Lwekhuuba baasalanisaka babaandu baase mu manaambo kamakali, bakabanana liiswa lyase.

³Baakhupa buukokha khuukhalawo naanu uuli ni khuufuna baakulwa. Baakulisaka babaana besiinde bari nio bafune bamalaaya, naluundi baakulisaka ni babaana bekhaana bari nio bafune iviini ibamala bameele.

⁴ “Ari inywe babaandu be mu Tuulo ni Sidoni, ni nanywe be mu bisiintsa bya Firisitiya, mumeentsakho shiina? Mulikho muntsiliyaasakho shiina shisheene? Ni muba bari mulikho muntsiliyaasa ise, muli ni khukhwitsiiliilisa naabi, lwekhuuba intsya khukhwinyukhilamwo khaangu naabi, imbeliyaase lweebyo byoosi byeesi mukholile.

⁵Lwekhuuba inywe mwayila ifeetsa yase atweela ni zaabu yase, ni bibiindu byase bye buyiindifu swa busa. Muryo mwabisutaka mwaabiyila mu mesaayilo keenywe.

⁶Inywe mwakulisaka babaandu ba Yuda ni be mu Yerusalemu isi Bayonaani, nio banyalise khuubarusa mu shibala shaabwe, babayile mu shibala she aleeyi naabi.

⁷Ne ari samweene intsya khuubakobosa khukhwaama mu biifwo ibyo byeesi mwabakulisamwo. Intsya khubeliyaasakho lweebyo byoosi byeesi mwakhola.

⁸Nase intsya khukila babaana beenywe besiinde ni bekhaana bakulisibwe isi babaandu ba Yuda; nabo bakyelewo babakulise isi babaandu be mu Sabeya, nga nilyo linaambo liliili lye aleeyi naabi. Ise Umukasya samweene niye ushikanikhile.”

⁹Ni mukhole shikuukuulo isi kamanaambo, nga mukaloma muri, Yiŋoonaŋoonela busoolo! Ni mulaange basoolani beenywe babafuurayo buulayi! Khayo baselikhale beenywe babafuurayo khuusoolana buulayi bakhuumbe batsye bebwakale.

¹⁰Ni mubase tsiindima khukhwaama mu mbako tseenywe tsitsiilima, naluundi mubase kamafumo khukhwaama mu ntsoolelo tseenywe. Ari khayo abo babaali baatoro beelemo kamaani balome bari bali ni kamaani ke khuusoolana.

¹¹Ni mwiitse khaangu, inywe kamanaambo koosi, khukhwaama buli tsimbeka tsoosi, mwiitse mubuusanile atweela. O Umukasya, ari reera aasi liiye lyoowo liliisoolana!

¹²“Ari lekha kamanaambo koosi kalaangane keetse mu busoolo. Lekha koosi kakhuumbe katsye mu litila lya Yehoshafati. Ibweene iyo, ise Umukasya, indikhala aasi, ikhalile kamanaambo koosi kakebotokheleele kumusaango.

¹³Ari yinyusa injeso mu ngaaki, lwekhuuba likyesa lyoolile. Yiitsa musuure iviini, lwekhuuba lisuuriro lye viini lyetsuulemwo kimisabibu. Ni tsinyuungu tsetsuule tsisalasala busa lwe bubwoonaki bwe babaandu bano.”

¹⁴Biikana ni biikana byaaliindiilile busa mu litila lye khuukhalawo. Lwekhuuba mu bweene imwo shifukhu sh'Omukasya shili aambi khukhwoola.

¹⁵Inyaanga ni kumweesi bikhaamaliye busa bili tii, ni tsinieenieesi sitsikhaaburukhe luundi ta.

¹⁶Umukasya alookha ni likono liikali lilyeene khukhwaama mu Sayuuni, arusa likono lyeewe khukhwaama mu Yerusalemu, shaakila shibala shoosi ni likulu byaanikinisibwa. Ne Umukasya umweene niye umuliindi uwe babaandu beewe, niye bubwilukhilo bwe kamaani isi babaandu ba Isiraeli.

¹⁷“Nio lwanyuma inywe mumanye muri ise Umukasya Wele weenywe, kane imenyatsake mu Sayuuni, khu lukiingi lwase lukhosefu. Shiriimba Yerusalemu kane shibatsake shikhosefu, ni babaandu be kamanaambo kakaandi sibalilayo luundi bashibwakale ta.

¹⁸Khu shifukhu isho, iviini indokote inyene ilironyaka khukhwaama mu njiinji, ni khu bikoongo khuulirurukukha kamabeele. Kameetsi kalitsula mu ntsitsi tsoosi tse mu Yuda, ni sebele ilirubukha khukhwaama mu Lisaayilo Likhulu ly'Omukasya, nga itsukhiilila Litila lya Akasiya.

¹⁹Ne shibala sha Misiri shilikyela busa shibala shishoomu, Edomu shiliiba busa kumubiimbi, lwekhuuba nibo bebwakala babaandu ba Yuda, baakhoonyaka babaandu babaakhalikho ni kumusaango ta mu shibala shaabwe.

²⁰Ne shibala sha Yuda shiliitsulamwo babaandu biilo ni biilo, ni Yerusalemu shilibawo kimiboolo ni kimiboolo.

²¹Ni kimisaango kye bubwiiri kye babaandu baase abe kyeesi ishiili khuubeyakhila ta, kane imbeyakhile. Ni nase Umukasya samweene indikhola tsiingo tsase khuuba mu Yerusalemu, khuumenya atweela ni babaandu baase.”