Read lumasaaba Amosi 2 Bible Online

Amosi 2 - lumasaaba bible

Amosi 2

¹Umukasya aloma ari, “Ise ndi ni khuuwa babaandu be mu Mowabu shitaambiso, khulwekhuuba baakholile bibyoonako nga beelaŋanamo busa. Baawaamba kamakuumba k'omuyiinga uwa Edomu, mu shifwo she khuukeesamo shiriifwa, baakoosha ni kumulilo kekyela likoshe busa.

²Nashiryo ise ikhaasiindikhe kumulilo mu liloba lye ba Mowabu, kwooshe tsiimako tsye shiriimba Keriyosi. Babaandu be mu Mowabu bakhaafwiile mu liyoombo lye busoolo, nga basilikhale babaakhupa liyoombo ni babaafuura tsifulumbeti baabebotookheleele.

³Ise ikheere umuyiinga uwa Mowabu, atweela ni baawuli beesi niye awula ni nabo.”

⁴Umukasya aloma ari, “Ise ndi ni khuuwa babaandu be mu Yuda shitaambiso, khulwekhuuba baakholile bibyoonako nga beelaŋanamo busa. Khulwekhuuba baalobile khurekeeresa kamakaambila keesi ise Umukasya nabawa, baalobile khuuloondelela indeekela yase. Baatsiile khukhwisaaya ba wele be bubeeyi busa, nga bakuuka baabwe ni baakhola.

⁵Ni nashiryo ise kane isiindikhe kumulilo mu Yuda, kutsye kwooshe tsiimako tsye mu Yerusalemu.”

⁶Umukasya aloma ari, “Inywe babaandu be mu Isiraeli, ise ndi ni khuubawa shitaambiso, khulwekhuuba mwaakholile bibyoonako nga mwiilaŋanamo busa. Mwawaamba baandu babaakhalikho kumusaango kwoosi ta ne nga sibanyala khuuliha byeesi mubabaantsa ta, mwaabakulisa mu bukulwa, nga mubakulisamo ifeetsa, namwe buukusi bukyeekhe naabi.

⁷Bakhaandakilila abo babaakhali ni kamaani naluundi babaakheenyala ta, nga babareerera khukhwiyembelela khuukali naabi. Umusaani n'umwaana weewe umusooleli, bakona n'umuraambi uw'ekhasi niye mutweela. Mu shino bakhomyaasa lisina lyase likhosefu.

⁸Mu buli shifwo she khukhwisaayilamo, babaandu bano beeyalisa aasi khu bikwaaro byeesi bawaambiliile khukhwaama khu bataambi, khulwe kamakobi. Banyweela mu lisaayilo lya Wele, iviini isi bawaambile khukhwaama khu baandu beesi babaantsa.

⁹“Nibo baalekha khuumanya bari ise noonakisa ba Amori naabamalilawo ilala khulwaabwe ta. Ba Amori abo abe bali baleeyi nga kimisaala kimi kedali naluundi bali ni kamaani nga kimisaala kimi oko.

¹⁰Naluundi ise nabarusa inywe khukhwaama mu shibala Misiri, nabaraangirira mu mubiimbi khuumala kimiiko kamakhumi kane, nga imbayila khuuwaamba shiibala she ba Amori.

¹¹Ise narobora batweela khu baana beenywe khuuba baŋoosi, ni babaandi khuuba ba nazariti.[1] Baandu baase ba Isiraeli, munyala mwekaana bibiindu bino? Ise Umukasya niye ulikho ubareeba inywe.

¹²Ne bona inywe mwaakila ba nazariti baanywa iviini, naluundi mwaalakila baŋoosi khuulekha khukhola buŋoosi ta.

¹³Ne bona ari, ise intsya khubamiinila inywe mu shifwo shitweela, muyeŋaane, mube busa nga shikaari sheesi bayikilekho biilimwa bye likesa.

¹⁴Ikhaba abo babaatima tsiindimo ni kamaani keene, sibakhaanyalise khuutitukha batsye bawone ta. Abo babaali ni kamaani, kakhaabawemo, ni basilikhale balekhe khunyalisa khuusoolana khuuwonesa buulamu bwaabwe ta.

¹⁵Ikhaba abo babasoolana nga baraambisa buyiingo, nabo bakhaakhasikhane. Abo babaatima tsiindimo ni kamaani sibakhaanyalise khuutitukha khuuwonesa buulamu bwaabwe ta. Ikhaba abo babaatimila khu ŋwaŋwa, sibakhaanyalise khuutitukha bawonese buulamu bwaabwe ta.

¹⁶Khu shifukhu isho, ikhaba babaaminyisa bunyindaalifu mu basilikhale, bakhaatuume bye busoolo byaabwe aasi, batime nga bali mu makhono busa.” Buurume buno bwaamile isi Umukasya umweene.