Read lumasaaba Amosi 4 Bible Online

Amosi 4 - lumasaaba bible

Amosi 4

¹Bakhasi be mu Samariya, inywe mumwanera nga tsiikhaafu tsye mu Bashani, ni murekeerese biilomo bino. Inywe mumiinilisa abo babaali bataambi, naluundi babaakhenyala ta. Inywe nibo babalaangilisa baseetsa beenywe, nga mubalomela muri, “Khureerere bye khuunywa, khunywe.”

²Umukasya Wele waamalile khaale khukhwitsuba nga aloma ari, “Imbuka iye bihangafu ikhaaboole khus'iinywe, isi babaandu balibakhweesela inywe ni kimilobo; buli mutweela khus'iinywe akhaabe busa nga ni bakhweesa inyeeni khukhwaama mu meetsi.

³Bakhaabarusire isi kamatikiiyi kawuumbukhaka, nga buli mutweela bamubirisira aambi ni isi amenya, muryo babatimise mutsye mu bifwo binyaalu naabi.” Bibiindu bino Umukasya umweene niye ubilomile.

⁴Umukasya Uuli angaaki alikho aloma ari, “Inywe babaandu be mu Isiraeli, abe noola mubona muri shibakhila, ni mutsye i Beseli mu shifwo shiikhosefu, mukhole bye bubwoonaki. Ni mutsye i Gilugaali, mukhole bye bubwoonaki ni kamaani keenywe koosi. Ni mutsye mu moni mureere bibyaayo byeenywe muwaaneyo tsisaayilo buli kumutikhinyi, naluundi khu shifukhu shishikhola khataru, mureere shisiintsa shitweela sheenywe khu she likhumi.

⁵Ni mutsye mu moni muwaaneyo kimikaati kyeenywe kye khuusiima isi Wele, nio muryo mwiruuye mwabeene khulwe biwaanwa byeesi mulooselakho mwawaanayo. Khulwekhuuba isho nisho shishibasangaasa inywe khuukhola.

⁶“Ise niye uwabareerera inywe intsala, waakila yaalekha khubawo biilyo mu linaambo lyeenywe ta, ne shitweela busa inywe mwaalekha khukhuungobolayo isi ise ta.

⁷Ise nalobela ifula khuukhupa mu mbuka abe isi biilimwa biikikoombelamo naabi. Abe ise ifukiilisa ifula khuukhupa mu shirimba shitweela, ne yaalekha khuukhupa mu shiriimba shishiindi ta. Ifula yaakhupa mu mikuunda kimilala, ne kikiindi biilimwa byooma.

⁸Khulwe buulesa buukali naabi nga bwaabaliile, babaandu khukhwaama mu biriimba bibikhali bitweela ta, bataala batsya mu shiriimba shishiindi nga baweentsa kameetsi, ne shitweela busa kaalekha khubamala buulesa ta. Ne shitweela busa inywe mwaalekha khuukobola isi ise ta.

⁹“Ise nasiindikha ikhuungu ni lukukhu byoonakisa biilimwa byeenywe, tsiisike tsyaalya kimisaala kyeenywe kimifiki ni kimizabibu. Ne shitweela busa inywe mwaalekha khuukobola isi ise ta.

¹⁰“Ise nabasiindikhila inywe buulwaale buubi naabi, nga bweesi nasiindikhila be mu Misiri. Ise naakila basoleeli beenywe baafwiila mu busoolo, naluundi baasiku baayila tsiŋwaaŋwa tsyeenywe. Naluundi ise nakila babaafwiila mu busoolo baabola, buubolo bwaawunya naabi mu kaambi tsyeenywe. Ne shitweela busa inywe mwaalekha khukobola isi ise ta.

¹¹“Ise naakila batweela khusiinywe baahela, baaba busa nga ninakila biirimba Sodoma ni Gomora byaahela. Mumwaramawo mwaaba busa nga luukhu lweesi barusile mu mayika ni lwituukha liliisi. Ne shitweela busa inywe mwaalekha khuukobola isi ise ta.

¹²Ni nashiryo ba Isiraeli, ari ise ndi khuutsya khubawa inywe shitaambiso. Khulwekhuuba ise ndi khuutsya khubawa inywe shitaambiso ba Isiraeli, muli ni khukhwirengekharengekhela khuubakhalila kumusaango.”

¹³Khulwekhuuba uyo uwabuumba tsingoongo, naluundi wabuumba n'imbewo, lisiina lyeewe bari Umukasya Wele uwe kamahe! Uyo niye urumburira babaandu bibyambaaso byeewe, naluundi waashuusa kumuusi kweekela shishiilima. Niye akeendela angaaki we shibala.