Read lumasaaba Amosi 9 Bible Online

Amosi 9 - lumasaaba bible

Amosi 9

¹Ise nabona Umukasya nga wemikhile aambi ni shisheeso shikhosefu, kila aloma ari, “Ni mukhupe imurwe we kimisiindi kye Lisaayilo Liikhulu ni kamaani keene, nio akile kimisiingi kyakyo kitengaale. Ni mu kimenyule kirurekho, nio akile kikwe khu mirwe kye babaandu. Babaaramire nga bali baalamu, ise ikhaabereere mu busoolo, nga inaambisa luurima. Mbaawo na mutweela ukhaatitukhe atsye ta; mbaawo na mutweela ukhaawone ta.

²Abe baakhayaba beekha aasi imakoombe, ise ikhaabakhweeseyo. Abe baakhaniina mwikulu mu ngaaki, ise ikhaabaruseyo imbakobose aasi.

³Abe baakhatsya beebisa khu ngaaki khwe lukiingi Karumeli, ise ikhaatsye imbaweentse imbaruseyo. Abe baakhatsya khu lwaalo lwe nyaantsa bari nio ise ikhababona ta, ikhaalakile kuusolo kuurafu kwe mu meetsi kubalume.

⁴Abe baasiku baabwe baakhabasuta baabayila mu bubowe, ikhaalakile baasiku abo babeere. Ise naakhaliilewo ilala khuboonakisa bawewo, indekhe khubayeetakho na khari ta.”

⁵Umukasya Wele umunyali uwa byoosi, atiila khu shibala, waakila shoosi shatengaala; shino shikila babaashimenyamo boosi baalila khulwe kumutaambo. Shibala shoosi shiniina angaaki shetsula, naluundi shelayo shawelela nga luluutsi Nayilo.

⁶Umukasya ombakha muungo mweewe mwikulu, ne khu shibala wabiimbakho libaanga liliili nga lihaafu. Niye ulaanga kameetsi khukhwaama mu nyaantsa waakila kaakobola kaalakala khu shibala nga ifula. Lisina lyeewe bamulaanga bari Umukasya.

⁷Umukasya alikho aloma ari, “Babaandu ba Isiraeli, isi ise inywe muli busa nga babaandu be mu Esiyopiya. Ise niye uwabarusa inywe mu shibala she ba Misiri, musaambo niyo indweela isi narusira ba Filisitiya khukhwaama i Kurete, ni ba Siriya khukhwaama i Kiri.

⁸Ise, Wele Umukasya, naareere tsiimoni tsyase khu linaambo lino Isiraeli lye baboonaki. Kane ise indyonakise ndimalewo khukhwaama khu shibala. Ne akhali indi singane noonakise be lisaaye lya Yakobo ta.”

⁹“Khulwekhuuba ise ikhaarewo liikaambila lye khutsekengula ba Isiraeli mu manaambo koosi, nga umuundu natsekengula biilime bibulungule nga araambisa shitsutsuungo. Ise ikhaakhole shino khuurusamo abo babaakhalimo kumukaso ta.

¹⁰Abo babaali baboonaki babaanyoolikhana mu baandu baase, bakheeribwile mu busoolo ni lurima. Ikhaba abo boosi babaaloma bari, ‘Wele singene akhwaantsukhe ifwe khukwe mu bukosi bwoosi ta.’”

¹¹Umukasya alikho aloma ari, “Shiifukhu shilikho shiitsa, khweesi ise ikheeseyo bushaakha buyiinga bwa Dawudi, bubwamala khaale khukhwikela kamakubili. Ikhoombakhe bushaakha kamatikiiyi kaabwo, iŋoone kamakubili ako, buyiinga bwiileyo bube nga ni bwaba amakiboole.

¹²Ni nashiryo ba Isiraeli bakhaanyalise khuwaamba lilyaramirakho khu liloba lya ba Edomu, bawaambe ni kamanaambo ako kakaabatsaka kakaase. Umukasya alikho aloma ari niye umweene niye ukhaakile bibiindu bino bikholikhe.”

¹³Umukasya alikho aloma ari, “Bona biifukhu bilikho biitsa, mweesi biilimwa bikhaatsowake khaangu biminye abo babaakesa kamaani. Ni kimizabibu kikhaatsowake khaangu, kiminye babaasuura iviini kamaani. Kimizabibu kikhaarobe kiroonye busa ni iviini, ukile yiirurukukhe nga yiikha khu bikiingi.

¹⁴Ise ikhaakobosele babaandu baase liiloba lyaabwe. Bakhoombakhe bushaakha biriimba byaabwe bibyamala khukhwikela kamakubili, bamenyemo luundi. Bakhabyaale kimikuunda kye kimizabibu, banywe ni iviini yakyo. Bakhabyaale kimikuunda kye biilimwa, banyalise khuulya khu bye likesa lyaabwe.

¹⁵Ise samweene ikhaakile inywe mwiileyo mumenye mu liloba lyeenywe luundi, lyeesi ise nabawa inywe. Ise sikhaafukiilise babaruse mu liloba ilyo luundi ta.” Umukasya Wele weenywe niye ukanikhile bibiindu bino.