Read lumasaaba Amosi 3 Bible Online

Amosi 3 - lumasaaba bible

Amosi 3

¹Babaandu ba Isiraeli, ni murekeerese buurume buno bweesi Umukasya alomile, nga bubawaamba khus'iinywe, mumuuli linaambo lyeesi niye aawonesa khukhwaama mu Misiri.

²“Khukhwaama mu manaambo ke shibala shino koosi, inywe mwenyene mu muuli linaambo lyeesi ise namanya, naluundi nenaanakho. Isho nisho shishikila bibyoonako byeenywe byaakhalasa ise naabi, naluundi nisho shikila ise ndi ni khuubawa inywe shitaambiso.” Nashiryo ari Umukasya alikho aloma ari,

³Babaandu babili banyala baatsya khu lukyeendo nilwo lutweela, nga sibanyoowile khufukiilisana ta?

⁴Italanyi ikhulu inyala yaakhookhela busa mu shisaali, nga siyaboone khasolo kheesi itsya khwiira ilye ta? Italanyi ishiili isoleeli inyala yaakhookhela isi ikona, nga mbaawo she khuulya sheesi iwaambile ta?

⁵Khanywiinywi khanyala khaakwa busa khu mubasu nga mbaawo ukurekire ta? Kumubasu kunyala kwaarekulukha kwonyene busa nga mbaawo shishikwitiililekho ta?

⁶Babaandu be mu shiriimba banyala baawuulila likono ly'efulumbeti lilikuukuula liri iliwo busoolo, baalekha khukhwiyembeelela ta? Buwaangafu bunyala bwaakwa busa khu shiriimba, nga akhali ndi Umukasya niye ubusiindikhile?

⁷Ilala, ilala, Umukasya Wele, s'aakhola shishiindu shoosi nga ashiili khunyoowa waamanyisa babaakaanisi beewe, baŋoosi ta.

⁸Italanyi inyala yaabulukhuma, yaalekha khubawo umuundu uwiyembelela ta? Umukasya umuwuli uwe bibiindu byoosi anyala waakanikha, yaalekha khubawo umuundu ukuukuula buurume bweewe ta?

⁹Amosi waalomela baraangirisi be mu Samariya ari, “Ni musiindikhe baarume batsye isi abo babaali bayiinga ba Misiri ni Ashidodi, babalomele bari, ‘Inywe ni mubuusanile mu ngiingi tsye mu Samariya, mubone khuutumbukhana khukhuulimo, ni bibyoonako byeesi balikho bakhola.’”

¹⁰Umukasya alikho aloma ari, “Bayiinga abo bayiitsusa tsiintsu tsyaabwe ni bibiindu bye butsoonwaaki ni khuunuula busa. Sibalikho ikhaba ni bwaŋali bwoositsana ta.

¹¹Ni nashiryo, kane baasiku bebotokhelele shibala shaabwe, bafuniaake tsiimako tsyaabwe, naluundi banuule ibyo bibiili muntsu tsyaabwe.”

¹²Umukasya alikho aloma ari, “Nga umwaayi n'awonesakho biikele bibili byonyene, namwe ikhaba khukhuru khwonyene khukhwaama khu shaayo sheesi isolo ililiilekho, ni babaandu be mu Samariya nabo kane babe shitweela busa baryo. Bafwiiti bari nibo babaakhaaramewo, babaakhaanyalise khuumenya mu bulamu buulayi.

¹³Nashiryo rekeeresa bibiindu bino, mureewure babaandu be lisaaye lya Yakobo. Bibiindu bino Umukasya, Umunyali uwa byoosi niye ubikanikhile.

¹⁴Khu shifukhu khweesi ise ikhaaweelekho babaandu ba Isiraeli shitaambiso khulwe bibyoonako byaabwe, ise ikhaafuniaake bibyeeso bye khukhwisaayilakho bibiili mu shiriimba Beseli. Ise ikhaafuniaake ikhaba tsiintsika tsye khu sheeso tsikwe aasi.

¹⁵Ise ikhoonakise tsiintsu tsyaabwe tsyeesi baraambisa mu mbuka iye buunyifu, ni mu mbuka iye buukhafu[2], ikhaba itsyo tsitsiili tsiimiliwu naabi, ise ikhaatsyoonakise.”