Read lumasaaba Amosi 7 Bible Online

Amosi 7 - lumasaaba bible

Amosi 7

¹Ise Amosi naafuna she khuubonekhelwa khukhwaama isi Umukasya. Nga mu nisho, ise nabona nga Umukasya arekekha tsiisike khuutsisiindikha khu shibala. Shino shakholikha nga abe nio balimalile khuukyesa biilimwa by'omuyiinga, nga buunyaasi abe bwaarakikhile khuutsowa luundi.

²Mu khubonekhelwa ukhwo, ise nabona nga tsiisike tsyatsana tsyaaliile biilimwa byoosi mu shibala. Kila ise inoma ndi, “Umukasya Wele, n'uwaambile babaandu boowo shiisa. Bona sibali baakali ta, naluundi sibali ni kamaani ta!”

³Kila Umukasya ashuusakho shishambaaso sheewe, waaloma ari, “Shishiindu sheesi iwe uboone singene shikholikhe ta.”

⁴Ise ndi naafuna khuubonekhelwa khukhuundi khukhwaama isi Umukasya, Umunyali uwa byoosi. Mu khubonekhelwa khuno, ise naabona nga Umukasya arengekharengekha khuuwa babaandu beewe shitaambiso nga araambisa kumulilo. Kumulilo ukwo kwoosha khukhwaamila ilala mu buleeyi bwe aasi, kwaarakikha ni khukhwoosha shiibala khu ngaaki.

⁵Kila ise inooma ndi, “Umukasya Wele, ise naakhwikoontseleele, ni waakamisile awo. Khulwekhuuba babaandu boowo sibali baakali ta, naluundi sibali ni kamaani ta.”

⁶Kila ndi luundi Umukasya ashuusakho shishambaaso sheewe nga aloma ari, “Ikhaba shishiindu shino sheesi iwe waama khubona, nasho singene shikholikhe ta.”

⁷Ise naafuna khubonekhelwa khukhuundi khukhwaama isi Umukasya. Ise naabona Umukasya nga wemikhile aambi ni litikiiyi lyeesi boombakha nga baraambisa ifuuti iy'omwombakhi. Abe Umukasya wawaambile ifuuti yino mukhono.

⁸Kila Umukasya andeeba ise nga aloma ari, “Amosi, shiina sheesi iwe uboone?” Kila nase imwiilamo ndi, “Ise naboone ifuuti iy'omwombakhi.” Kila Umukasya antsilamo ari, “Bona ise ndi khuuraambisa ifuuti yino khukhwookesanisa ndi babaandu baase ba Isiraeli bali nga litikiiyi lilyamala khaale khuuborokha. Ni nashiryo ise kane imbawe nibo shitaambiso; singene ise ishuusekho bibyambaaso byase luundi taawe.

⁹Biifwo mweesi lisaaye lya Isaaka lisaayilamwo byoosi, bikhoonakisibwe. Biifwo biikhosefu byoosi mu Isiraeli bikhaarame busa nga kamakubili. Yerobowamu akheeribwe ni lurima, nio akile buuwuli bweewe bwaakamile abweene awo.”

¹⁰Lwanyuma lwa bino, Amaziya umusaayi uwe mu Beseli, waasiindikha buurume isi Yerobowamu, umuyiinga uwa Isiraeli nga amulomela ari, “Amosi alikho akhutsiila iwe lwe aasi mu ba Isiraeli. Isaambo isi akanikhamo inoonakisa liinaambo lino.”

¹¹Khulwekhuuba Amosi yuno alikho aloma ari, “Yerobowamu akhaafwiile mu busoolo, nga bamwiira ni luurima. Ni babaandu ba Isiraeli bali ni khuuyilibwa mu bubowe mu shibala shishiindi busa, shishiili aleeyi khukhwaama mu shibala shaabwe.”

¹²Kila Amaziya alomela Amosi ari, “Umuŋoosi, byeesi iwe ulomile bimala. Ari rura ano mu Isiraeli, wiileyo mu Yuda, utsye ukholele buŋoosi bwoowo ibweene iyo. Khayo beeyo bakhusasule iwe khulwe buŋoosi bwoowo.

¹³Ukheelakho waakholela buŋoosi ano mu Beseli ta. Shino shili shiifwo shikhosefu mweesi umuyiinga esaayila, naluundi shili nisho lisaayilo likhulu lye linaambo.”

¹⁴Kila Amosi elamo Amaziya nga amulomela ari, “Iseese sinaba umuŋoosi, namwe mutweela khu be kamatuuli ke baŋoosi, beesi baliyila kumukheemba ta. Ise ndi umwaayi uwe bibyaayo, naluundi indi umuundu ulimila kimisaala kimifiki.

¹⁵Ne Umukasya niye uwandusa ise khu buuraambi bwase bwe bubwaayi bwe bibyaayo, nga anomela ari, ‘N'uutsye, ukhole buuraambi bwe buuŋoosi mu baandu baase be mu Isiraeli.’

¹⁶Ni nashiryo, ari ni murekeerese byeesi Umukasya abalomela inywe. Mu shifwo she khuurekeeresa byeesi Umukasya aloma, iwe ulikho unomela uri, ise ikhakhola buŋoosi khu ba Isiraeli ta, naluundi uri ise ikhaboolela babaandu baamwo bibiindu biibi byeesi bali khuukhola ta.

¹⁷Ni nashiryo Amaziya, Umukasya alikho aloma ari, umukyelema woowo akhekyele umumalaaya, nga akyeendaana busa mu shiriimba. Babaana boowo bakhaafwiile mu busoolo, nga babeera ni lurima. Babaandu babaandi busa nibo babaakhaakabanane shiibala sheenywe. Iwe wamweene ukhaafwiile mu shibala she banaambo. Naluundi ilala, ilala, ikhuŋaŋasa ndi ba Isiraeli boosi bakhaayilibwe mu bubowe, mu shibala shishiili aleeyi khukhwaama khu shaabwe.”