Read lumasaaba Amosi 5 Bible Online

Amosi 5 - lumasaaba bible

Amosi 5

¹Ba Isiraeli, inywe ni murekeerese kumweenya kuno kweesi ise niimba nga imbalila inywe. Kuloma kuri:

²Isiraeli abe ili busa nga umukhaana indungubaasi, ari yoonakisibwile, singane yiinyukhe luundi taawe. Baakyantsukhile aasi isi ikwiile, mbaawo unyala khuukiyeeta yenyukha khu ngaaki luundi ta.

³Khulwekhuuba Umukasya Wele aloma ari, “Shiriimba shoosi mu Isiraeli shishisiindikha basoolani shikana shitweela (1,000) mu busoolo, babaakhakobole bakhaabe shitoondo shitweela shonyene (100); ne isho shishikhaasiindikhe basoolani shitoondo shitweela, babaakhakobole bakhaabe liikhumi boonyene.”

⁴Khulwekhuuba Umukasya alikho alomela babaandu be nda iya Isiraeli ari, “Ni mukobole muntsisaaye ise nio akile mube ni buulamu buulayi.

⁵Mukhakhalisa mwaatsya i Berisheba khukhwisaayilayo ta. Mukhakhakakho khukhwaambaasa muri kane munyoole ise mu shifwo shishiilaangibwa shiri Beseli ta. Beseli shitsya khukhwoonakisibwa. Naluundi mukhatsya i Gilugaali ta, khulwekhuuba babaandu be bweene iyo bakhaayilibwe mu bubowe.”

⁶Ni mwisaaye Umukasya, nio akile mube ni bulamu buulayi. Nga simwaakholile isho ta, kane amaamile busa be lisaaye lya Isiraeli nga kumulilo ni kumaamila. Kumulilo kukhooshe babaandu be Beseli, ilekhe khubawo na mutweela unyala khuukusimisa ta.

⁷Khulwekhubeela inywe simuloondelela bya ŋali ta, naluundi mulyakhana babaandu bibiindu byaabwe, inywe kane muhele muwewo!

⁸Umukasya niye uwabuumba kukhuluulumbi kwe tsinieniesi. Niye ushuusa shishiilima shekela kumuusi, naluundi kumuusi kwekela shishiilima. Niye ubukula kameetsi ke mu nyaantsa imboofu, waakatsukha khu shibala. Lisina lyeewe bamulaanga bari Umukasya.

⁹Niye uwoonakisa abo babaali ni kamaani kamakali, ni tsiimako tsyaabwe tsye kamaani.

¹⁰Inywe mubiiyila uyo ukhaandisa bye khuumiinikhilisa babaandi, naluundi uyo ukanikha bya ŋali byoonyene mu musaango.

¹¹Ni nashiryo, ikhaba nga inywe mwaayombakha tsiintsu tsiimiliwu, singane mutsimenyemo ta. Naluundi ikhaba nga mwabyaala kimizabibu kimilayi, ne singane mukilyekho ta. Khulwekhuuba inywe mumiinikhilisa bataambi, naluundi mubeebakho biilimwa byaabwe biibulungule.

¹²Ise naamanya nga bibyoonako byeenywe ni bili bye kamaani naabi, naluundi nga muli ni kimisaango kimikali naabi. Inywe mumiinilisa babaandu babaakhalikho kumusaango ta, mwalyakhana bya beene, naluundi mu khukhala kimisaango mwamiinilisa abo babaali bataambi.

¹³Ne abo beesi inywe mwabiyila, bamanya baaba bakesi baasila busa, baalekha khuloma ilomo yoosi ta. Khulwekhuuba ili imbuka iye bubwoonaki.

¹⁴Nga mukana muri nio mumenye buulamu buulayi, ni mukhole bibiindu biilayi, akhuba biibi ta. Shino kane shikile Umukasya Wele uwe kamahe abe ni nanywe, nga inywe ni muloma muri ali ni nanywe.

¹⁵Ni mukane khuukhola bibiindu biilayi, mwikaane bye bubwoonaki. Mu bye bukayi, ni mukholatsake bye bwa ŋali. Winyoola, Umukasya Wele uwe kamahe, anyala wawaambila ba Isiraeli abo babaashiili baalamu shiisa.

¹⁶Ni nashiryo, Umukasya Wele uwe kamahe alikho aloma ari: “Ikhaabewo khuulila ni khuukuukuula khuukali khwe kumutaambo mu mikhoosi kye mu biriimba. Bakhaalaange abo babaali baalimi khuulilila atweela ni naabo beesi bakoombowa khuulila baafu, nga balila abo babaafwiile.

¹⁷Ikhaba mu mikuunda kye kimizabibu kyoosi, ikhaabewo khuulila, khulwekhuuba ise Umukasya indikho niitsa khuubawa inywe shitaambiso.” Umukasya umweene niye ukanikhile bibiindu bino.

¹⁸Nga shili she kumutaambo kumukali isi abo babekoomba naabi khuubona khu shifukhu sh'Omukasya. Shifukhu isho inywe shibayeetakho shiina? Khulwekhuuba shili shifukhu she shishiilima, akhuba she buwaanga ta.

¹⁹Shili busa nga umuundu n'atitukha italanyi, waamala wakaanana shiibulukhu! Namwe nga umuundu naatsya muuntsu mweewe, uri atiila kumukhono kweewe khu litikiiyi, indemu yaamuluma.

²⁰Shiifukhu she khukhwiitsa khw'Omukasya shili she shishiilima, akhuba she buwaanga ta; shili she kumutaambo, nga mbaawo shiilayi shoosi ta.

²¹Umukasya aloma ari, “Ise indekelesa naluundi singana bifukhu byeenywe bye kamayiiya ta. Ise tsimbuusano tsyeenywe tsye khukhwisaaya sitsisangaasakho ta.

²²Ikhaba mwaakhareera biwaanwa byeenywe bye tsisaayilo tsintsoshe ni bye biilimwa biikhupake, ise singane imbyakaanile ta. Ikhaba biiwaanwa bye bibyaayo byeesi inywe mwamala khukhwaayisa byaakhomela, mwaakhabireera ise singane imbyakaanile taawe.

²³Ni muruse ibweeni wase liyoombo lye kimyeenya kyeenywe kyeesi mwiimba. Ise siingana naarekereesakho ikhaba liikono lye kamatuungu keenywe ta.

²⁴Mu shifwo sh'ebyo, khali bwaŋali bumalataane mus'iinywe, buba busa nga kameetsi. Ni bukhosefu khali bubeelewo busheele, buba busa nga luluutsi lulwiikha.

²⁵“Ba Isiraeli, ise imbareeba inywe indi, kimiiko kamakhumi kane kyeesi mwamala nga muli mu mubiimbi, inywe mwandeererakho ise tsiisayilo?

²⁶Ne bona ari mwaatsiile mwesaayile bifwaani bya Sakusi, nga niye isi inywe mwabuumba muri abe wele umuyiinga weenywe. Ni bya Kayiwani, wele uwe tsinieniesi. Kane mwabeene musute bifwaani ibyo,

²⁷mutsye ni nabyo, mu mbuka isi ise ikhaabayilile mube baabowe mu shibala shishiili aleeyi, nga waabirirekho ni shiibala she ba Siriya.” Ulomile bibiindu bino, ali niye Umukasya, nga lisiina lyeewe bari Wele Umunyali uwa byoosi.