Read lumasaaba Obadiya 1 Bible Online

Obadiya 1 - lumasaaba bible

Obadiya 1

¹Kano niko kamarooro keesi Obadiya aabona. Sheesi Umukasya Wele aakanikha khu Edomu nisho shino: Khwawulila kamakhuuwa kakaama isi Umukasya; nga umurume weewe isi arumana isi kamanaambo aloma ari, “Nimwirekekhe, khakhwinyukhe khutsye mu busoolo ni ba Edomu.”

²Umukasya waalomela Edomu ari, Intsya khukhwikyelisa iwe khuuba ufuura bukyeekhe mu manaambo koosi, naluundi ube ufuura khuulekelesebwa naabi.

³Inywe mweesi babaamenya iyo muufwa tse lulwaanda, nga mwaayikholela bukono bweenywe iyo khu ngaaki mu njiinji. Khukhwiyiingayiinga khwe mu mwoyo kweenywe khwaabawoombesele luukali. Inywe mumwilomela mu myoyo kyeenywe muri, “Ari naanu umweene unyala waakhuwanusa ifwe waakhukwiisa aasi iyo?”

⁴Abe yakhaba nga mwaayiyiinga mu ngaaki luukali muryo nga kunywiinywi waasu, mwaatsya mwekholela biiswi byeenywe mu nienieesi iyo, ise intsya khubaamisa ibweene iyo, imbakwiise aasi. Ise Umukasya samweene niye ushilomile.

⁵Ilala iba nga babeefwi babeetsile iwoowo, iba nga banuuli babeetsile khuukhuunuula iwoowo mu shilo, nga kumutaambo kumukali kwakhuliindiliile iwe! Ne nibo khali sibeebile bayila buli shiindu shoosi ta. Iba nga babaandu babaabuta kimisabibu khukhwaama khusiiwe, khali balekhilekho mikyeekhe kiri.

⁶Ne bakhaasakulake bibiindu bya Esawu byoosi, bye buyiindifu byeewe abe bibyeebisa bikhaanyoolekhane biyilibwe.

⁷Babaandu boosi abe babaali basaale boowo bakhaakhushuukhekho bakhuwombese, abo abe babaali basaale boowo bakhumiinilise bakhuyile bakhwoolese khu lwaakha lwe liiswa lyoowo. Babaandu abe babaalyatsaka ni nawe bakhaakhuwombese bashuukhe bakhumalilewo ilala. Abo abe beesi wiyikina khuuba basaale boowo bakhaakhureere aasi e bikyele byoowo kumureko, ilekhe khubawo umuundu na mutweela ushimanyakho ta.

⁸Umukasya umweene ashikuukuula ari, Khu shifukhu isho, ise samweene ikhaanyalise khuuhesa basaani ba Edomu be kamakhula, ikhaahese babaandu boosi babaali ni khuumanya, khu Lukiinji lwa Esawu.

⁹Baryo nio baasoolani boowo be kamaani bafune induyi ingali naabi, O Temani, ni nabuli muundu yeesi ukhaabe khu lukiingi lwa Esawu bamukhalile aasi nga bamusala busa.

¹⁰Lwe bituluungu biikali byeesi mwakhola khu bandayeenywe ba Yakobo, mukheetsule kamaŋaanyu kamakali, naluundi mukhaahelele ilala biilo ni biilo.

¹¹Khu shifukhu khweesi batsonwaaki beetsila khuubanuula, inywe mweemikha aleeyi busa mwalekha khuubayeeta ta. Nga banaambo beetsa khuubanuulakho buyiindifu bwaabwe, baryo beetsa benjila mu bilibwa byaabwe, nga bakhupa khakokha isaambo iye khuuyilamwo Yerusalemu, inywe mwebirisa busa nga batweela khu basiku baabwe.

¹²Inywe sishabaakhila khukhwiyiinga khu shifukhu khweesi baandayeenywe baafunilakho biikosi ta. Inywe khali simwekhoya khu mbuka isi babaandu ba Yuda baaba nga bahela ta, inywe khali simweyiingayiinga khu shifukhu khweesi baabeela ni ngunyi ta.

¹³Inywe khali simwenjila mu bilibwa bye babaandu baase khu shifukhu khweesi baafunilakho buwaangafu ta. Namwe khali simwabalekelesa nga bali mu mutaambo kukufwaana kuryo ta. Inywe khali simwanuula bye buyiindifu bwaabwe nga ni baaba bali mu mutaambo kukufwaana kuryo ta.

¹⁴Inywe khali simwatsya mwiimikha isi kimikhoosi kyaawukhanila, mukhoonyaka batweela khu nibo babaaba nga batitukha ta. Inywe khali simwawaambaka babaandu babaaba baawonele, khuubawaanayo isi baasiku baabwe, khu shifukhu she kumutaambo nga isho ta.

¹⁵Shifukhu sh'Omukasya she kumusaango shili aambi naabi lwe kamanaambo koosi. Inywe sheesi mwakhola khu Isiraeli, nanywe shikhaabakholikhekho. Buuraambi bweenywe buubi ubwo bukhaakobole bukwe khu mirwe kyeenywe kimyeene.

¹⁶Inywe nga ni mwanywa nga mumilakila khu lukiingi lwase lukhosefu, karyo nako kamanaambo kakaabebotokheleele inywe kakhaanywe luundi kamilake. Ilala kamanaambo kakhaanywe luundi kamilake, kafwaane busa nga kakaakhanywaatsakakho ta.

¹⁷Ne khu lukiingi Sayuuni khuukhaabekho buwonesi, lukhaabe shiifwo shikhosefu. Ni babaandu ba Yakobo bakhaakobole beyilile buusikha bwaabwe.

¹⁸Babaandu ba Yakobo bakhafwaane busa kumulilo kukuutindiima, ni babetsukhulu ba Yusufu bafwaane busa nga kumulilo kukwilyebula. Ne babaandu ba Esawu bakhaafwaane busa nga kamasakari, nio bawaambisibwe ni kumulilo ukwo kukookhe kukamalewo. Shikhaabe shiryo lwekhuuba Umukasya umweene niye ushikanikha!

¹⁹Lwanyuma babaandu babaamenya mu Negevu bakheetse bamenye khu njiinji tsa Esawu, ni naabo babaama mu Shefela[1] nabo bakheetse beyilile shibala she ba Firisitiya. Babeene abo bakhaayile ni shibala sha Efurayimu ni sha Samariya. Ni babaandu ba Benyamini nabo bakhaayile shibala sha Gileyadi.

²⁰Ni lituuli lye baamuli babaali batweela khu baandu ba Isiraeli bakhaakobole beyilile liiswa lyaabwe lye Foyenisiya khuutsya khwoolela ilala i Zarefaasi. Ni baamuli babaama mu Yerusalemu, ne nga abe baayilibwa ingaaki i Sefaradi, bakhaakobole beyilile biriimba bibiili i Negevu.

²¹Basaani baatsamani bakhaaniine khu Lukiinji lwa Sayuuni, nio batsye bawule Lukiinji lwa Esawu. Buyiinga ibwo bwoosi bukhaabe bw'Omukasya umweene!