Read lumasaaba Amosi 6 Bible Online

Amosi 6 - lumasaaba bible

Amosi 6

¹Nga shili she kumutaambo isi inywe mumuuli mu Sayuuni, nga mumenya buulamu buulayi. Nga shili she kumutaambo isi inywe mumuubona muri mbaawo bukosi bubuunaboolakho khus'iinywe ta. Nga shili she kumutaambo isi inywe baraangirisi be angaaki be linaambo lino lye angaaki naabi, Isiraeli, inywe beesi babaandu batsyayo nga baweentsa buyeeti.

²Ni mutsye mubone shiriimba she Kalune nga ni shili. Lwanyuma mwiloosele mutsye mubone shiriimba Hamasi she angaaki nasho nga ni shili. Mwiloseleyo mutsye mubone shiriimba Gasi she ba Filisitiya nasho. Inywe mwambaasa muri biriimba ibyo byaba bye angaaki naabi khuuminyisakho buyiinga bwa Yuda ni bwa Isiraeli? Yaba biriimba ibyo bili ni liloba liikali khuuminyisa lilyeenywe?

³Inywe simukana mwaafukiilila muri shifukhu she khukhwoonakisibwa khweenywe shili aambi ta. Ne ate bibiindu byeesi inywe mwabeene mukhola biloosela busa khuusyeenda shifukhu isho khukhwoola aambi.

⁴Nga shikhaabe she kumutaambo isi abo babaakona khu bulili bwe buukusi bwe angaaki, nga beetikiya kimisisinwe. Naluundi nga balya tsiinyama tsiinulu tsye tsikhaafu tsisoleeli ni kamasheese kamasoleeli.

⁵Nga shili she kumutaambo isi abo babekhootsela babeene kimyeenya nga umuyiinga Dawudi n'akholatsaka, nga bakhupila kimyeenya ikyo khu matuungu.

⁶Shili she kumutaambo isi inywe mumwilolopaka iviini ingali iryo, naluundi nga mwihakha bye khukhwihakha bibiwunya buulayi, ne nga she khukhwoonakisibwa khwa Isiraeli inywe sishibawaambakho ta.

⁷Ni nashiryo, inywe mukhaabe iburaangisi w'aabo babaakhaayilibwe mu bubowe. Bye kamayiiya keenywe ako ni limenya liilayi byoosi bikhaawewo.

⁸Umukasya Wele, umunyali uwa byoosi, waamalile khaale khukhwiitsuba nga aloma ari, “Ba Isiraeli beeniinisa angaaki. Ise singana intsibirisa yaabwe ta. Ise singana isaambo isi nibo bamenyamo buulamu bwe mu ntsu tsye buukusi bwe angaaki ta. Ise ikhaawe baasiku baabwe kamaani, bawaambe shiriimba she ba Isiraeli, bayile ni bibiindu bibiilimo byoosi.”

⁹Ne noola iliwo babaandu liikhumi babaaramirewo mu ntsu indweela, boosi bakhaafwe.

¹⁰Nio akile umulebe waabwe mutweela ukhola khu bye khusiikha, ayile kumulaambo asiikhe. Nio khootsaawe uw'omufu uri areeba uwe bulebe uyo yeesi bali ni naye ari, “Iliyo kumulaambo kukuundi kukushiili muntsu?” Uyo uuli muntsu amwiilemo ari, “Taawe. Sila busa. Khuli ni khukhwitsiiliilisa khubone khuri sikhukuukuula lisina ly'Omukasya ta.”

¹¹Khulwekhuuba nga Umukasya waarusire liikaambila, bakhaaminiangule tsiintsu tsimboofu ni tsifwiiti, tsiikele busa kamawuumbu.

¹²Mwaabonakho tsiŋwaaŋwa ni tsitimila khu lwaanda? Namwe umuundu anyala wawaamba imbako iye tsikhaafu, waalima mu nyaantsa? Ne bona inywe mwawaamba bwa ŋali mwabwikesa buutwa, ni bibiindu bibiili biituufu mwabiikesa bye bubeeyi.

¹³Inywe mwiniinisa angaaki mwibuyila muri mwawaamba shiriimba Lodebari khukhwaama khu baasiku. Inywe mwibuyila nga muloma muri, “Ifwe khuli ni kamaani kakaamala, khunyala khwawaamba shiriimba Karanayimu.”

¹⁴Umukasya, Umunyali uwa byoosi aloma ari, “Ba Isiraeli, ise ntsya khusiindikha liiye khukhwaama mu shibala shishiindi, liwaambe naluundi liwule shibala sheenywe. Liiye ilyo likhaabamiinilise inywe nga liwula khukhwaamila ingaaki mu shibaanga she Hamasi, khukhwoola imwaalo khu kheetsi khakhaali i Araba.”