Read lumasaaba Amosi 8 Bible Online

Amosi 8 - lumasaaba bible

Amosi 8

¹Ise naafuna she khuubonekhelwa shishiindi khukhwaama isi Umukasya. Ise naabona shishiipo nga shilimo biilimwa birobe.

²Kila Umukasya andeeba ise ari, “Amosi, shiina sheesi iwe uboone?” Kila ise imwiilamo indi, “Ise naboone shishiipo nga shilimo biilimwa birobe.” Lwanyuma Umukasya weloosela waanomela ise ari, “Ari babaandu baase ba Isiraeli boolile khuuhela. Ise ndi ni khubawa shitaambiso; singene ishuusekho shishambaaso luundi taawe.

³Khu shifukhu isho, kimyeenya kye mu lisaayilo kikyandibeele kye khukhwikhoya, kikhekele kye kumutaambo kwe khuulila baafu. Kimilaambo kikhaamalatane buli aandu oosi. Mbaawo umuundu ikhaba na mutweela ukhenyuse mukhanwa alome ikhaba ilomo indweela ta.”

⁴Inywe babaamiinikhilisa bataambi, naluundi nga mubeera mubamalewo mu linaambo lino, ni murekeerese bibiindu bino.

⁵Inywe mwiikuta mwenyene nga muloma muri, “Biifukhu biikhulu biwakho liina nio khunyalise khukulisa biilime byeefwe? Shiifukhu sha Sabato shiwakho liina, nio khunyalise khurakikha khukulisa biilime byeefwe? Nio khunyalise khuulyakhana nga khumiina shipimo shiboombe, ne nga khulooselakho buukusi bwe bibiindu.

⁶Awo khunyala khwanyoola umutaambi ukhaasikhanile khuuliha kamakobi keewe, khwaamukulamo ifeetsa, namwe tsisapatu tsibili. Naluundi nio khukulise iŋaano ilimo ifulabyo khu buukusi bwe angaaki.”

⁷Ne Umukasya Wele uwa Isiraeli wetsubile nga aloma ari, “Mu ŋali ise s'ikhebilile biikholwa byaabwe bye bubwoonaki ta.

⁸Nashiryo shibala isho shoosi shikhaatengaale, nio buli mutweela ushilimo abe mu mutaambo kumukali. Shoosi shikhaaniine shitsule nga luluutsi Nayilo, naluundi shiileyo shiwetsekhelele nga luluutsi lweene Nayilo.”

⁹Umukasya alikho aloma ari, “Khu shifukhu isho, ise ikhaakile inyaanga ikwe mwihangilwe, akile shishiilima shiwaambe shibala kumuusi.

¹⁰Ise ikhaashuuse biifukhu byeenywe bye kamayiiya biikele bye khuulila ni kumutaambo. Ni kimyeenya kyeenywe kyeesi mwiimba, kikele kye kumutaambo. Ise ikhaakile inywe mubeke kamatsuune keenywe, naluundi mukwaare bikwaaro bye bukoongwe. Mukhaabe busa nga basaali ni balila khu lwe khuufwa khw'omwaana waabwe natweela yenyene. Shiifukhu isho shikhaabe she kumutaambo khukhwoolisa khu ntsakamo.”

¹¹Umukasya Wele alikho aloma ari, “Bona, biifukhu bilikho biitsa mu moni, mweesi ise ndisiindikhila intsala mu shibala sheenywe. Akhuba bari intsala iye biilyo, namwe buulesa bwe kameetsi ta, ne intsala ni buulesa bwe khuukana khuuwulila ilomo y'Omukasya.

¹²Babaandu bakhataangetaange khukhwaama khu nyaantsa Dedi Si khuutsya khukhwoolisa khu nyaantsa Meditereniyani, naluundi khukhwaama ingaaki khukwoolisa ibwaamanyaanga. Bakhaatiimaane busa, nga baweentsa ilomo y'Omukasya, ne sibakhaakinyoole ta.

¹³Khu shifukhu isho, ikhaba basoleeli ni bakhaana babashiili baahele, bakhaayeekhe bakwe aasi khu lwe buulesa.

¹⁴Abo babesaaya bifwaani bye ba wele bibiili mu Samariya, nga baloma bari, ‘Mu lisina lya wele uwe mu shisiintsa sha Dani,’ namwe bari ‘Mu lisina lye ba wele babaali mu Berisheba,’ bakhoonakisibwe balekhe khwiilamo khubawo luundi ta.”