Read lumasaaba Amosi 1 Bible Online

Amosi 1 - lumasaaba bible

Amosi 1

¹Tsino tsili tsilomo tsyeesi Amosi aaloma. Amosi yuno abe aama mu shiriimba she Tekowa, nga ali umwaayi we kamasheese. Wele aamurumburira niye bibiindu bino bibiwaamba khu Isiraeli, nga ishitaambayo kimiiko kibili nio ibewo khuutengaasibwa khwe shiibala. Mu mbuka iyo, abe Uziya ali umuyiinga wa Yuda, ni Yerobowamu umusoleeli wa Yehoashi, abe ali umuyiinga uwa Isiraeli.

²Amosi waaloma ari: “Umukasya akhookhela khu lukiingi Sayuuni; likono lyeewe likuukuulila mu Yerusalemu. Shino shikila kamaayilwe kooma ni bunyaasi bwe khu lukiingi Kalumeeli bwaniaala.”

³Umukasya aloma ari, “Ise ndi ni khuuwa babaandu be mu Damasiko shitaambiso, khulwekhuuba baakholile bibyoonako nga beelaŋanamo busa. Baabirisa babaandu be mu Gileyadi buubi naabi, nga babanyalulaka busa.

⁴Ni nashiryo ise ikhaasiindikhe kumulilo kwooshe lubili lweesi umuyiinga Hazayeli ombakha, naluundi kwoonakise lubili lwa Benihadadi.

⁵Ise ikhaafuniaake biilibwa bye shiriimba Damasiko, indusewo ni babaandu babaamenya mu Litila lye Aveni, atweela n'umuwuli uwa Besedeni. Babaandu be mu Siriya bakhaarusibwewo, bayilibwe mu shibala she Kiri nga bali baabowe.”

⁶Umukasya aloma ari, “Ise ndi ni khuuwa babaandu be mu Gaza shitaambiso, khulwekhuuba baakholile bibyoonako nga beelaŋanamo busa. Khulwekhuuba baawaamba babaandu be bibyaalo bibuufu, baabayila baabakulisa nga baakulwa isi babaandu be mu Edomu.

⁷Ni nashiryo ise ikhaasiindikhe kumulilo kwooshe tsiimako tsye shiriimba Gaza, ni bibyombakhe bibiilimo byoosi.

⁸Baawuli be biriimba Ashidodi ni Ashikeloni, ise ikhaabaruse khu buwuli. Ise ikhaawe shiriimba she Ekuroni shitaambiso, ni ba Filisitiya babaaramirewo, bakhaafwe.”

⁹Umukasya aloma ari, “Ise ndi ni khuuwa babaandu be mu shiriimba Tuulo shitaambiso, khulwekhuuba baakholile bibyoonako nga beelaŋanamo busa. Khulwekhuuba baawaamba babaandu be linaambo libuufu, baabayila mu bubowe mu shibala she Edomu. Baalekha khushebulila bari abe bali be buulebe ta.

¹⁰Ni nashiryo ise ikhaasiindikhe kumulilo kwooshe tsiimako tsye shiriimba Tuulo, ni bibyombakhe bibiilimo byoosi.”

¹¹Umukasya aloma ari, “Ise ndi ni khuuwa babaandu be mu shiriimba Edomu shitaambiso, khulwekhuuba baakholile bibyoonako nga beelaŋanamo busa. Baakubyeenga baalebe baabwe ba Isiraeli, nga sibabokesanisakho ni shiisa ta. Baarama nga bookesanisa liirima liikali naabi, nga silyakama ta.

¹²Ni nashiryo ise ikhaasiindikhe kumulilo kwooshe tsiimako tsye shiriimba Temani, ni bibyombakhe byoosi bibiili mu Bozira.”

¹³Umukasya aloma ari, “Ise ndi ni khuuwa babaandu be mu shiriimba Amoni shitaambiso, khulwekhuuba baakholile bibyoonako nga beelaŋanamo busa. Khulwekhuuba mu khuba ni kameelu ke khuubalaayisa liloba lyaabwe, baawaamba baakhasi be bisoombo mu Gileyadi, baabakhalaka bisoombo ibyo.

¹⁴Ni nashiryo ise ikhaasiindikhe kumulilo kwooshe tsiimako tsye shiriimba Raba, ni bibyombakhe byoosi bibiilimo. Ikhaabewo luwuungu luukali khu shifukhu she busoolo, ni busoolo bukhaawunye iimuka.

¹⁵Umuyiinga waabwe ni baraangirisi beesi awula ni nabo, bakhaayilibwe mu bubowe.”